المسلسلات التركيه بتخلينا نولول والحقيقه نطبل

جان نصار

الحوار المتمدن-العدد: 5152 - 2016 / 5 / 4 - 15:41
المحور: كتابات ساخرة
    

يا جماعه شعوبنا صارت تعشق التمثيل وتتفاعل معه اكثر من الواقع والحقيقه. اضرط مسلسل تركي بتخلي جماهيرنا تلطم وتولول وتبكي بحرقه لدرجه انو الواحد بفكر انو المسلسل حقيقه مش تمثيل وانو الحروب والقتل والدمار والموت اللي بترف علينا وعلى امتنا العربيه زي زخ المطر هي تمثيل مش حقيقه.
قبل مده دعيت انا وحرمنا المصون لزيارة احدى العائلات الصديقه للتهنئه بمولودهم الجديد لهالوطن المعطاء.
دخلنا على بيت الجماعه واذ كانت نص الحاره متجمعه هناك .
المهم بنص السهره والهرج والمرج اسأذنوا الجماعه وخصوصا الحريم اذا كان بالامكان متابعة المسلسل التركي اليومي.
انا والحرمي قلنا طب يا جماعه اسمحولنا والف مبروك ابدا وعلي الطلاق من مرتي صاحب الدعوه قال: ما انتو مروحين, لسه في الحلو والعصير والسهره بأولها.ودقوا فينا الجماعه ومزعوا اوعينا وشدشدونا والله ما انتو مروحين.
زي ما انتو عارفين احنا شعوب فاضيه والوقت عنا منقضي على الزيارات والنميمه والاستغياب او على متابعة المسلسلات وكرة القدم والشباب على التشات والفيسبوك والتويتر وهاي المجموعه.
المهم بنص المسلسل وخلال الاحداث بموت ابن البطل وهات يا حبيبي اللطم واللخم والعزم, بطل المسلسل وزوجته وصاحبته والجيران اللي مثلو بالمسلسل وكل طاقم التمثيل بلشوا نحيب وعويل وبكاء ولطم ودموع حتى مخرج المسلسل وطاقم التصوير كنا سامعين صوتهم وهمي على ولولي ولطم.
كل الحضور والجماعه اللي كنا عندهم نزلوا بكاء وتحسر وحزن وانقلبت ليلة الفرح لغم وهم,, والله وكيلكم الصغير قبل الكبير الدموع بتشر شر وطبعا محسوبكم وحرمه بلشنا نشارك بالبكاء والولولي على اساس المثل اللي بقول: الموت مع الناس رحمه, فالبكاء مع المشاهدين والحضورنعمه مش نقمه ولا اكلة لحمه .
شو بدكم بالطويله انتهت حلقة المسلسل ورجعنا ضحك ولعب ونكات وهمس وغمز واللي بدكم اياه. واذ في خبر عاجل بالتلفزيون: مقتل عدد كبير من اطفال سوريا في غاره كذا ومشاهد للجثث تقشعر لها الابدان.. وصدقوني ولا واحد التكش او اهتم او غير الحديث او حتى زعل او علق او سب الحاله او احتج او ندد,, اشي كتير عادي وكملوا السهره ولا كأنوا في اشي.
وانا مروح انا والمدام(الاجنبيه) بتقولي انتوا العرب على ما يظهر تمسحتوا, معقول كل الحضور بكيوه على ولد مات بمسلسل تركي فارط وشافين متلوه عشرات ولا رفلكم جفن لمقتل اطفال سوريا والعراق وفلسطين واليمن وليبيا ولبنان و و .كل هالمصايب اللي بوطنكم العربي ما بحركوا مشاعركم وعواطفكم اد مسلسل تركي معقول يا زلمي هالحكي.
فهموني يا جماعه شو ممكن اجاوبها وكيف افسرلها عن هاي الحاله وغيرها من حالات الامه العربيه الواحده ذات الرساله الخالده اللي يوما ما كانت شعار البعث قبل 20 سنه.
فكركم يا اخوان هاي البلاده اللي صايبتنا من تأثير المسلسلات التركيه علينا والا من سياسة الحاكم المستبد والدكتاتوري والتهميش والفقر والبطاله وصلنا لحد انو صارت شعوبنا فاقدة الاحساس.فكركم الجهل والتخلف والتغيب الهم تأثيرات وعوارض جانبيه من ضمنها البلادي والتنبله والاهمال والتطقيع وفقدان المشاعر.
انا تحدثت عن مقطع موت بالمسلسلات التركيه تعالوا اتفرجوا على النسوان بمقاطع الخيانه والغدر واللؤم والخبث اللي الاتراك بمسلسلاتهم عندهم فيها اوفر دوز واكستريم وتطرف.
بتلاقي نسوانا بسبوا المثل على الخيانه. الله يقطعك وغس بالك وتجيك نقطه والله لا يأومك من محلك ومستاهل وخرجك يا حيوان كيف بتخون مرتك.
اما الرجال اذا كان في مقطع خيانة الزوجه لزوجها.. ايوا اضربها وكسر راسها والعن ابوها واذبحها واشرب من دمها واطردها واحرق دمها وطوخها و و.
هاي ثقافتنا,,,, النسوان على الداعاوي والشتم والسب والرجال على الضرب والقتل وتكسير الراس.
من الاخر مجتمعاتنا كتير حضاريه هاد كلو من خلال المسلسلات .
الواقع عنا حدث ولا حرج التفاهم دائما بالعنف لاننا حمشين وعصبين وغيورين وشويه مش منضبتين وكلوه بتأثير عوامل الطقس مش قلة تربيه وتثقيف زي ما بقولو عنا.
الاروبين بليدين ال بالتفاهم والحوار.
والله هلا بالحوار والتفاهم.

سجلوا عندكم هالفلسطينيات
الي ساعه بقولك يا زلمي دقيقه
احكوا بس بدون صوت
يا زلمي والله انك ولد
هينا هون بعد ما اجينا من هناك
قلتلو للزلمي هيك هيك هيك
ما بحب احلف.. بس والله العظيم...
شوف اللي وراك بس ما تتطلع عليه
اعطيني الهاي افتح الهديك
امشي خلينا نقعد ...تعبت وانا قاعد بمشي

#جان_نصار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل شاكر الناصري، أحد مؤسسي الحوار المتمدن	حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل