اماني وامال 2016 السعوديه اولا

جان نصار

الحوار المتمدن-العدد: 5032 - 2016 / 1 / 2 - 17:04
المحور: كتابات ساخرة
    

يا جماعه كنت مقرر اني ما اكتب عن اماني وامال واحلام شعوبنا العربيه بشكل عام للسنه الجديدي2016 لانو كل سنه ومعظم الناس كل واحد منهم بحضر لربنا ليسته يعني قائمه وبنزل فيها طرق بالاماني والامال والاحلام اللي بدو يحققها لنفسه وللاخرين مع قدوم العام الجديد وهو عارف ومتأكد ان معظمها لن يتحقق وهي مجرد تفائل تحت بند لعلى وعسى بركي ولربما بالصدفه اشي منها يتحقق.تخيلوا ربنا قاعد لا شغله ولا عملي غير تحيق الامال والاماني والاحلام للشعوب .
فمثلا الفلسطينين صارلهم 70ىسنه بتمنوا وبحلموا وبتأملوا بالدوله المستقله. وما بتلاقي الا وكل واحد كاتبلك او متوقعلك انشاءالله تحرير فلسطين واقامة الدوله العتيده وهمي مكانك سر او الى الوراء در.
هاي مجرد عينه على مستوى كبير ومن خلال شعب كامل وغيرها من شعوبنا العربيه اللي بتمنى العيش بحريه وعداله اجتماعيه وديمقراطيه وكل هاي مجرد احلام واماني, بتقلك يا عزيزي المواطن انساني.
اتمنينا انو السعوديه اتكن وتقعد عاقله وبجوز يرجع عقل الرحمن لراس العائله الحاكمه وتكفي بعبصات بالعالم العربي وانو تهدي اللعب في الساحه الداخليه, واذ بالجماعه بتهوروا وبنجنوا وبتحفونا بخبر اعدام 47 مواطن معظمهم ابرياء منما نسب اليهم ,اللههم انهم طالبوا هؤلاء المعدومين بمزيد من الحريه والحقوق وانتقدوا اداء السلطه الحاكمه.
فش مبرر انو المعارضه تعدم لانها تطالب بالحريات والانكى لما رجال الدين مثل السديس وعبدالله بن محمد المطلق من كبار علماء المسلمين وغيرهم من شيوخ السلطه يباركوا باعدام الوطنين ويدعوا انهم مفسدين بالارض وان اعدامهم رحمة بالعباد وبهم.
تصورا ان الاعدام اصبح رحمه ويقام في كافة ارجاء المملكه الا منطقة جازان ليكونوا عبره لكل مواطني المملكه الذيين يتحدوا العائله المالكه
مشان السعودي يعرف قديش حكاموا رحمين وحنونين على ابناء شعبهم.
نعم ممكن من بين هؤلاء 2 او 4 اشخاص من تنظيم القاعده وقاموا بأعمال ارهابيه لكن معظمهم لا صله لهم بالارهاب غير المطالبه بالحريات والقضاء على الفساد والتفرد بالسلطه.
لاء وال السعوديه بدها دمقرطت سوريا واليمن من اد ما همي ديمقراطين وبحاربوا الارهاب وهمي من اخترع الارهاب.
يا ترى العالم الحر والغرب ولجان حقوق الانسان والمدافعين عن الحريات كيف راح يتقبلوا اعدام هؤلاء ال47 مواطن في بداية العام واكم اعدام لسه راح ينتظر السعودين من ابناء جلدتهم.
شو اماني وامال المصرين بحكم العسكر وزيادة الفساد اللي تخطى ال600مليون جنيه واكثر والمواطن بموت تحت تعذيب ضباط الشرطه وغياب الامن والهرب من عهد مبارك الى السيسي وما زال حكم العسكر قائما.
اكيد مش راح اتطرق لحالة الوطن العربي كله .بكفينا هالعينات وقال المكتوب بنقرا من عنوانه ,الوطن العربي كله مفتت ومقسم وبجتاحوا الارهاب او الفساد او الاستبداد او كلهم سوا وبدكم من المواطن يتمنى ويتأمل ويحلم.
حتى لو نزلنا بسقف توقعاتنا من الاماني الكبيره والقطريه.
فكركم انو النسوان راح يتساوا مع الرجال مثلا اذ تمنينا وتأملنا وحلمنا. اكيد لاء.
فكركم انو الكراهيه الدينيه والتعصب والتخلف والفقر والبطاله اذا اتمننا واتأملنا وكمان حلمنا راح يختفوا من مجتمعاتنا العربيه .بالمشمش.
لهيك حبيباتي القراء اتمنوا اتأملوا واحلاموا على ادكم بلاش تسرحوا كتير بالعلالي .مش المثل بقول على قد فراشك مد اجريك وهيك خلوا امانيكم .
يعني شوية صحه, على كمشة سعاده ,على حفنة فرح, على شبر راحة بال ,على لحظات ضاحكه, على طبخات ساخنه كل السنه, وما تنسوش الرومنسيه حتى لو انقطعت الكهربا وما في معاكم فلوش لشراء الشمع.
اكيد البعض منكم راح يقول عني متشائم وغير متفائل ومحبط وما في اراده ويمكن يوصل لطرق الشعارات ويقولي: لا حياة مع اليأس ولا يأس مع الحياه.او بجوز يقولي: اذا الشعب يوما اراد الحياة ...فلا بد ان يستجيب القدر.
كل هاد معي ومع الواقعين من امثالي ما بسوى بصلي ولهيك انا بقول للجميع :شخصيا اديت رسالتي ووصلت اخر الطريق واليوم انا بلعب دفاع. واللي بدو يلعب بالهجوم هاي الساحه مفتوحه .اهجموا انا بشجع وببارك متلي متل كل شعوب الكنبه .
سيروا عين الله ترعاكم.
بزماني لما كنت ادرس بالجامعه بات عندي صديقي جميل في الكليه وكنا قد ذهبنا للنوم عند طلوع الصباح.
انا كعادتي قمت باكرا وذهب الى السوق وحضرت غذاء وصديقي جميل نائم وانا خجلان افيقه من النوم على اساس ضيف.عند الساعه الرابعه من بعد الظهر لم اتحمل وقلت لصديقي جميل: قوم يا زلمي الشعوب العربيه كلها نايمه وانت بعدك نايم.
ما لاقيت الا وجميل انتفض وقام زي الصاروخ وقال لي :يا اخو الشلن طالما انو الشعوب العربيه كلها نايمه وانت ليش بدك توقف بعكس التيار يللى نرجع اننام.
ضحكت وقلتلوا :معك حق.هادا الحكي كان من اكتر من 35 سنه يعني شعوبنا نايمه من هداك الوقت وادمنت على النوم وانا ما بدي اوقف بعكس التيار ولهيك بعدني لليوم بشجعها على النوم.
رغم كل هيك اتمنوا واتأملوا واحلموا زي ما بدكم مش غلط هاي كلها احاسيس ورغبات ابلاش يعني من غير فلوس.واللي اببلاش كتر منو.
امنيتي الوحيدي في المستقبل حتى وان ما كنت موجود لما كل شعوب الارض ترحل على القمر والمريخ وتسكن هناك مايخدوش معاهم ولا عربي يخلوهم على الارض احسن ,واكيد راح يكونوا نايمين.

#جان_نصار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل