يا مواطن مرحبا ادفع فاتورة الكهربا

جان نصار

الحوار المتمدن-العدد: 5063 - 2016 / 2 / 2 - 15:34
المحور: كتابات ساخرة
    

رغم اننا اليوم منغدريش نعيش بدون كهربا, لانها من اهم الشغلات الاساسيه بحياتنا.. لهيك شركة الكهربا بتلعب فينا كمواطنين زي ما بدها بالتعرفه والاسعار بالكيلو او المتر او الجالون او البرميل ومندفع من غير نقاش ولا جدال ولا مفاصلي وكيف تسحب تعريفة الاسعار وبقديش الكيلو, العلم عندالله.
في مدينة القدس الشرقيه نتزود بالكهربا من شركه وطنيه اسمها شركة كهرباء القدس.والشركه هاي بما اننا واقعين تحت الاحتلال لازم تبقى موجوده وصامده وهي عنوان استقلاليتنا وصمودنا كمواطنين فلسطينين.ولاننا صالحين من المفروض تشجيع الشركات والمنتوجات الوطنيه ونرفض تزويدنا من الشركه القطريه الاسرائيليه.
بس في نقطه صغيره انها كشركه وطنيه بتتزود من مصادر الطاقه للشركه القطريه الاسرائيليه يعني همي بتشتروا منهم وبتكفلوا بالخدمات من صيانه وتوزيع ودفع ورقع وطقع....المواطن المسخم اللي زي حالاتي وبفهمش بالسياسي وفاقد الحس الوطني بقول طب ليش احنا ما نتزود مباشره من الشركه الاسرائيليه ونوفر الملاين طوال كل هالسنين طالما اننا تحت الاحتلال والهوا اللي منتفسوا اسرائيلي والقوانين والتحصيل اول على اخر رايح للشركه الاسرائيليه بدهاش مزاوده ولا طخطخه.
اول جواب بجيك انها شركه وطنيه. يجب رفض التعامل مع الاحتلال.طب ماهي الشركه نفسها وسيط بتوخد من الاحتلال...في موظفين مش لازم نقطع عيشهم.
لهون الحكي كتير حلو ,طيب ليش احنا كمواطنين لازم ندفع 12% زياده عن مواطني القدس الغربيه بهاي الايام. وايام الانتفاضات كانت الفواتير زياده ب24% والخدمات مش احسن.
ليش انا كمواطن اذا عندي احتجاج على شركة الكهربا من منطلق وطني ممنوع اتوجه للمحاكم الاسرائيليه. والشركه نفسها بتخوزقني و بتبعتلي حجز من السلطات الاسرائيليه لاني متضامن معها.
قبل 8 سنوات في الساعه العاشره مساء طرق بابي اربع رجال شرطه من دائرة القانون والاجراءات الاسرائيليه قال عليك حجز لانك كنت مستأجر دار في منطقه اخري وعليك ديون مستحقه لازم تدفعها.
تبهدلت قدام المرا والاولاد والجيران وحتى هيئة الامم المتحده والاتحاد الاروبي والدول الصديقه اني ناصب على شركة الكهرباء مصاري.
يا ابيض يا اسود هدا الحكي مش مزبوط وانا صارلي منتقل اكتر من سنتين ودافع كل ديوني وهات اقنع.المهم حجزت سيارتي مع بهادل وشتائم واهانات واللي قلبكم يحبوا, غير هدر كرامتي اللي هي اصلا مهدوره كمواطن, يعني علقت على شركة كهرباء القدس الوطنيه.
انا بالعاده مهمل. كل فاتوره بدفعها بعد 3 او 4اشهر برميها والفواتير اللي اتهمت اني مش دافعها كان صارلها اكثر من سنتين.
ميزة حرمنا المصون انها مرتبه وتحافظ على الفواتير وبعد البحث وجدنا الفواتير المدفوعه وتوجهت تاني يوم الى شركة الكهرباء وكأني ماسك القط من ديلو مع صاحب البيت القديم الذي اعترف بالقسم المرفوع ان الدين مدفوع وعلى اني مسدد كل مستحقاتي وانني مواطن صالح.
توجهنا الى محامي شركة الكهربا وبعد انتظار ولطع ساعتين وهو يتغازل مع السكرتيره وبعد موشح الاهانات من غير اعتذرات اعطاني تصريح مشان افك الحجوزات عن السياره وذهبت الى موقف سيارات الحجز ودفعت مبلغ اكثر من 800 دولار اجار جر سياره وللشرطه اللي اجت تحجز بالاضافه الى الباركينغ.
شركة الكهربا ومسؤوليها حتى اعتذار لم يعتذروا وقالوا لي تستطيع مقاضاة المحامي. انا كان راسي حامي وبعد ما برد طقعت للموضوع وقلت يا ترى مين فينا الحرامي.
من يومها انا بدفع فواتير الكهرباء اول بأول ومع هيك امبارح بتجيني فاتورة الشهر الجديد وفي 8 شاقل يعني دولارين ديون قديمه تحت بند تأخير.
تصوروا لو 10 الاف فاتوره من المقدسين بتجيهم غرامات تأخير بمعدل دولارين وفي اكتر كمان. يعني 20 الف دولاربالشهر, وعلى مدة سنه 240 الف دولار وعلى مدة 30 سنه انا بدفع فواتير لانو قبلها كان والدي يدفع احسبوها بائى.
احسبو فاتورة مقدسي عربي بالشهر مثلا يدفع 224 شاقل واليهودي يدفع 200 شاقل.
فش يوم بفتح فيه الجريد المحليه الا وعندك خبر قطع الكهرباء عن منطقه او قريه نتيجة تصليحات في الضغط العالي ويا ريتنا نفهم شو هي هالتصليحات. اكثر من 50 سنه وهو الضغط العالي ما نزل زي ضغطي.
فواتير الكهرباء تدفع على الاستهلاك وهادا صحيح اما كيف تحسب التعرفه بالصيف او الشتاء العلم بالغيب.لكن للعلم الفاتوره بالشتى تغلظ (تكبر) اكبر غلاظه يعني الفاتوره بتصير مشحمي ومدهني بسبب برودة الطقس.
شهر 4 و5 و6 و7 كانت فاتورة الكهرباء عندي بحدود ال 250 الى 300 شاقل يعني 60 او 70 دولار .بشهر 8 الفاتوره 400 اي 100 ولار.بشهر 10 فاتوره ب600 شاقل اي اي 150 دولار.بشهر11 فاتورة ب 920 شاقل اي اكثر من 200 دولار.اما الفاتوره الاخير بالامس بتاعة التأخير فكانت بحوالي 300 دولار.
بصراحه الشركه بس يشموا ريحة الهوا وفصل الشتاء مش بتضاعف الفواتير,, لكن منصير نضرب ب5 او 6 اضعاف.
حتى لما بسمعوا انو جاي عاصفه ثلجيه على الاردن او القطب الشمالي وما بتجيش عنا بفلسطين السعر يتضاعف, ممكن حد يفسرلي اياها.
يا ترى كيف بدو المواطن يتأكد انو فاتورته هي 300 دولار او310 دولار بدناش نبالغ.
يا جماعه انا وصل معي لفوق مخي وشعشعت مع راسي مش غادر(قادر) اتحمل سنوات وسنوات ما بفتح تومي لا على الحكومي ولا شركة الكهربا والغاز والمي ولا منظمة التحرير ولا حركة حماس ولا دولة اسرائيل ولا السلطه وبتغرفش بالسياسي لانهم كلهم باللغه العربيه مؤنت واحسن ما يقولي عني من مجتمع ذكوري بكره الاناث.
طيب كل هدول الاناث اللي ذكرتهم لاوينتا بدي اضل ساكت عليهم,معديش في اشي يهديني.
مسكين المواطن الكل بستغلو بطل يعرف مين بقرطو ومين بشفطو ومين بنهبو ومين ومين........

#جان_نصار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل