نصائح لحياه زوجيه سعيده

جان نصار

الحوار المتمدن-العدد: 5010 - 2015 / 12 / 11 - 16:09
المحور: كتابات ساخرة
    

يا جماعه اكيد ما في وصفه سحريه للسعاده الزوجيه بس من خلال الخبره والتجربه والتمرس في الحياه وبعد ما بوصل الانسان لمرحله عمريه متقدمه يعني قبل ما يودع الحياه ويسلم هويته بتتراكم عنده تراكمات وخبرات وممارسات ومشاحنات وطوشات بتخلي حكيم نفسه وفيلسوف زمانه .هاي الشغلات ما راح تفيده او تسعده بس ممكن يوصي عليها كنصائح للمقبلين على الزواج او المتزوجين حديثا او الباحثين عن كتاب( نصائح وارشادات في عالم الازواج والزوجات.)
شوفوا يا جماعه بديش اكتب بس لهو او لهي فلهيك ارجو من القراء اعتبار المقال يونيسيكس اي للطرفين رغم اني اتحدث بصفة الذكورى اكثر لاني اعتقد ولا اجزم بدون موافقة المرا اني ذكر.
المشكله انو الحديث عن السعاده الزوجيه نظريا يختلف عن التطبيق لانو في رجال ونسوان ولا ربنا ممكن يرضيهم فما بالنا بحياه مشتركه يضلوا حاطين بوزهم ببوز بعض لشي 30 سنه مؤبد واكثر.
الزلمي والمرا مرات بكون عقلهم اصغر من بعض. ومين اصغر هاي مثل احجية البيضه اجت قبل الجاجه او بالعكس .يعنى المرا عقلها اصغر من الزلمي والا بالعكس. وهاي لا تحسم الا في الميدان والحياه المشتركه بين الازواج وبدها خبير وبسخولوج وسيسولوج تيحللوها.
لازم على الازواج البحث وايجاد اشياء واهتمامات مشتركه.
بعرف انو صعب وممكن في البدايه يمشي الحال مع المسايره والتفاهم بيناتهم لانو الفلم بعده بأوله عفوا الزواج بعده بأوله ولسه ما هبت عواصف انجاب الاولاد والوع والويع والالتزمات بتكون المنموم يعني الحد الادنى.
انا بقترح انجاب عدد قليل من الاولاد مش اكتر من عشره مشان الوضع الاقتصادي .
خلونا ننسى عدد الاولاد والوضع الاقتصادي والوضع السياسي لاننا هيك منشت عن الموضوع ومنرجع لنقطة الاهتمامات المشتركه هاي مهمه ويجب العمل عليها.
يعني شو الغلط انو يكونوا بحبوا السفر والاستمتاع والسياحه وهاي الاشياء تكون مشتركه بيناتهم.
على فكره الكاتب كتير متفائل ولانه من الطبقه المتوسطه مش عارف انو اغلب الازواج في مجتمعاتنا العربيه يا دوب ملاقين ياكلوا ويشربوا واوضاع بلادهم السياسيه والحروب قايمه قاعده و هو ناسيها لهيك اتركوه يكتب مقال فانتازي خيالي وعلى مقاسه ومش غلط الواحد يقراء ويسمع.
التفاهم مطلوب بالعقل والمنطق وقوة الحجه ممكن احيانا استعمال العضلات للتفاهم الودي وما حدا بقول هادا تفاهم قصري.
من الاخر شو ما قالت المرا او الزلمي على المتقبل ان يبدي اعجابه بالطرح العقلاني والفكره المبدعه وابدء موافته ورضاه وسعادة بالموضوع ولو انو احدهم شايف غير هيك وانو الحكي بايخ وتافه وغبي وساذج هاي الشغلات بتمنع الاحتكاكات وتؤدي لغرور الازواج. انو شو ما قال حبيبي موافق عليه او حبيبتي حياتي مراتي شافتها فكره عبقريه.
المرا لازم تطبخ للزلمي كل الاكلات اللي بحبها لانو عقلاته ببطنه وهيك بتكسب نقاط لصالحها وبالمقابل هو يسايرها بشي ورده او زجاجة عطر ومن غير مناسبه هيك هي عقلها بودها لبعيد وبتشعر انومش قادر يستغني عنها وما بقدر يعيش بدونها.
شراء الهدايا الرمزيه بين فتره والتاني بضخ في زيادة الاعجاب والمحافظه على منسوب ارتفاع الحب بيناتهم.
شو ما حكى الزوج على الزوجه موافقتها على كلام زوجها ولو كان هبل ومش معقول هادي بتخليه يكون مغرور وشايف حاله ومش مصدق.والزلمي كمان يقابل زوجته بنفس الطريقه.على فكه هاي الجمله انا بكررها للمره التاني بالمقال نظرا لاهميتها.
بالنسبه للعلاقات الحميميه هاي احدى اهم الشغلات اللي بدها حرفنه وابداع وتفهم ودراسه وتخصص والرجال اليوم شاكرين لاختراع الحبه الزرقاء الفياخرا اللي احدثت ثوره في عالم الحب نظرا لاحتياجتهم اليها نتيجة الظروف المناخيه والحروب والحالات النفسيه.جاري البحث عن فياجرا نسائيه رغم عدم ضروريتها لانو المهم الرجال والنسوان مش كتير بحاجه الها وهمي بشتغلوا على الرموت كنترول.
العفو منك يا حضرة الكاتب انت بتحدث عن السعاده له ولها ليش التحيز له. شو بخصني دخلنا بموضوع تاني وخلي شي هي تكتب عن السعاده الزوجيه واشوف اذا كانت منصفه وعادله زيي.
بالمختصر بدهم يسايروا بعض ويمثلوا على بعض من البدايه الى النهايه والا المنازعات والمناوشات والاحتكاكات ستتصدر الاحداث والنتائج ستكون وخيمه.
في حال حدوث خيانه ما بين احد الاطراف ارجو ان تكون بسريه تامه والحفاظ على الهرموني والتناغم في الحياه الزوجيه ولا اكنو شي حصل والمهم السيطره على الوضع ويستحسن عدم التكرار واذا كررت فهيك هاي النصائح هي وقلتها ما الها فايده .
الحموات هم عنصر هام في الحياه الزوجه في حال وجدوا والبحث عن طريقه لارضائهم او تحيدهم عن التدخل في الحياه الزوجيه للازواج هو ضروره ملحه.
الاعتماد على التلفزيون ووجوده كعنصر اساسي في الترفيه هوعنصر قاتل و عامل لرفع الضغط وزيادة التوتر اذا لم يسيطر على استعماله,لانه يسبب الادمان والحرمان والمعمعان والتوهان والخدران والنسيان والضيعان.
من الاخراذا اردتم حياه زوجيه سعيده ما تبحثوش عليها لانها موجده بس بالافلام.
اكثر من 95% من الازواج غير سعيدين وعايشين بالروتين , معظمهم مش متفاهمين, بس صاروا متعودين ومعظمهم ممثلين رائعين, وعلى امرهم مغلوبين ومستنين حسن الختام وبقولوا الله يعين , وين كنا بلحظة اللي قولنا موافقين, اكيد كنا مسحورين ومغيبين ومش عارفين على اي مصيبه جاين .اما المسعودين وبالسعاده عايشين معليش انتو الصح واحنا الغلطانين .المهم انو نكون كلنا مع انفسنا صرحين.

#جان_نصار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل