بين السعوديه وايران مين الذئاب ومين الخرفان

جان نصار

الحوار المتمدن-العدد: 5051 - 2016 / 1 / 21 - 15:52
المحور: كتابات ساخرة
    

ممكن حدا يفهمنا بين السعوديه وايران, مين الذئاب ومين الخرفان , لاني طرشان وخرسان وعميان. انا شايف التنين سيان , همهم المصالح مش الانسان, معتمدين على الزفت والقطران,بضخو هالنفط من الخزان, ومولعينها بين الفرس والعربان,مشان شهادة حسن سلوك من الغرب والامريكان,قامعين شعوبهم من الحريه ومعيشينهم على الحرمان .معيشينا شعوب منطقة الشرق الاوسط بالمعمعان ,بدهم يحرقوا المكان ومش سألين على زمان,ولا على انس ولا جان وهات حيكها يا ابو الحبان.
السعوديه بدها تتحكم بالعالم الاسلامي وايران بدها حصتها كمان هدول سني وهدول شيعه وكانهم مش مسلمين ولازم يجمعهم الدين والاهم انسانيتهم. لكن مع الاسف كل واحده من هدول الدولتين مهتمه بمصالحها وحاكمين شعوبهم بالاستبداد الديني والتزمت والتشدد وقامعين الحريات وكل مشتقاتها.
طب انت يا كاتب يا جان مين بتشجع ...السعوديه والا ايران..بصراحه انا بشجع قيم الانسان واذا بالفوتبول وكرة القدم بشجع الالمان لانو بلعبوا احسن منهم التنين.
كيف شايف الاوضاع: من غير زعل الدولتين مخربين كل سياسات الدول العربيه الداخليه واللي بقول غير هيك مش مزبوط لا هامهم اسلام ولا دين المهم المصالح.
طب لو ولعت الحرب الساخنه مش البارده شو بصير؟
من ناحية التقسيم المذهبي ,السعوديه بترجح كفتها لانو السنين اكتر.
من ناحية القوه العسكريه وعدد السكان ايران اقوى واكبر.
اما اذا ولعت الخسرانين هم الشعوب من الابرياء والشباب ودمار وحرق اقتصاد الدولتين وكل المعيه اللي راح يتجرجروا ورا الدولتين والمذهبين..
الاوضاع زي ما بشوفها كمراقب هي انو السعوديه بوجود ولي ولي العهد المتهور والمغرور الامير محمد اذا ما كبح جماحه وغلب العقل على العواطف والاستفزات فحكام السعوديه بطيروا لان اعدائهم كتار وهمي فاتحين اكتر من جبهه غير الجبهه الداخليه اللي هي على نار.
اما ايران اليوم في بحبوحه افرجت عن اموالها المحتجزه من 30 سنه بالبنوك الغربيه اكتر من 150 مليار دولار.اقتصاد راح يتعافى بضخ هاي الاموال بالاضافه انو الدول الغربيه كمان بتهمها مصالحه راح يهرولوا هروله على اقامة مشاريع وعقد صفقات مع الايرانين.
اذا ايران مع العقوبات الاقتصاديه والحصار والمقاطعه كان العالم يا دوب يعرف ويقدر يلجمها خلال السنوات الماضيات اليوم بعد ما خرج المارد من القمقم راح يقدروا يشكموها.
الباكستان تحاول التوسط بين البلدين مشان يهدو اللعب بس الظاهر انو السعودين مطقعين للوساطه وبدهم يولعوها معتمدين على دولة جزر القمر.(وين هالدوله يا جماعه واكم لاعب عدد فريقها عفوا سكانها).ومعتمدين على السودان ويمكن والله اعلم اسرائيل.لانو احنا اللي منعرفوه انو عدو عدوي فهو صديقي هدا من جهه.ومن جهه تاني فلسطين متل كل السنين بعدها على الرف وفش اشي جديد عليها .تتحمل كمان 100 سنه لقدام مش الصبر مفتاح الدرج.وبعدين يا حبيبي في المهم والاهم , وشو الاهم غير محاربة الصفوين والفرس والمجوس والروافض الشيعه هدول الايرانين والا محاربة ولاد عمنا الاسرائيلين الحبابين.
شخصيا انا ضد الحروب بس هيك المؤشرات والاوضاع بتقول.
الاقتصادين بتوقعوا انو سعر برميل النفط يصير ب20 او 10 دولارات للبرميل الواحد. يا بلاش النفط راح يصير ارخص من المي .على فكره اليوم صار في تقنيه جديده بتكرير البترول مع بعض الاضافات يصر مي وبكره بالمستقبل راح نصير نشرب نفط خالي من الكحول والدسم مقطر ومعقم على الطريقه الخليجيه.
الحروب مستقبلا راح تكون على المي مش على النفط بس هاي جايينها لقدام للاجيال القادمه بعد ما تتصحر بلادنا وحتى الغربان يهاجروا منها.
يعني بالاخير منتمنى انو فتيل هاي الازمه ينزع وبركي عالم هالمجانين يصحى على حالو.
لاء وقال بالاخير بيجي واحد بسألني ليش بحبش العربان وبحب انتمي للخرفان. يا اعزائي الخروف بشعر بحيونته بس انا في هالموطن مش شاعر بأنسانيتي.
صدقوني بتمنى اكون خروف حضاري وانتمي للغرب . لانه حتى بالغرب الخروف صار يحصل على وظيفه ومحترم ومقدرين حيونيته وانتمائه للشعوب المتقدمه... واذا مش مصدقيني شوفوا واحكموا.


https://www.youtube.com/watch?v=RQRsk-Hy5gk
اذا الخروف بباريس عنده عقد عمل مع البلديه احنا البرفيسور بفتش على عمل برضوا عند البلديه يعني يشتغل زبال وبدون عقد عمل ويا دوب

#جان_نصار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل