مهزلة العقل العراقي

حبيب العربنجي

الحوار المتمدن-العدد: 4565 - 2014 / 9 / 5 - 17:38
المحور: كتابات ساخرة
    

العقل زينة
حبيب العربنجي

أكو قصة قريتها من زمان راح تفيد أذكرها بداية هاي المقالة: .واحد خريج ترجمة ما لگى شغل..گام يبوگ حتى يعيش..وبعد سنوات...شافه صديقه من نفس دورة الترجمة والكلية وسأله عن أحواله، فعرف صاير لص. گال يمعوديللي (يمعود بالإيطالي لأن القصة إيطالية) آني هسة عندي دار ترجمة ونشر، ومحتاج مترجم وأنت لغتك زينة، تعال إشتغل وياي وأترك شغلة البوگ. والله أقتنع الرجّال...گال باچر أمر عليك حتى نتفق.
ثاني يوم مر على صديقه أبو النشر...وأتفقوا عالشغل. نطاه يترجم قصة عن قصر أمير إيطالي...وگال أريده منك بعد أسبوع. كلش فرح صاحبنا الحرامي بالشغل الجديد...وأخذ القصة وأتفقوا يجيبها بعد اسبوع. وصدگ جابها بالموعد. أبو دار النشر وبحسب شغله لازم يراجع الترجمة وي الأصل.
وهناك إنصدم...بالقصة الأصلية عدد الثريات بالقصر عشرة بالترجمة سبعة...بالقصة عدد مزهريات ثلاثة وعشرين بالترجمة صايرات ثمانية...بالقصة عدد غرف القصر ستة وثلاثين بالقصة المترجمة أربع وعشرين...بالقصة عدد اللوحات الموجودة بالقصر واحد وثلاثين لوحة بالقصة المترجمة عشرين.وهيچ للزوالي والأنتيكات. صاح على صديقه إللي چان يبوگ...گال له شنو سالفتك...ليش الأرقام كلها متغيرة ؟؟ وكلها بيها نقص... وين وديتهن؟؟
گال: والله إيدي متعلمة على البوگ..ما گدرت...كل هذا الخير بالقصر وما أبوگ !!!
إنتهت القصة
إللي يضوگ الحرام يتونس وبعد ما يگدر يعوفه...وحتى رب العالمين يبارك بالحرام ما تعرف شنو الفلم...هاي القصة (طبعاً كتبتها محورة) قاريها قبل ربع قرن، وهسة ذكرتها وآني أشوف الجماعة دا يبوگون كل شي حتى وصل البوگ إلى بوگ الصمود...إي الصمود...صمود ناس فقرا...ناس ما لاگية تاكل وما عدها غير گاعها ، هذولة أهل أمرلي إللي صمدوا ودافعوا عن قريتهم ما أعرف مدينتهم ...المهم...بوحدهم لأكثر من شهرين...لا جتهم طيارات أميركية ولا فرنسية ولا بيمشرگة سوت لهم شي ولا جيش عبود چمبر گدر يفك الياخة عنهم ولا تمضرطات قاسم المو...سوي گدرت تسوي شي. وبعد كل هذا الصمود ومن الشغلة صارت فضيحة لأن كل العالم سمعوا وما حد تدخل...يللا الناس والدول گامت تحس وأرسلت طيارات لدعم البيشمركة.
زين بكل هذه الاحداث وين دور حجي العامري؟؟؟ أي حجي...هاي رتبة عسكرية جديدة بالجيش العراقي...أي واحد يقاتل داعش يشيل رتبة حجي..اكو حجي ركن...أكو حجي إداري ..اكو حجي تموين ونقل وهيچ. وإذا صدگ حجي العامري هو حرر أمرلي لعد ليش ما گدر خلال سبعين ما أعرف ثمانين يوم؟؟؟ وليش أبو إسراء ما گدر؟؟؟ وليش الخزعلي ما گدر؟؟؟
هذولة شغلتهم مثل شغلة المترجم...متعلمين على البوگ...وهسة دا يبوگون شي خطير..صمود ناس...من حق أهل أمرلي يفرحوا بحريتهم ونصرهم على داعش...مو يجي العامري ويبوگ هذا الصمود ويجيّره لنفسه بأعتباره قائد قوات فجل أبو الضرطة..لو يجي أبو إسراء ويدخل أمرلي عبالك هو ماك آرثر وأكص إيدي لو يعرف الفرق بين يميناً تراصف و..وازناً هرول...لو الخزعلي إللي ما يعرف شنو الفرق بين اليسيم وجنبك سلاح...هذولة هسة كلهم صايرين براسنا أبطال تحرير أمرلي...هذولة كلهم چانوا يضربون التشريب والهبر وأهل أمرلي چانوا ما لاگين ماي وما لاگين گرصة خبز.
لا واليوم وصلني إيميل...بوگ من نوع جديد...يگول أبو الرسالة أن لا صمود أهل أمرلي ولا بطيخ...يگول إللي حرر أمرلي هو علي بن أبن طالب...ويحلف وينطينا دلائل إللي لو أسولفها على بيبيتي تگوم تضربني بنعالها بلكن يرجع لي عقلي...يگول هذا المسودن أن كل قتلى الدواعش مقتولين بنفس الجرح يم الرگبة بقطع على شكل سيف علي بن أبي طالب !!! وأن علي بن أبي طالب چان عنده أربعة ألاف مقاتل كلهم بملابس بيضا يمسكون القذائف قبل ما توگع للگاع...وأن علي بن أبي طالب چان يمشي بفرسه البيضة في شوارع المدينة فتصير المدينة ولا عبالك أكو قصف عليها ومثل ما يگول هو كل دقيقتين هاون !
ولكم أستحوا...النوب تعلمون البوگ حتى لعلي بن أبي طالب... ولكم هذا الرجال عاش مات معدم...عوفوه بحاله...لا داعش ولا البغدادي...لو هو هيچ چان گدر يدفع عن نفسه خنجر أبن ملجم المرادي مو عاد بعد ألف وأربعمئة سنة يجي يحارب داعش...كلامي لا طائفي ولا دين...هاي الشغلتين ما أشتريهم بچيس حب رگي مطلعينه من الخرة تشجيعاً للتجارة المحلية والتدوير...لا ويگول أبو الرسالة (أحتفظ بنسخة منها للتاريخ) يگول :داعش أعترف بهالشي...گالوا أهل أمرلي كلهم سحرة ومشعوذين من هذا ما گدرنا ندخل أمرلي...كل مرة نريد ندخل نشوف أكو جن وعفاريت تبلع الدواعش...وهاي جديدة...أكو صنف جديد من الجن بلاع الدواعش...ويجوز نسوان هذا الصنف هن بلاعات ما أعرف شنو .
ولكم بهاي العقليات راح نبني ؟؟؟
ولكم العالم وين وإحنا وين؟؟
العالم قبل تقريباً شهر.. العلماء نجحوا بأرسال أول رسالة نصية بيها ريحة...أي بيها ريحة...عالم بعث رسالة نصية لصديقه في فرنسا..هذا العالم چان يطبخ معكرونة وخلا ريحة معكرونة بالرسالة النصية (كودات وإشارات ألكترونية ما عندي قرصاغ أشرحها) وصديقه من أستلم الرسالة شم ريحة المعكرونة وخابر صديقة لتأكيد وصول الرسالة وگال : أشم رائحة المعكرونة !! كدليل على نجاح التجربة... والخبر موجود على الأنترنت.
وحتى تشوفون شلون يبوگون ماكو ثنين من الحكومة يتفقون على نفس الرقم...شوف هذا... سبايكر عد واحد 1700 شهيد...وبعدين يصير 1600 وبعدين 1200...حتى وصل لأبو إسراء وهو القائد العام للقوات المسلحة فصار الرقم 170...طار الصفر...والكلام موجود على اليوتيوب وتگدرون تتأكدون... هذولة عدهم حساسية وي الأرقام...يتهسترون...بس هسة تطورت الحالة عدهم..صاروا يبوگون شرف غيرهم...يبوگون سمعة غيرهم...
إذا هذا الحچي مال علي بن أبي طالب حقيقة...ليش ما ننطيه منصب وزير الإعمار بالحكومة... وهاي الوزراة هي حصة لجماعته...ويگوم ينطلق بفرسه البيضا بشوارع المدن العراقية...الكهرباء يتعدل...الطسات تروح...المجاري تتعدل...وحتى الإشارات المروروية تگوم تشتغل... ها أشو ما عاجبكم الحچي...عود بعد ما يسوي هالشي خلي يصير رئيس وزراء...وخلي بعد ما ينطيها ويتلل الحلو.
ولكم إذا إستمرت الحالة هيچ... مو بعيدة يطلع إلنا واحد ويگول أن سبب عدم تحرير الموصل هو وجود أبو لهب وياهم...كلما تقترب قطعات الجيش...يجي أبو لهب ويطلع نار من حلگه عبالك تنين...وكل شي يحترگ...بجاه أبو لهب وإمرأته...حمالة الكلاشينكوف !
والله الموفج.

#حبيب_العربنجي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات