ليش انا بكتب بالعافيه ها لماذا؟

جان نصار

الحوار المتمدن-العدد: 5109 - 2016 / 3 / 20 - 14:49
المحور: كتابات ساخرة
    

البعض بسئلني ليش يا حضرة الكاتب بتكتب بالعاميه.
قبل اسبوع في كاتب مرموك (ق) مصري كان متحفنا بمقال فيه هجوم على كتاب اللغه العاميه واخونا بندد وبشجب وبستنكر وبدين وبرفض وبحتج على عدم الكتابه بالفصحه وبتهمنا بتدمير ونسف وتفجير وتسفيه وتسطيح وتطقيع ل اللغه العربيه الفصحه.
معقول انا واللي زي منقوم بكل هالعمل التدميري والتخريبي للغتنا العربيه.
حلو ما ناقص الا ويتهمنا بالارهاب الفكري والجسدي مش بعيد يتهمونا كمان باننا عملاء للغرب واننا متأمرين على شعوبنا العربيه..يعني نظرية المؤامره راح تعلئ وتوقف عند اللغه العربيه العاميه ...
يا خوي كل هدول اللي عم بدمرونا وبقتلوا وبفجروا وبفخخوا للاوطان تاركهم وداقق فينا.بعدين دخلكم وين االغلط بالكتابه العاميه طالما انها بتقرب بين شعوبنا .
هاي في شعراء طول حياتهم كتبوا بالعاميه ومشهروين, لا بل قربوا اللهجات للشعوب مثل عبد الرحمن الابنودي واحمد فؤاد نجم وهشام الجخ.
كل الجماهير بتغني وحافظه غنوية نانسي عجرم اخصمك اه بالعاميه ومش حافظين اغنية ماجده الرومي كن صديقي بالفصحه.
مين اللي قال انو العاميه تدمير للغه,, ليش ما بتكون تطوير وزيادة معرفي وتحديث وتقريب وتحبيب وترغيب وترطيب وتطبيب للغه..
حكمةالمقال:
ليس من الضروري ان يكون كل كلامي دقيقا فربما يكون بعضه طحينا.(الله على جمال اللغه العربيه الوي سعه)
اكيد اللغه العربيه الها جماليتها ورونقها وابداعها هاي لغة الضاد مش حيالله, ومن المفروض اننا كعرب تكون لغة التواصل والابداع بيننا هي الفصحه بس هات طبقها على نص الوطن العربي الجاهل والامي اللي يادوب يحكي لغته العاميه.بالاضافه اننا كشعب عربي لا نقراء نحنا نشاهد الرائي اللي هو التلفزيون 25 ساعه باليوم.
اما ليش انا شخصيا بكتب بالعاميه فألي اسبابي اللي راح احكيلكم اياها وفلسفتي الكتابيه.
المقال عندي والكتابي هو تجسيد للواقع بشكل ساخر وباللغه العاميه بلقيه اقرب للمتلقي, هادا من وجهة نظري, ثم بخلي البعض اللي ما بيقراء يجب يقراء بالسهل الممتنع .
مقالي انا بمثله تمثيل سيناريو مليودراما, وبكتبه وبتخيل مجموعه من القراء قاعدين معي وهمي اصدقائي مش قرائي واكيد مش راح احكي معهم بالفصحه.
بعدين لشو الفضايح انا يا دوب مخلص الصف السادس الابتدائي بطلوع الروح بعد ما رسبت فيه 3 مرات.
الوضع السياسي او الاجتماعي انا بقربه للقارئ العادي مش المثقف.بخلي اللي ما بحب سياسي بلغتي يصير يحبها.
اصلا المثقف من نرجسيته اذا كتب يا دوب يقراء لحاله او اذا كتب موضوع يادوب هو نفسه يفهمه فكيف القارئ.
لهيك انا ببحث عن هدول اللي ما الهم بالقرأه يكونوا من روادها.
بكره التعقيد بالكتابه والفلسفه والفذلكه لانو في شغلات بكتبوها البعض مش عارف من وين بيجيبوا الكلام.
فمثلا لما يكتب كاتب او فلان انو تفوق على نفسه ممكن حد يفسري اياها كيف الواحد بتفوق على نفسه ومن وين جبولنا هالمصتلح.او واحد بقولك الانا الموجودي في نفسي بمعنى الانا فيي انا, طب انا والله ما فهمت علي انا...بعدين انا الطفل اللي جواي انا هو اللي بكتب صدقوني مش انا.
الكاتبه والباحثه الاستاذه وفاء سلطان عادت الى الكتابه في موقع الحوار والعوده احمد.الكثيرين رحبوا بحضورها وانا برحب فيها كمان.
بتقولك بمقال العوده انها ابتعدت عن الكتابه 5 سنوات وطوال هذه المده كانت في رحله بين العقل والقلب واكتشفت ذاتها ونفسها.
يا سلام وانا اقعد خمس سنين بيني وبين نفسي مع انا مشان اكتشف ذاتي, وبعدين اذا الطريق بين القلب والعقل اخدوا معاها 5 سنوات يا ترى الطريق بين نيويورك والقاهره اديش راح يوخدوا معاها.اكيد الطريق بين عقلها وقلبها حفظتهم عن غايب بتعرف كل طلعه ونزله وكل حجر بالطريق.
دايما لما بكون في نقاش بين قلبي وعقلي بتفوز معدتي مع انو ما الها دخل بالموضوع بس شخصيتها قويه.
شو اللي حبب شعوبنا بالمسلسلات التركيه غير اللغه الشاميه العربيه العاميه,, مو هيك روحي وعيني.
شو اللي عرف الملاين على الموسيقه الكلاسيكيه مثل بيتهوفن وباخ وشتراوس وهايدن وتشايكوفسكي غير لما دخلت بافلام الكرتون واللي صار الولد الصغير يصفر ويدندن فيها وحفظها من كثرة المشاهده والسمع.
فكركم لو ضلت الموسيقه الكلاسيكيه بعيده عن التبسيط والترفيه وحتى السخريه والكوميديا كان هالئد انشهرت وانعرفت.
اليوم حتى الاطفال بدندن كلاسيك يا شفيك وكتير احسن انها تعرف لكل الطبقات ويسمعوا عنها ويتذوقوها من ما تبقى حبيسة فئه معينه من الشعوب.
شفتوا لوين اتفلسفت اتفذلكت ووصلت مقالاتي العاميه للموسيقه العالميه الكلاسيكيه..
ايوا قولوا اين الثرى من الثريا.
قبل ايام كتبت مقال سياسي عن ابتزاز تركيا لاروبا تصوروا بعد اربع ايام من نزول المقال رئيس حكومة فرنسا مع انو ما بعرف عربي مانويل فالس قراء مقالي وتواردت افكاري على افكارو وقال بالحرف الواحد اروبا ترفض الابتزاز التركي
شفتوا لوين وصلت مقالاتي العاميه وصلت للعالميه.

#جان_نصار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل