احنا والقلق جيران وساكنين بنفس المكان

جان نصار

الحوار المتمدن-العدد: 5178 - 2016 / 5 / 30 - 15:26
المحور: كتابات ساخرة
    

احنا شعوب عايشين مع القلق, ومنام مع القلق, ومنفيق مع القلق, ومنقلق اذا ما كناش قلقانين , واليوم اللي ما فيو قلق بقلقنا وبقلق راحتنا, ومستعوذ بالله انو ليش احنا اليوم مش قلقانين.
القلق بعملنا هواجز وبعدها توتر وبتحول لخوف وصرنا منعرفش حالنا احنا قلقانين او خايفين ومن شو.
نتيجة الايقاع السريع بالحياه والتوترات اللي بتصير في العالم ونتيجة تربيتنا من اول يوم منولد فيه والقلق برافقنا.
يا جماعه وانا بطن امي وتروني واقلقوني امي وابوي وهمي قلقانين راح يطلع صبي والا بنت.
على زماني ما كان في بعد 3 اشهر من الحمل ممكن يعرفوا اذا صبي والا بنت.ومن يومها يا جماعه وانا اصرخ واصيح وانا ببطن امي بكفي يا جماعه وترتوني واقلقتوني انا صبي, لدرجة انو قلق امي وابوي وقلقي على خروجي سالم الى دورة الحياه طلعت بعد سبع اشهر وقلتلهم لهون وبكفي.
بما اني ابن اب قلق وام قلقه فطلعت انسان قلق , وبما اني قلق بحثت عن نصي التاني ولاقيت وحدي قلقه زي حالتي واتجوزتها وجبت اولاد وبنات كمان قلقين زي حالاتي.
على فكره القلق هو سمة العصر وشعوبنا من يوم يومها قلقاني من وين بدو يجينا الثقه بالنفس وعدم القلق ها من وين.
علماء النفس بقولك انو القلق ذاتي والخوف موضوعي.
يا جماعه انا ما بحكي عن حالي بس كلنا كشعوب وافراد القلق مرافقنا وراكبنا من ساسنا لراسنا.
لكن هناك قلق بسيط وعارض وسريع الذوبان وهناك قلق حاد ومقلق وهناك قلق مزمن .
شعوبنا اظن عندها قلق مزمن من اول يوم منولد بهالاوطان لاخر يوم منودع فيه الحياه على جهنم او الجنه والقلق مرافقنا.
اكم مره باليوم منقول لبعض ليش انت معصب, والجواب ياعمي انا مش معصب انا قلقان ,هيك طبيعتي.
طب من شو قلقان ؟مش عارف هيك شعور داخلي بقول انو اليوم راح يصير اشي مش منيح وجاي مصيبه.
كيف يا جماعه بدناش نقلق ودولنا فيها هاد الكم من الارهاب وعدم الاستقرار السياسي والاقتصادي ووجود البطاله والفقر .
كيف بدناش نقلق واحنا من اول يوم بالمدرسه خوفونا من الامتحانات, وكل امتحان قبل ما نمتحنه لبعد امتحانه واحنا عايشين على القلق.
الازواج قلقانين على بعض وكل واحد قلق من انو التاني يحب عليه ويكون الو عشيقه او عشيق .القلق هاد بتحول لهاجز وبعدها لغيره وسواس وقهر.
مش بقولك قلقق خيلائي وسواسي قهري.
المرا بتضرب لجوزها الو على الموبايل اذا تأخر بالشغل و مردش بتقلق.
الزلمي بعمل الو للمرا واذا كانت بالحمام بقلق.
ويا عيني على القلق لما بتحول لغيره وصار ضرب كفوف ويا ويل حالي.
في شي بسموه القلق الصحي وهاد يؤدي الى رفع ضغط وسرعة ضربات القلب وعصبيه بالمعده ونرفزي وبالاخير الزلمي بتفشش بالمرا والمرا بتفشش بالاولاد والاولاد بالجيران وحاله وهات حيكها.
العدائيه الموجوده لدى شعوبنا هاي جاي من القلق وصدقوني مش من اشي تاني واحنا كشعوب بحاجه الى علاجات نفسيه وجلسات طبيه بسخولوجيه وسيسولوجيه وبسخيتريه ومنخلص من كل التنظيمات الارهابيه.. كلو الحق على القلق لا الوهابيه ولا الطائفيه ولا المذهبيه .
القلق بقولك زي حالة الانذاراللي بتنبئ بوقوع شي مصيبه او بلاء او خطر وبتحفز البني ادم على الاستعداد لمجابهة الاخطار. ويا سلام على بلادنا شو خاليه من الاخطار.
قال القلق في منو انواع شعوري ولا شعوري وصيفي وشتوي وربيعي وخريفي ورجالي وستاتي وفي ولادي.
القلق الشعوري اللي عارفين اسبابه ويمكن تحديده ا والتصدي له والقضاء عليه بالضربه القاضيه.
القلق اللاشعوري والي لا منعرف اسبابه ولا مسبباته وبضل ملزق فينا على طول.
ببلادنا عنا كل الانواع وافخرها من القلق.. والقلق دائم والحمدلالله ومش قلقانين على طرق ازالة القلق لانها لن تزول ابدا.
احد اهم اسباب القلق موجود عننا منو كتير و ديما الا وهو عدم الشعور بالامان والاستقرار وبما انو هدول الشغلات عنا متوفره وموجوده من يوم ولادتنا فالقلق راح يبقى مرافقنا على طول.
لا ننسى كمان التربيه اللي الها اساس في زرع القلق بحياتنا منذ الصغر... لانو كل غلطه وخطئ كنا نرتكبه كان الكف والشلوط والبوكس ينزل علينا يا من امنا او ابونا او من استاذنا بالمدرسه ويا حمار ويا تيس ويا ويا. لهيك ثقتنا بنفسنا منذ الصغرمعدومي و مهزوزي لاننا مش كاملين ولا ناجحين.
زرعتوا فينا التوتر والخوف والقلق الله لا يوفقكم بدل ما تزرعوا الثقه بالنفس والشجاعه.
اشي بقلق الله يقلقوا وين ما رحتوا.

#جان_نصار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل