سباق الحمار والفيل للرئاسه الامريكيه

جان نصار

الحوار المتمدن-العدد: 5158 - 2016 / 5 / 10 - 20:42
المحور: كتابات ساخرة
    

خلينا نقول انو احنا يا هالفلسطينيه اخر 20 او 30 سنه لا منهتم ولا مننغم على نتائج الانتخابات الرئاسيه الامريكيه. يعني طلع حمار ديمقراطي او فيل جمهوري كله عند العرب قطين .
عفوا بس للتوضيح شعار الحزب الديمقراطي هو الحمار علشان هيك انا بنسب الرئيس الديمقراطي الى الحمير وهاي مش من عندي همي اللي اختاروا وقرروا المقصود الحزب الديمقراطي. اما الحزب الجمهوري فاختار الفيل ولهيك الرئيس القادم اذا كان طلع جمهوري يعني دونالد ترامب راح فعلا يكون هايج مثل ما هو اليوم هايج زي الفيل.
مشان زيادة المعلومات على اصل هدول الشعارات هاي انا بطق هون هاد الرابط مشان اوفر وقت وما افسخ بنياعي ويفكر القارئ اني فلتة زماني بالمعلومات .
الله يخلي العم غوغل يضل واقف فوق راسنا يمكن بعض شعوب الطرش واللي انا منهم بلا فخر واللي مش عارفي وين الله حاطتها تتثقف وتتعلم.
http://www.alhurra.com/content/story-behind-democratic-donkey-republican-elephant/213213.html
منرجع لموضوعنا احنا الفلسطينيه ليش ما منهتم بالنتائج؟
لانو ولا رئيس امريكي حرك طرف اصبعوا وكان معني بالحل دايما بقول اقعدو واتفاهموا انتو والاسرائيلين.
طب يا انكل سام قعدنا والله وكيلك كل زعماء اسرائيل على شعار دوخوني يا لموني ما حد راضي يحل .
فش رئيس وزاره اسرائيلي الا ورفع شعار لو 50 سنه او اكتر راح نضل على مباحثات ومفوضات وكلها راح تطلع على فشوش.
يا جماعه كل رئيس امريكي بدو ما بين سنتين لاربع سنوات مشان يستوعب القضيه ويشرحولوا اياها من اول وجديد زي قصة ابريق الزيت.بخلصوا الاربع سنين هاي اول فتره رئاسيه وبعدها اذا انتخب مره تاني بقولك خلونا نفتش على حل وبعد سنتين بقول هاد موضوع طويل وانا يا دوب اخلص القضايا اللي في ايدي ان كانت داخليه او سياسه خارجيه.
بس يا جماعه الله وكيلكم كل رئيس قبل انتهاء فترة ولاياته بشي اكم شهر بضربنا ابره بالعضل وبصير يتحدث عن وجوب فرض حل وخلص استوت القضيه وبصير داعية سلام واحنا منقول ها فرجت يمكن الرئيس القادم يحلها.
بعد الانتخابات بيجي الرئيس الجديد ومنرجع تيتي تيتي متل ما روحتي جيتي.
في خلال هاي الاثناء اسرائيل نازلي بناء مستوطنه ورا مستوطنه وبغيروا الحقائق على الارض,, وولى زمن الحل لا دوله ثنائية القوميه ولا دولتين يا نور العين.
يا جماعه لما كانت الدول العربيه قبل ثورات الربيع العربي واقفه على حالها يادوب كان في ضغط على اسرائيل, اليوم نص الوطن العربي دول فاشله والنص التاني بحضن اسرائيل راح يكون في ضغط عربي .مستحيل مستحيل اغنية ورده لو عملتوا المستحيل.
جماعة الفيل اي الجمهورين صار مرشحهم الاهوج دونالد ترامب حاسم الوضع هو المرشح .اما من جماعة الحميرفالست هيلاري كلينتون تقريبا كمان جاهزه.
الامريكان بقولك لاول مره هاي الانتخابات غير شكل مع انو كل انتخاباتهم غير شكل.يعني الجنازي حاميه والميت كلب.
ترامب اعلن انو راح يرفض دخول المسلمين لامريكا وكمان بدو استحقاق فاتورة الارهاب من السعوديه ومش غلط نحاسب ايران.
اليوم اعلن ان رئيس بلدية لندن المسلم الجديد اخر طبعه صادق خان هو اكسبشن يعني استثناء بقدر يخش زياره على امريكا.(يسلملي شو حنون)
الزلمي عنصري ويؤمن بقوة المال وبدو الاعتماد على الايدي العامله والصناعات الامريكيه مش اعتماد على الغير والصناعات الصينيه ومن الاخر بلدوزر وماشي قصف وتصريحات ضد الاقليات واللاتينين والسود الاخ فش على لسانه رباط.
طبعا نشر غسيل وفضايح المنافسه هيلاري كلينتون هاد ببرنامج الانتخابات وقاموس ترامب للهجوم.
الست هيلاري الكل صار يعرفها وهي مرا بليده وما همها اشي غير الوصول الى السلطه .
اخر خبر يقال انها كانت متفقه مع مونيكا لوينسكي مشان تغري جوزها الرئيس السابق بلول عفوا بيل كلينتون وتمثل دور الضحيه اللي غفرت لزوجها مشان ترتفع اسهمها في امريكا وتعتبر بطلة المحافظه على القيم العائليه . دعست على كرامتها وكبريائها مشان اظهار تسامحها. مش مهم الخيانه المهم الرصيد السياسي وعلى ما يظهر انو راح تزبط معها.
على فكره لسه الفلم بعده بأوله ومسلسل الفضايح راح يستمر ومع هيك ماما امريكا بالاخير راح تنتخب رئيس وصرف الملاين للدعايات الانتخابيه راح يستمر .
شخصيا انا بعتبر هاي المصاريف ما بيجو نص الفوائد على الاموال السعوديه والخليجيه وصحتين وعافيه على قلوبهم طالما في هبايل بتدفع ,فوين الغلط.
رئيس امريكا القادم راح يفتفت ويقسم بهالوطن العربي اللي بعده مش مفتفت ومقسم هاد اذا احنا ما فتفتنا وقسمنا حالنا.
انتظروا العرض القادم.

#جان_نصار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل شاكر الناصري، أحد مؤسسي الحوار المتمدن	حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل