جان نصار
الحوار المتمدن-العدد: 5097 - 2016 / 3 / 8 - 13:12
المحور:
كتابات ساخرة
محدش قادر يفهم كيف الاسره الحاكمه ال سعود بتفكر وشو هدفها من كل تخبيصاتها السياسيه وعلاقاتها الخارجيه بعد استلام الثنائي الطرح مش المرح الملك سلمان وابنه ولي ولي العهد الامير محمد دفة قيادة سفينة الدمار مش الابحار للسياسه الداخليه والخارجيه للمملكه.
بعد كل العنتريات والهوبرات والجعجعات والفشخرات اللي تشدقت نياعهم وقالوها هاي هم اليوم بلشوا يتراجعوا بمناطق ويخربوا بمناطق ولازالت سياستهم هوجاء عرجاء طرشاء عمياء رياء بلاء بلا خجل واستحياء.
في الحرب مع اليمن بلشوا يبحثوا عن سلالم مشان النزول عن الشجره بعد ما ارهقتهم ماديا واستنزفت طاقاتهم خلال سنه كامله .لا طلع معهم لا حق ولا باطل,, سوى انهم المسؤولين على مقتل اكثر من تلتين الضحايا والقتلى من اليمنين باعتراف هيئة الامم المتحده ,وانهم قاموا بجرائم حرب لازم يحاسبوا عليها بالاضافه الى المطالبات بتجريمهم ومحكماتهم من بعض الهيئات ولجان حقوق الانسان الاروبيه غير المطالبه بعدم بيعهم السلاح اللي بالاصل ما بلزمهم عندهم اسلحه مكدسه بالهبل بالمخازن.
سفير السعوديه بأمريكا بصرح بانه في اليمن لا تحل المشاكل الا سياسيا.
هناك خبر انه توجد محادثات من تحت الطاوله سريه بين الحوثين وحكام السعوديه.
طالما يا اخوات الشليتي ما بتنحل الا سياسيا لشو كل هالقتل والدماركان الو لزوم.
وطالما انكم مش قادرين على الحمار ايران لشو تشاطرتوا على البردعه اللي هي اليمن.
يعني الحرب على اليمن وسوريا الاسد هي حرب على ايران بطريقه غير مباشره بالتوصيل والحراره.
بعد الطنطنه والرنرنه قوات بريه مشان تحارب بسوريا وينهم وصلوا اليوم يا ترى وليش تراجعوا. بعدهم اظن بدربوا برعد الشمال.
على فكره انا كمواطن بسأل ليش رعد الشمال بس شو مع رعد الجنوب والشرق والغرب خلوها ترعد من كل الجهات طالما الرعد شغال ومش غلط اذا بتبرق وبتزلزل وبتبركن .
السعوديه زعلانه وحردانه على ماما امريكا ليش ما ارسلت جنود مشان تولع اكثر منما هي مولعه.
الامريكان قالوها صراحه مش راح نحارب عن حدا ومصالحنا اهم من مصالح الجميع احنا وبنتنا اسرائيل اما بالنسبه لالكوا يا عرب سعوديه وخليج واتراك ومسلمين ففخار يكسر بعضه.مرجوعكم اول واخر لعنا راح ترتموا بحضنا زي ما انتو مرتمين صارلكم 100 سنه.
وزير خارجية السعوديه الجبير راح يركض على فرنسا وطمنهم انو السلاح اللي كنتوا راح تبعتوا على لبنان ب4 مليار دولار احنا منوخده ,,وهاي ثمنه وفوقهم بوسه ولا زعلكوا احنا بطل النا غيركم طالما انو الحج صار على فرنسا بعد ما كان على امريكا وهاي غيمه وبتزول احنا عارفين بس الله يوفقكم الاسد لازم يرحل.
عقدة متلازمة الاسد ركباه للجبير.
السعوديه بعد خسارة الاستثمار في اليمن وسوريا ,,شافين انو ما في حلول الا سياسيه حابين يولعوها بلبنان ,,ورافعين شعار اذا ما خربت ما بتعمر. مع انو اللبنانين بعدهم يادوب يعمروا بلدهم الواقف على كف عفريت من حروبهم الماضي.
نحن منرفض توليعها في لبنان البلد الشقيق بكفيه مأسي واذا السعوديه وايران بيناتهم عداء فيا ريت يدقوا ببعض مباشره وبدون الحروب بالوكاله ويبعدوا عن حقول التجارب باوطاننا العربيه ما عادى بدنا حروب ومأسي ودمار.
تركيا اليوم بالملعب الايراني بقولوا انها بتحاول ترئب الصدع يعني تصلح ما افسده الدهر بين الثوران الهائجان السعوديه وايران .بس هاد مجرد هذيان وتوهان لانوا البلدين بالعداء المذهبي واصلين لحد الخدران والضيعان.
ليش السعوديه بدها تولعها في لبنان هل هي مكاسرة عظام بينها وبين ايران.اذا ولعت من الخسران مش الشعب اللبناني وهاي كمان طريقه لتقوية النفوذ الايراني هناك مش العكس.
اسرائيل الرابح الاكبر من الميمعه تصرح اليوم ان علاقتها مع السعوديه عال العال لانو في عدو مشترك هو ايران.. لكنها اليوم بتقول مشان ما نحرج اكتر حبايبنا السعودين لازم نخلي محادثتنا وعلاقاتنا من تحت الطاوله لانو العلاقات السريه اسلم وبتخلي الطابق مستور.
يا ترى صار في كبح لجماحه لولي ولي العهد الامير محمد ورجع على الساحه بقوه ولي العهد رقم واحد الامير نايف لانو اخباره متصدره العناوين.
هاي رئيس فرنسا هولاند قلدوا وسام القرف عفوا الشرف وهو اعلى وسام تسلمه فرنسا لرؤساء الدول ومع هيك الامير نايف حصل عليه بعد ما تكت السعوديه الاربعه مليار دولار وغيرها من الاتفاقيات مع فرنسا.
الاحلى من كل هالحكي اليوم السعوديه ودول الخليخ بناوروا بالبحر كمان وهاي هم بستعرضوا سفن حربيه وبقولوا انهم موجودين بالبر والبحر والجو.
تفضلوا الملك سلمان وشلة حسب الله برقصوا على جماجم واشلاء الشعوب العربيه وعلى دمار الوطن العربي.
ورقصني يا جدع
https://www.youtube.com/watch?v=5-74541fqus
البعض بفكر اننا منتحامل بس على السعوديه وكاننا واقفين مع السياسه الايرانيه اللي هي شريك في الدمار والقتل على كل الجبهات .الدور القذر في التوليع والتجيش والتحشيد وبث الفرقه والمشاركه بالقتل والتسليح وصولا الى المشاركه العسكريه المباشره ايران كمان الها نصيب في ذلك.يعني من الاخر الدولتين زعمائهم هم شركاء الشيطان ولو بتكف ايادهم عن شعوبنا راح نكون بالف خير بجوز نصير كشعوب نعتمد على حالنا.
من اسباب عدم كتابتي عن السياسه الخارجيه والداخليه لايران هو بسب اني ما بعرف اللغه الفارسيه وبفهمش عليهم بالعربي.
سؤالي الاخير المش مهم :هلئ السعوديه ودول الخليج اعتبروا انو حزب الله منظمه ارهابيه يا ترى جبهة النصره وداعش واللي زيهم من التنظيمات السنيه هدول منظمات ارهابيه والا منظمات مهلبيه او كبه نيه.
طب هلئ مصر والجزائر وتونس ولبنان هدول راح يعاقبوا على عدم موافقتهم على تجريم حزب الله واعتبارهم منظمه ارهابيه اه والا لاء.راح تقطع المعونات والدعم يا ترى عن مصر.
عزيزي القارئ بلغني خبر قطع المعونات والدعم المالي عني ككاتب انتقد سياسات السعوديه لذا اعلن على الملئ تنصلي من كل كتاباتي النقديه تجاه مملكة السعوديه وابرئها من كل ما نسبته اليها واحمل دولة ميكرونيزيا سبب كل المأسي والحروب ودعم الارهاب في منطقتنا.
#جان_نصار (هاشتاغ)
كيف تدعم-ين الحوار المتمدن واليسار والعلمانية
على الانترنت؟