لقاء المتعوس سلمان وخايب الرجى اردوغان

جان نصار

الحوار المتمدن-العدد: 5026 - 2015 / 12 / 27 - 20:07
المحور: كتابات ساخرة
    

عنا مثل بقول:جو جاب المتعوس على خايب الرجى وهادا الحكي بنطبق على لقاء الملك السعودي اردوغان مع الرئيس التركي سلمان.ارجو المعذره على هاد الفلتان والتوهان محسوبكم جان خربط بين البصل والبيتنجان وحط الملك محل السلطان.
بقولك في محادثات وزياره بكره من اردوغان للسعوديه بلقاء العملاقان هدول الزعيمان خصوصا وانو اوراق اللعب كلها تخربطت والاوضاع السياسيه على الارض انقلبت فوقاني تحتاني بعد دخول روسيا بوتين على الخط وتدخل روسيا المباشر في الازمه السوريه.
المعارضه والارهابين اللي بدعموهم الاتراك والقطرين والسعودين على الاراضي السوريه صاروا مش عارفين من وين جايهم الضرب وفي خسائر وتراجع وهزيمه وصار موضوع خروج الاسد من اللعب مش وارد وتحقيق اماني الثلاثي المرح قطر وتركيا والسعوديه صار بعيد المنال.
هسع بطلعلي شي معارض سوري او عربي وبقولي انت مع السفاح الاسد ومع الدكتاتوريه.
يا عمي يحرق الاسد والنمر والفيل والكلب والدب .يعني هسع السعوديه هي بدها الحريه والديمقراطيه والعداله الاجتماعيه للشعب السوري على اساس انو شعبها متخم بالحريه والديمقراطيه ثم هل المفروض ان تحرق سوريا واهلها عن بكرة ابيها مشان ترضى هاي الدول التعيسي.
اتركوا الشعب السوري يقرر لوحده... وبعدين انا بكتب عن صورة الوضع وابعاد واسباب زيارة اردوغان لابو الحبان الملك سلمان.
صدقوني لو الدنمارك او النرويج والسويد همي دعموا المعارضه وطالبوا بالحريات والله كنا فهمنها وكنا ايدناهم بس السعوديه وقطر وتركيا .معقول يا ناس,فهمونا على اي اساس.
تركيا بدها دعم اقتصادي من السعودين وبدها تقولهم يا عمي احنا وقفنا معاكو وقفوا معانا وناولونا كمشة مليارات وأبعتولنا نفط وغاز بالانابيب والكميونات .
الملك سلمان بدو دعم معنوي من الاتراك مش مادي لانو راح بسياسته هو وولي ولي عهده يوصلو السعوديه على الحديدي.
اكيد السعودين بدهم دعم تركيا العسكري كمان لانو الحرب اليمنيه طالت ومش قادرين يوخدو لا حق ولا باطل مع اليمنين من اكتر من 10 شهور. ومن المؤكد انو اردوغان ما راح يدعم السعودين عسكريا لانو في بلاده فتح جبهات وهات اصمد هات ويلو الاكراد وداعش من جهه والحدود مع سوريا والعراق والاوضاع الداخليه من جهه تاني وبتغنيلو :حالي تعباني يا سعوديه فلوس مافيش وانت غنيه يا سعوديه واحنا درويش.
بصراحه هاي زياره معنويه تركيه بتشحد والسعوديه بتدفع .وصور سلفي للاعلام ورساله بدهم يوصلوها للروس انو احنا مش نايمن وصاحين وعنا تحالف سني سني اخو اخته وويلك ياللي تعادينى ويلك يا ويل.
افهموا يا ايرانين انو انتو الشيعه واحنا السنين لاطيللكم مش نايمين.
اللي انا مش فاهمه انو البلدين صار عندهم مشاكل داخليه وخارجيه من بعبصاتهم بالدول المجاوره ومع هيك الزعيمين واحد اتنح من التاني مستعدين يحرقوا بلادهم زي ما نيرون حرق روما.
تركيا عندها مشاكل مع الاكراد والسعوديه مشاكل مع الشيعه.تركيا مشاكل مع الجيران سوريا والعراق والسعوديه مع اليمن وايران.غير المشاكل المعارضه الداخليه في كلا البلدين.
لوين بدهم يوصلوا ما حدا عارف.
ترى هاي زعامة العرب والمسلمين مكلفه وبدها كتير صرف وبعزقه.
ممكن حد يفهمنا يا ناس هاي الدول شو اجنداتها وبتعمل لصالح مين .اكيد مش راح اقول مؤامره والغرب وامريكا هيك بدهم هاي الفكره صارت مستهلكه كتير وفش كاتب او سياسي الا وبتفذلك فيهم.لازم نفتش عن افكار جديده تكون ملهمي وفيها عمق.
انا بقول هاي مراء ومزاج وكيفيه وهيك طلع مع هدول الحكام.في حد اخو مرأهم ومزاجهم.
طب شو مع شعوبكم يا ترى ومع حرياتها وبدل الصرف على دعم الارهاب اصرفوا الفلوس في بلادكم على التنميه والبنى التحتيه والقضاء على البطاله والفقر.
يعني يا حضرة الكاتب دايما بتلف وبدور وبطالب بحقوق الشعوب وهاي شغلاتك اللي بلا طعمه تنميه وبنيه تحتيه حافظهم عن غايب .ومين سامعك.
بتبدى كالعاده مقال ساخر وبالاخير شعارات ونصائح ومزودات .
فهمنا مين قلك انو الشعوب سألي على هيك شغلات .
يا عمي الشعوب صارت تعشق وتحب وتعبد جلاديها.
حتى لو صحلهم ينالوا حرياتهم مش راح يعرفوا كيف يتصرفوا فيها ومعها.
اي عنا شعوب ما بتفرق بين الديمقراطيه والملوخيه او المهلبيه.
خود مصر لفوا وداروا وبرموا ورجعوا للعسكر.
شعوبنا بتهرب من تحت الدلف وبتروح لتحت المزراب.
هاد الكلام مش مزبوط ....الشعوب في عالمها الافتراضي على وسائل التواصل الاجتماعي والفيسبوك والتويتر ويكيوك الغرام الانستغرام عم بحققوا نجاحات منقطعة النظير وهشتغات المطالبه بالحريات والديمقراطيه معبي حيطان كل الكومبيوترات ووصلت لكل بلدان العالم الا عنا, واكيد هاي النجاحات شي يوم راح تترجم على ارض الواقع وتتحقق ولو مش على زمانا.
المهم راح يطروقنا الرئيس التركي اردوغان والملك السعودي في ختام الزياره احلى بيان وراح يكون متل الفرمان للشعب وقطيع الخرفان انو بالاخير راح يعم الامان على الشعب التعبان ولهيك:امان امان يا لالي لي امان.

#جان_نصار (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل