كل النسوان هيك والا بس اللي عندي

جان نصار

الحوار المتمدن-العدد: 5093 - 2016 / 3 / 4 - 17:07
المحور: كتابات ساخرة
    

بصراحه يا جماعه كل ما بتطلع على المرايي الصبح وبشوف هالشيبات بسأل حالي يا ترى من وين اجوو وكيف انا شيبت والمرا يادوب عندها 23 شعره شايبي رغم اننا بالتبادل مفقعين بعض وعلى مشاحنات ومشاكسات وتوليعات لتصل السما .
اكيد الزمن والعمر والوراثه والقلق والتوتر والخوف كل هدول عوامل زادو بهالشيبات, بس مع هيك اظن انها السبب الرئيسي ولا الله بقنعني غير هادا الحكي وبلاش حد يقولي انو الشيب علامة الوقار.
يا جماعه بنام الواحد بالليل ويا ما احلاه كل شئ عال, واذ بفيئ الصبح والحرمي ضاربي بوزها شبيرين, والنكد بكون من لحظة ما اقول صباح الخير بشوف الكشره والشرار بقدح قدح من عيونها وبتقول بينك وبين نفسك يا معين سهلها النهار باين عليه مشحر من اوله.طبعا اذا ردت عليك بصباح النور هاي اللي مع غضب ونكد, بكون احسن لو فقعتك سكيني لانه بهالحاله صدقوني ارخص.
هلئ شو اللي صار بالليل بأثناء النوم بعرفيش. هل هي احلام مزعجه او طقت ببالها شي قصه قديمه او تفاعل كيماوي او عامل نفسي ضرب الفيوزات واثر عليها الصبح العلم عند ربنا.
شوفوا النرجسيه مع المزاجيه مع بعض التفاعلات الكيماويه نتيجه عوامل اختلاطهم بالهواء وانو الطقس اذا كان حار او بارد الهم تأثير هادا اكيد.
في هيك نهار بحاول اتجنب الاحتكاك وبفضل وضعية الدفاع على وضعية الهجوم لانها اسلم والخسائر بتكون في المينموم اي الحد الادنى.
لا بفطر ولا بسأل عن اكل ولا شرب واول بنطلون وقميص قدامي بدكهم وعدل على الباب.. بشوفك المسا يا روحي وبهاي الحاله بنفد بريشي.
في العاده الازواج والزوجات واللي انا وجماعتي منهم منتحمض لبعض والواحد بستنى التاني على نقره او فكشي او نكشي مشان يبدى موشح المشاحنات والصريخ وهات وخود وكانوا هاي الطوش والمعارك الكلاميه هي فلوكلور وملح الحياه الزوجيه,, وبصير بدنا تدخل ابو عيون دبلاني وناعسه بو كيمون بان كي مون تبع هيئة الامم المتحده تيحل الخلافات بحضوره مع قوات حفظ السلام مشان الحجز والفصل بين الازواج بعد تبادل الاراء ووجهات النظر في شتى الوسائل من طناجر وصحون وكل ما يقع تحت الايادي.
حتى لا نظلم انفسنا هاي تبادل وجهات النظر مش كل يوم لكنها تأتي على فترات يمكن تكون موسميه او فصليه او حسب الاوضاع السياسيه في المنطقه اذا كانت هادي او متوتره,, والله وكيلكم في منطقتنا اي كل الشرق الاوسط متوتره على طول وهيك علاقاتنا الزوجيه مد وجزر.
بتجيك المرا الصبح وبتقولك شو نطبخ اليوم.. اللي زي حالاتي, اطبخي اللي بعجبك يا عيوني انا ايش ما كان باكول من تحت اديكي الحلوي لو كان سم .طبعا هادا الكومبليمنت والاطراء بتكيف علي المرا وكل النسوان هيك.وهون كن بتلاقيها بتصر على انك تسمي طبخه وجنابك مشان ما تعقدها بتطرقها اسماء اربع طبخات وبتقولها يا معكروني او جاج مع بطاطا بالفرن او كفته بالصونيه او ملوخيه مع رز.طبعا المدام بتضحك وبتقولك من عيوني ولما بتيجي على الغدا او العشا واذ المصون طابخه باميه بالرز اللي جنابك بتكرهها لهالكله وبتقولك تفضل .
يا جماعه في بعد هيك جكر ومشاكسه ومعاكسه.
شو المفروض يكون موقفي امام نفسي والدول الصديقه.طب يا بنت السته والستين ادمي (شايفين قديش انا حضاري)لشو سألتيني واصريتي على اني اطلب بلساني شي طبخه طالما اني صبابة خرجه واول على اخر راح تطبخي على مزاجك هاااااااااا.
وبتسألوني ليش شيبت او طلعت روحي او فقعت مرارتي او ارتفع ضغطي.اللي مش فاهمه طالما انو النسوان خلف خلاف لشو بتحيرك وبتخيرك وبالاخير بتسوي اللي على مزاجها وممكن ترجع على البيت وتقولك ما فضيتش اطبخ وانشغلت واجت جارتنا ام فلان ونزلنا طقع حكي وبرنامج نميمي على سكان الحاره, وبتقولولي ليش شيبت وانجنيت.
فش حد ممكن يقنعني انو النسوان مش خلف خلاف او بسو وبعملو بعكس ما بدو الزلمي وحسب مزاجهم اذا مش بالطبيخ فبشغلات تاني اكيد.
بتسألني شو البس اذا كنا راحين لزياره او مناسبه.. الطويل والا القصير وبقول القصير مشان ما تقولوا عني متزمت وذكوري كن نكايه فيي بتلبس الطويل,, الاحمر والا الاصفر وجنابها كالعادي بتلبس الاسود اللي اصلا مكنيش خيار او مقترح.
بتسائل مرات بيني وبين نفسي يا ترى بس اللي عندي هيك والا هاي طبيعة النسوان وين ما كان وبفكر وبقول اكد كلهم هيك.فمثلا انا حيالله واحد,,وانسان مش كتير مهم وفي زي حالاتي بالملاين.
اذا كان نابوليون بعظمتوا احتل نص العالم وسياسي وعسكري ورجل دوله وكان داهيه مع الخصوم والاعداء الست جوزفين حبيبة قلبوا جبتلو الدور وكان اسد بالمعارك وادامها كان قط.
النكد والمزاجيه والعكنني والغضب هدول بيجوا مع النسوان بالوراثي اكيد.
يمكن بعض القارأت والنسوان يتهمونا احنا الرجال كمان بالنكد والنرجسيه والغضب والغيره و ووو.
كلامهم بمحلوه ومزبوط ولهيك يا نسوان العالم اتحدوا واكتبوا كل ما يحلو لكم عن مساوئ الرجال مش غلط .بكفيش مطلعين دينا ونازلين كل يوم وكل لحظه وانتوا بدكم المساواه بالحقوق يللى هاي الساحه مفتوحه على الاقل علو صوتكم .
بجوز البعض بسألني يعني انت يا حضرة الكاتب ملاك والقطه بتوكل عشاك والمدام خنأك وربطاك بالاسلاك ومش عارف من اللي قدامك من اللي وراك.
لاء يا جماعه انا كمان شيطان ومطلع روحها ومنكد عليها عيشتها بس اكيد نرجسي وبكتب اللي الي ومش اللي علي وبعدين ماشالله حولها شو ناقصها ماتكتب هي مقالاتها وعلى فيسبوكاتها كل اللي منغص حياتها.
ختاما الى كل النسوان كل عام وانتم بالف خير بيومكم العالمي اللي هو ب 8 اذار وتحملوني انا مواطن مقهور ومفروس وزهقان عيشتي لا منقدر احنا الرجل معاكوا ولا منقدر بلاكو... واحنا من الاخر بلاكو.
(بلاكو الاولى هي بدونكم وبلاكو الثانيه هي من كلمة البلاء مصيبتكم)

#جان_نصار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات