الفيسبوك يا من صرت حبيبي

جان نصار

الحوار المتمدن-العدد: 5048 - 2016 / 1 / 18 - 21:19
المحور: كتابات ساخرة
    

الله يقطع التكنولوجيا وكل هالتقدم العلمي وصولا الى وسائل التواصل الاجتماعي اللي صرعتنا وبطلنا غادرين نستغنى عنها.
بدينا بالبلفونات والموبيلات اللي الواحد فينا صار يستغني عن مرته والمرا بستغني عن جوزها بس عن البلفون ولا الله بخلينا نستغني عنه.
صار الزلمي يوخد على التخت(السرير) بلفونه قبل ما يوخد مرتو وبالعكس المرا بتوخد موبيلها قبل جوزها.ذبحتنا هالتكنولوجيا وخربت كل العيارات.
الكل صار معاه سمارت فون يعني التلفون الذكي اللي على التش اللمس وفيو ما هب ودب من وسائل التواصل الاجتماعي ومربوط على الانترنت . والاهم اخر صرعه اللي هيي الفيسبوك.
الفيسبوك اللي صار حبيبنا وملازمنا بالليل والنهار.
شو هو الفيسبوك اختراع هاليهودي الكافر اللي جبلنا الدور زوكربرغ انا مش فاهم. صدقووني انا شامم ريحة مؤامره من اختراعوا. الموضوع فيو من وان وعن وكأن ولعن .
فيش واحد الا وبسئلك عندك حساب على الفيسبوك ,ويا ويلك اذا قلتلو لاء,
كن الجواب بجيك انو راح نص عمرك وانك متخلف وجاهل وبعيد عن التكنولوجيا والتطور والتواصل والعلم والذكاء والحدث والحداثه والابداع والتقدم العلمي والعصرنه و و و و .تصوروا كل هاد وكتير غيروا لاني معنديش حساب فيسبوكي.
الفيسبوك هو موقع لنشر الغسيل عفوا المعلومات والاخبار والطرائف.بالبدايه كان بس لعي وحكي فاضي اليوم صار صور ومقاطع فيديو من ما هب ودب من الهبل والخبل والتواصل بين البشر ونشر النممي والفضائح وكمان اتاحة المجال للقذف والسب والشتائم والفضائح .وتواصل على الفاضي والمليان.
اكيد في الو ايجابيات بس سلبياته كمان موجودي ومتعدوش.
يعني حرية التعبير بالعالم الافتراضي وممكن استخدامه لاغراض اجتماعيه وسياسيه.
البعض عرف يستخدمه وصار متنفس سياسي اجتماعي هادف والبعض لنشر الفضائح واثارة النعرات وتصفية الحسابات .لكن الاغلبيه التي تستخدم الفيسبوك هو ادمان وفذلكه وهبل ما الو طعمي.
الواحد لازم يحكي اللي الو واللي عليه في ناس عارفي تستغله بذكاء وفطنه وللضروره.
هناك اشخاص صارلنا سنوات ما منعرف عنهم شيئ واذ اليوم صار في بيناتنا تواصل ومعرفه ومشاركة الافراح والاتراح.
قول هاي الشغله منيحه على اساس انهم ببلاد بعيده, بس اللي بنفس البلد وبنفس البيت صارت تنبلي اننا نتواصل مع بعض واحنا بعاد خطوات .
يا جماعه انا اخبار اولادي وبناتي وحتى مرتي بعرفهاش منهم اد ما بعرفها من الفيسبوك.
مرتي اذا ضاعت وما قدرتش اتصل فيها على الموباييل بلقيها عن طريق الفيسبوك اسرع واسلم. معقول يا ناس هادا الحكي.
امبارح مرتي كانت بالمطبخ وبيتنا اد خزوق العقربه معرفتش انها بالمطبخ الا من حسابها على الفيسبوك وما تصوروش مدى سعادتي انني اخيرا عرفت وينها.
لاء والبعض بقولي اني هسترت وانجنيت مع انو فش اشي بجنن هاي بس تكنولوجيا بدنا نتعود عليها والمستقبل لسه جاي والله يستر الاجيال القادمه.
اولادي نشروا صوره عائليه في ليلة راس السنه على الفيسبوك وعينكم ما تشوف النور اجاني تهاني من جارنا ابو هاني ومن ابو الفراج الاصفهاني صاحب كتاب الاعاني, ومن كل شعوب الارض ,الشعب الياباني والالماني والامريكاني حتى الافغاني والباكستاني واليوناني والطلياني واللبناني والكل بقول يا حبيبي عدلي تاني انا بحب الاولني, واللي بقولي انو ما نساني والكل بتمنالي احلى الاماني.
اللايكات والاعجبني نزلت علينا زي زخ المطر.
بصراحه الفكره كتير عجبتني صوره وحدي جابت كل هاللايكات مع اني بكتب مقالات جاده وساخره وبنحرق دم قلبي وانا بعصر بمخي مشان اطلع باخبار وطرائف ويا دوب يجيني عشر لايكات من العيلي.
مقالات عن القضاء على الفقر والجهل والتخلف او عن الاحتباس الحراري او تطور علمي طيبي اكاديمي اقتصادي حلول لقضايا معاصره يا دوب 100 لايك واعجبني من شعوبنا العربيه.
صوره لهيفاء وهبي بالبنطلون اللي بخزق خزق او بيونسيه بالمايو او كلب بعيد ميلاده, 4 مليون لايك اول اربع دقائق.
ما تستغربوش بكره اذا شي عائله نشرت صور احد اقاربها المتوفين يجيه الف لايك على اساس انو الكل ببعبص بازرار البلفونات او الكومبيوترات على صفحة الفيسبوك ويبدي حزنه واسفه باللايك.
الواحد بيحكي مع مرته او اولاده والكل ماسك الموبيل وهات يا مسجات ونشر اخبار على الفيسبوك بطل الواحد فاضي يعيرك انتباهه بدون ما يكون شي جهاز بايدوا نازل خبط وطرق على الازار اشي لمس واشي تحسيس ومش ناقص الا بوس.
تواصلت قبل مده مع صديق سوري بالسويد من ايام الدراسه وحبيب قلبي بس انقطعت اخباره واذ بالصدفه اجاني حسابه الفيسبوكي.
بعد السلامات والاشواق والاهات تواعدنا على الاتصال بالحكي واذ بقولي:عندك واتس اب او تانغو او فايبر طبعا انا استغربت من هاي الاسماء وسألته هاي الاسماء اذا كان بوخدوها قبل الاكل او بعده وشو هي اصلا.
ضحك اخينا وقالي :يا سلام شو انتو العرب بعدكم متخلفين وبتعرفوش هاي التكنولوجيا بالتواصل ومعظمكم على السكين يا بطيخ.
تصوروا صار كل واحد عربي بقعد مده بالغرب وبقولنا انتو العرب وكأنه الواحد منهم سويدي او امريكي او كندي او او ,اب عن جد.
شخصيا عندي حساب فيسبوكي بس بستعملوش كتير لاني وبلا مؤاخذه بفهملوش.
كل يوم الصبح قبل ما يفتح الواحد فينا عينيه ويقول صباح الخير كن شاف حسابه على الفيسبوك وبعدها ايميلو وبعدها اذا في مسجات ورسائل على الموباييل وبعدين بفضى يقولك صباح النور..
الكل مشغول ومعندوش وقت يحك راسه بس وسائل التواصل الاجتماعي ومشتقاتها هاي غير عنا ساعات وساعات مشان نلاحقها.

#جان_نصار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل