يويو

رمزى حلمى لوقا

الحوار المتمدن-العدد: 5982 - 2018 / 9 / 2 - 17:46
المحور: الادب والفن
    

يويو
***
بطل
فى لعبة خيال الضل
حبة صوابع
بيحركوك
على لوحة البهجة و الاحزان
بيسخطوك انسان
ما لكش رأى فى لعبة الحواديت
بلياتشو لابس عدة التنكيت
و كل همك
تبسط السلطان
بيشحنوك
زمبلك
و يحفّظوك كلمتين
للوعظ و التبكيت
كورة من المطاط
مربوطة بالأستيك
مُسخة فى إيدين القاضى و السجان
بينطّطوك البُعدا
زى اليويو تتنطّ
زيبق و زىّ الدودة بتزفلط
ميمون
و وقت العوزة تعمل فيها قرداتى
بيرقصوك اراجوز
تملى الموالد هيصة و ملاوعة
نبطشى
تيجى تولع الليلة
ورا الغوازى تجرى فى الأفراح
لم النقوط فى العصر دا بقى فن
امنجى و فوريجى
و بتاع تلات ورقات
سيبك بقى م اللى فات
و توب بقى و ارجع
و اعرف صلاحك
نجاحك
ويّا أحبابك
كان للطريق علامات
و لسة موجودة
الظلم عشش يا حيلة
و باركت أفعاله
و شمت ف المظلوم
و رقصت يوم ما انحبس
فرحت عزّاله
ايّاك تكون فاكر
الظلم مش طايلك
اللى قتل الاسود
هيعمل إيه ف يويو ...؟
***
كلمات
رمزى حلمى لوقا
2 سبتمبر 2018

#رمزى_حلمى_لوقا (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل