التعليم ما بين الطلاب والمعلمين

جان نصار

الحوار المتمدن-العدد: 4976 - 2015 / 11 / 5 - 14:06
المحور: كتابات ساخرة
    

التعليم ما بين الطلاب والمعليمين
بيناتنا التعليم بمدارسنا من سيئ الى اسوء من كل النواحي.
المناهج بعدها على حالها من 100 سنه, اي من سنة انيستو ربي.منقدر نقول انو لا جديد تحت الشمس غير تغير الوجوه وتقدم الزمن.وبما اننا العربان الزمن بعنيلناش اشي زي الاجانب اللي بقولولنا: تايم اذ موني يعني بالعربي في هيك اصطلاح ,الوقت من ذهب ووقتنا بمصاري بس صدقوني حكي فراطه ولا واحد بتعامل فيه.
منقدر نقول انو المناهج ماشي على قول اللي عند اهله على مهله.
مثل شعاري ايام دراستي الجامعيه:لا احنا مستعجلين ولا الجامعه مسكره(راح تغلق ابوابها).
الاساتذه بعدهم لليوم بعاملوا الطلاب بمنتهى الادب والاخلاق .وقف يا حمار وتعال يا بغل وافتح ايدك يا جحش ,وانكب وانصرف وانتطس وانخم وسكر نيعاك يا حيوان .
استاذنا للرياضيات الله يرحمه كان دائما يقول لنا جملته الجميله والخلاقه:يا حيوان بتعيش حمار وبتموت حمار وستحرم من يوم القيامه.الجمله هاي ما نستني استاذي الفاضل وخلتني احب الرياضيات بشكل جنوني ولازالت عالقه بذهني نتيجة الانتماء للعلم والاخلاق.
اليوم نفس الاخلاق موجوده على اطقع والعن وتبادل وجهات النظر وتضارب الاراء والايادي بين الطلاب والمعلمين اصبحت تتصدر اليوتيوبات والفيديوهات ومواقع التواصل الاجتماعي.
مثلا استاذ بفقع طالب 3او6 او9كفوف على وجهه ورأسه مع اكم شلوط وبوكس وبنسيه الحليب اللي رضعته اياه امه قبل حرب العراق وايران .
طالب ينهال على اساتذه ضربا وركلا ولكما وبنسيه حرب سوريا واليمن هالايام.
العنف ما شاالله متبادل ما بين الطلاب والمدرسين .وكلو الحق على الاستعمار والامبرياليه واكيد الصهيونيه بتحصيل حاصل.
بصراحه اليوم المنهاج التعليميه بعدها عند ضرب وسرق وكسر الطالب المعلم ومقابلها لكم وركل وسب ولعن وشتم المعلم الطالب اخلاق اشي برفع الراس امام هيئة الامم المتحده وكل الشعوب المتحضره.
دخلكم شو وزارات التربيه والتعليم صارلهم 100 سنه موجودين بعملو .
بالزمان كان في برنامج اسمه تجديدات واختراعات يا ترى المناهج التعليميه بدهاش تجديدات مع وجود هاد الكم من الاختراعات.
العفو منك حضرة الكاتب هلئ بس التعليم والمناهج بدها تجديدات ولا الشعوب العربيه كلها بدها نفض من ساسها لراسها.
يعني يا حبيبي يا قارئ انا بكل موضوع بتيجي جنابك بطجني ملاحظه وبتنسفلي افكاري ومقالي من اوله لاخره وكأني جاي من السويد...يا عمي صدقوني عارف اني بعدني في منطقة التخلف والجهل بس اتركوني افصفص كل موضوع وموضوعه وبلاش فذلكه.
احلى اشي اهالي الطلاب وانواعهم.
اهالي بتيجي على المدرسه فازعه دارعه بدهم يضربوا الاستاذ وجايبينلو سيارة الاسعاف.
اهالي بتيجي تتشكر الاستاذ لانهم مش قادرين على ابنائهم ومعليش ربوهم ومش مهم لو ضربتوهم.
اهالي بتوجهوا للشرطه او وزارة التربيه والتعليم للشكوى.
واهالي ولا عندهم ولا عند بالهم بقولك فخار ويكسر بعضه اذا ابنهم الضارب او المضروب.
منقدر نقول في عنا انفلات اخلاقي تخطى الخط الاحمر بشي 50 متر ,وهاد في حدود المقايس العالميه.
في الاردن تشكلت جاهه من المعلمين للصلاحات والعطوات وفض الاشتباكات ما بين الطلاب والمعلمين بسب الحالات الكثيره اللي فيها الطلاب صاروا يتبلوا على المعلمين بالشكاوي لدى الشرطه ووزارة التربيه والتعليم واكثرها شكاوي كيديه.
يعني صار الطالب يلبس المعلم تهمه انو ضرب او تعدى عليه حتى اذا كان حمار وتيس بالمدرسه.واذا كان راسب بدو ينجح غصبن عن الملايكي.
العفو منك يا حضرة الكاتب انت نفسك بتقول انو الطالب حمار وتيس وبتسب وبتلعن مع انك المفروض تكون اديب لانك مثقف.
والله يا قارئ انا كمان العفو منك ما انا نتاج هيك تعليم وهيك ثقافي. كان مديرنا يخلعنا كل عصاي بعدهم اصابعي لليوم من 30 سنه بوجعوني بدك اياني اكون مؤدب ليش يا خوي. ما انا ابن بيئتي كيف بدك اياني اوقع بعيد عن الشجره, مزبوط والا لاء.
اسحوا حدا يقولي :قم للمعلم وفه التبجيلا....كاد المعلم ان يكون رسولا
بديش اسمع هادا البيت خلي احمد شوقي زي ما بدو يلعلع فيه وبلاش فذلكه وفلسفه.
يا ترى فكركم انو لازم نغير المناهج التعليميه والا الطلاب والا الاساتذه احسن؟
انا بتصور انو نغير البلد لان هاي العقليات اللي موجوده بمجتمعاتنا صعب تنجيرها وبرمجتها .
لاء واللي زي حالاتي, بتبعت ابنك وبنتك على مدرسه خاصه وتعليم خاص وفت عملي ومصاري وفلوس تتقول بس وبعدين بيجي ابنك او بنتك من المدرسه وبقولك المعلم او المعلمه ما بفهموناش وهات يا حبيبي فتش على استاذ خصوصي غير المدرسه الخصوصي بس للرياضيات والعلوم والكيميا والفيزيا واللغات الانكليزي والفرنسي.
صار الواحد فينا يبعت ابنه على المدرسه وبكلفوا اقساط ومدرسين خصوصين اكتر من الجامعه, ولهيك احسنلو الواحد يبعت اولاده على الجامعه من صف الاول الابتدائي ارخص ويمكن بيجيبو نتيحه افضل.
من علمني حرفا دفعت له دم قلبي فلوسا مش صرت له عبدا.
يا حبيبي على المناهج لما بتقولك وكان العرب وبتحكي عن الانتصارات والعلوم والاختراعات
عف عنا يا حضرة الكاتب هو احنا كان في عنا انتصارات اصلا او اخترعات او نظريا ت علميه شو رايك تحل عنا وعن سمانا احسنلك
معك حق عزيزي القارئ خليني اكتب اشي تاني رغم انو حيكون اطقع وافظع
القاكم في الدرس عفوا المقال القادم.

#جان_نصار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل