السعوديه يا حبيبتي اعدتي لي هويتي

جان نصار

الحوار المتمدن-العدد: 5164 - 2016 / 5 / 16 - 15:16
المحور: كتابات ساخرة
    

يا جماعه يوم بعد يوم بشعر بعروبتي وانتمائي لهذا الوطن العربي الكبير وبشعر بالفخر والاعتزاز انو في دوله بتواصل الليل مع النهار في سبيل رفاهية شعوبنا وحريتنا وكرامتنا واسعادنا والاهم حمايتنا.
نعم السعوديه يا حبيتي اعدتي لي كمان كرامتي كفلسطيني وسوري وعراقي ولبناني وليبي ويمني ومصري واردني وبقية دولنا اللي مش متذكر اساميهم الواحده تلو الاخرى وطبعا على رأسهم دول الخليج.
نعم وافضال وحسنات ومكرمات السعوديه بترف رف وبزخ زخ وبلط لط علينا وعلى رؤسنا اد ماهي لا تعد وتحص كعرب ومسلمين ومواطنين بغض النظر عن انتمائتنا الدينيه والعرقيه والطائفيه.
كل هاي التداخلات والبعبصات في اوطاننا العربيه لمسات ال سعود السحريه واناملهم كان الها اثر و صدى ومردود بهاد الرخاء والانسجام والتنميه اللي عايشين اليوم بحسهم بعض اقطارنا العربيه,, وبدناش نسمي دول احسن من عيون الحساد خصوصا لالدول اللي اصبحت اليوم دول فاشله بفضلهم وبركاتهم ودعائهم والاهم دعمهم المالي واللوجيستي والعسكري والاستخبارتي وكل ما تيسر لهم من دعم دعموه الله يوجهلهم الخير ويطرح في نفطهم البركه.
ولي ولي عهد السعوديه الامير محمد ابن فهمان قدم رؤيته الشامله للتنميه مش بس للسعوديه لا بل لكل العرب والمسلمين وحتى العالم ومشان الفطام عن ادمان النفط الزلمي طرح مشروعه السياسي الاقتصادي لغاية 2030 او 2090 او 20250 حسب ما الله بفرجها..
لكن مشان يزبط الوضع لا بد ان تكون السعوديه مش دوله عربيه وبس بل دوله اقليميه واسلاميه وحتى عالميه وكبرى ولهيك لازم استعراض العضلات وانشاء وتدريب وتسليح جيش سعودي قوي قادر على حماية السعوديه والعرب والعالم الاسلامي واذا تمكن العالم الحر ويحجزوا كرسي يستوعب حجمهم ويقعدوا مع الكبار زي امريكا وروسيا والصين .
البدايه كانت تمارين وقوات درع الجزيره اللي فيها دول مجلس التعاون الخليجي وبعدها كانت مناورات رعد الشمال واللي قيل انها اكبر تجمع عسكري ومناورات وتدريبات و جمعت كتير من الدول مش فاضي اسميهاومش متذكرها .
بالامس انطلقت وحدات بريه وجويه وبحريه سعوديه الى تركيا واتحفونا بقرب تدريبات جديده ومناورات راح تكون الاكبر بالعالم بمشاركة تركيا ولسه مش معلينين عن بقية الدول المشاركه .
المهم اننا ندخل بموسوعة جنيس احنا يا هالعرب اكبر قرص فلافل واكبر صحن حمص واكبر سدر كنافه واكبرصحن تبوله واكبر طبخة كسكس واكبر كبسه سعوديه وهاي اليوم اكبر مناورات عسكريه سعوديه تركيه وبقية دول الانس.
اسم المناورات افيس efes 2016
على فكره افيس بالعبريه تعني صفر.من عندي صفر تكعيب.
الاسرائيلين اعلنوا انو كان في تدريبات ومناوشات واخد وعطى لقوات سعوديه عندهم بس هاي ما بتدخل باللعب. هاي تدريبات جانبيه للعدو المشترك ايران.
“بقولك ان التمرين يهدف إلى تحقيق الأمن والاستقرار الدولي، والتضامن بين الدول المشتركة، والاستعداد لمواجهة التنظيمات الإرهابية، وإبراز القدرات ورفع الكفاءة العالية، وتعزيز التعاون وتوثيق التفاهم العسكري، وتنفيذ المهام المختلطة في بيئة متعددة الجنسيات، إلى جانب تنفيذ مخطط التحميل والنقل الاستراتيجي للقوات من مناطق تمركزها
اظن بعد هالديباجه بدكمش اعزائي القراء شرح تفصيلي اكثر من هيك.
اللي انا مش فاهمه لشو كل هالمناورات والتدريبات ووين التنميه والاقتصاد اذ جاين على حروب.وبدل من البحث عن طرق ارساء سلام يهيئ للحروب.
كل هاي الاموال اللي بتصرف على التدريبات مش الافضل ان بالفعل تصرف على التنميه والقضاء على الفقر والبطاله مثلا.
كل الاموال اللي تصرف على التشليح عفوا التسليح والمعدات مش لو فتحنا فيهم مزرعة دواجن وبقر مشان البيض والالبان وتسمين الحيوانات للحومها وشي بياره ومزرعة حمضيات وسهل قمح كان افضل وهذا اضعف الايمان .
مش راح اقول البحث عن سله غذائيه او مصانع او تنميه او او .
في خبير اقتصادي امريكي يقال انو تنبأته الاقتصاديه دايما بتصيب اسمه شرايبر او شرحبيل اوشرشير مش كتير متذكر اسمه بدكم ما تأخذوني بوادر الايزهايمر بادي عندي, قال انو اذا السعوديه ضلت على هالحاله من الصرف والبعزقه راح تعلن افلاسها .
خسئت يا شرحبيل ما عاش اللي يقول ان السعوديه راح تفلس بعد 3 سنوات هاي مجرد دعايه مضلله.
بس انا حابب اسأل سؤال اذا الحرب على اليمن يوميا بتكلف 200 مليون دولار وشهريا 7 مليار وبديش احسب الفراطه واول 80 مليار انصرفوا بعد انتهاء العام الاول ودخلنا بالتاني ومش مبين في حل لا بل اليوم السعوديه زادو اعدائها وانضموا القاعده وداعش كمان للعب في الحرب اليمنيه.
مش راح نذكر الاموال اللي تصرف على دعم جيش النصره وجيش الفتح وغيراتهم في الاراضي السوريه.
طب هاي مناورات افيس واللي يقال انها الاكبر والاضخم بالعالم مين راح يدفع حق بس سندويشات الفلافل والحمص والهمبورغر والكولا للجنود المشاركين اللي بدهم سندويشات بالميليارات غير السعوديه يا ترى.
تركيا شريك مضارب على المرابح فقط واذا شاركت الاردن ومصر والمغرب وباكستان وغيرهم من الدول مين راح يدفع مصاريف المعازيم غير ابو العروس السعوديه وامها واخوتها دول الخليج يا ترى.
اكيد فيحان وجزرستان وملوخيستان وخيارستان وباكستان وافغانستان وازبكستان والشيشان دول مع كل الاحترام مش راح يساهموا بولا سنت او درهم او قرش او مليم او او.
من الاخر اذا كانت رؤية ابن فهمان 2030 من البدايه داخله على مناورات وحروب وقتل ودمار فسلمولي على الحبايب من طرفنا الكل يهديكم السلام ,ال المكتوب بنقرا من عنوانه.
وياما يا حبيبي يا محمد ابن فهمان بعتنالكم قطايف تشنو ساعي البريد اشلهن. .
السعوديه تهدي ايران اغنية الحب كله انا عشتوا ليك وزماني كله
ايران تهدي السعوديه اغنية يا ظالمني وانساك دا كلام اهو دا اللي مش ممكن ابدا افكر فيه
ومني ولقرائي الاحباء اهديكم اغنية هل رأى الحب سكارى مثلنا كشعوب عربيه

#جان_نصار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل