من محابق لكلام ... زجل

عبدالعاطي جميل

الحوار المتمدن-العدد: 5481 - 2017 / 4 / 4 - 21:15
المحور: الادب والفن
    

من محابق لكلام *
.....................
إلى الصديق الشاعر والباحث إدريس بلعطار
......................................................
ف مجمع لكلام *
وعش الخاوة *
بلسان الجمر *
قطفت طبيق الورد *
ف ضوو الكمرة *
خير وسلام
.............
.............
شمس الما * ضحكات
و ثريا د الروح * تبسمات
و مات غوات الخوف
ضوات حروف الروح .
من هنا بدات التزغريدة
من هنا شدات التفدفيدة
ف شون الخاطر
و سوالف الجدبة تدلات
وكارة لكلام كبرات
ف عين الوقت
و هاذ لعجاجة فراجة
ف البال ولات مصيدة
سرقت خلخال لقصيدة *
من كناش المعاش *
و بقيت هايم
كيف لبهيمة
دايع من حومة لحومة
كيف مجنون هشومة *
ف كلام لغرام تدحا
كيف مسمار جحا
للي وحل ف حبل لمصيدة
ف عكبة لقصيدة
والله حتى نهدر ..
كالت لي لحبيبة
طرزت ليك سرابة
من دكيك الزهر .
منو تعجن
شلا كتبة
منو تدفن
شلا نذبة
عروق الكذابة حطابة
ناشفة
وخا تعيا تدهن
تشعل فيك الجمر ..
بخ الورد
بخ السعد
و زطم ع الما *
تطلع حلاوتو معاك
و تكول ما كال الراشق
والزين الشارق
الغارق ف لبحر :
" الزطمة الاولى احلوة وبنينة
ما فيها حقد ولا ضغينة
ازطم الزطمة صحيحة
و دير زريعة مليحة
لا تعول على غلة الجريحة " ..
بخ الورد
بخ الشهد
ع الهم لمعاود *
تشوف سوة لبلاد
تقاقي وما فيها بيض
و قرا عليها لكريحة
كلام لملحون
يمحي لون الظلام *
كلام لملحون
سخون وما يخون
يعري سر الكون
بصوت لحمام
يدي و يجيب ف لكلام
و يثقب الرخام
و يكول بلا لجام :
الله يقرب شي شوكة
لسوة لعريان ..
هاني هاني
يا أم هاني *
كلك حناني
هواك داني
لشط لغرام
رضاك جاني
فهاذ زحام
و سوارت لمعاني
زادت لكدام
ف ليلة لتمام
كلمة مقبولة
ف ميزان لحزان
باتت بلا غشاوة
ف عش لخاوة ...
.......................
.......................
فبراير 2017
.........................
*توليفة من إيحاء عناوين بعض الكنانيش الزجلية المغربية .. على شكيلة قصيدة عش الخاوة للشاعرة المغربية نعيمة الحمداوي ...
...................................................................................................

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل