مّيمَة .. أنا توحشتك

سليمان الهواري

الحوار المتمدن-العدد: 5469 - 2017 / 3 / 23 - 21:56
المحور: الادب والفن
    

مّيمَة .. أنا توحشتك
************
مّيمَة
أنا توحشتك
نمرّغ شفايفي ف يديك
منك نسمع غي كليمة
سير الله يرضي عليك
أنا مفرشاك بالرضى
ومغطياك بالرضى
تمشي و ترجع ف النجا
من هادوك
لي قهروك
يد الله ترعاك
ديمَة ديمَة
مّيمَة
أنا توحشتك
نغراق ف صدرك
نبوس جبهتك
نشم ريحتك
بغيت منك
و لوْ غي تسليمة
تسليمة وحدة منك الميمة
نهرق دموعي عليك
نشكي زماني ليك
نتنفس همّ بلادي
همّ ولادي
بيني و بين الفرحة
ألف تخميمة و تخميمة
مّيمَة
أنا توحشتك
مْضيوم وْلدك
عْييت أنا ف غربتي
كل ما الناس كثرو جنبي
غراقيت أنا فِيّا
دموعي يبسات طرف عيوني
تتسنى صباح ما بْغا يطلع
نهاراتنا يا مّي
غِيمة تاكل غيمة
وْلا شمس تطلع
في عيون الاولاد
الحكرة سرقات مْنّا التبسيمة
مّيمَة
أنا توحشتك
تْعالي
نشرب من لسانك
صْبر الايام
جغيمة جغيمة
تْعالي
زغرتي لنهارنا لي جاي
نعاودو توزيعة البلاد
الصابة تتفرق بالعبرة
وكلها
لي جاه ف حقو
يْدّيه
يخضار ربيعنا
نعْرّسُو ل بناتنا
نداويوْ جراح الارض
يوْلّي عيدك
بصح عيدك
ترجع لينا
فرحتنا القديمة
مّيمَة
أنا توحشتك
بْصّح
أنا توحشتك
مّيمَة
*** رضا الموسوي /21مارس2017***

#سليمان_الهواري (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات