المراية.. نص بالعامية المصرية.. إلى زيزو وبهاء

مختار سعد شحاته

الحوار المتمدن-العدد: 4438 - 2014 / 4 / 29 - 07:47
المحور: الادب والفن
    

المراية..
" إلى زيزو وبهاء الحالميين"
----------------------------------------------------------------------------------------

دقق ف المراية هناك جواك وقولي:
شايف إيه؟
شايف عيل لسه بيحلم؟!
حلمه معافر؟! حلمه معاند؟!
عارف ليه؟
علشان بصيت على سطح مرايتك
ع التناتيش..
قرب حبة.. حاول.. دقق
شايف إيه؟

بص لجوه كمان جوه زمان كان حلمه بيضحك
وبيتلخص بس ف لمسة إيدها
وصوتها الهامس ع التليفون
لما أخوها ويمكن أبوها
ضله يبان ف شعاع النور الكاتم على أسرار حكاياتكم نص الليل
من تحت عتبها،
وكحة صوته بتربك كل أحلامكم
دقق حبة .. حاول.. دقق..
شايف إيه؟

شِعرك لما تقوله عليها؟
شعْرك وأنت بتحكي ولافف خُصَلُه على سبابتك
عايز تفهم سر الرابط بين شفايفها وطعم البن؟!
لما بتحكي عن ضحكتها بطعم المشمش
عن قطتها
عن تدوينها،
عن فستانها،
عن سُمرتها مبتعكرش حليب برائتها قبل النوم
أو تندهلك باسم تحبه من أول يوم
قرب حبة.. حاول.. دقق
شايف إيه؟

كام خربوش على وش مرايتك؟
ميهمكشي
جرب تمسح على خرابيشها وشوف الصورة
حتة جديدة ف زاوية بعيدة جوه مرايتك
كات متسامحة لما الشمس تعدي على شباكك
وسابت ليك حبة نور جنب الحيط
كات عيّناهم لما تضلم كل الشيش
وأما تدندن كات تتجن .. غني منير..
علي ف صوتك.. قولي بحبك..
غني "إمبارح كان عمري عشرين"
قرب حبة.. حاول.. دقق
شايف إيه؟

نفس العيل لسه بيحلم جوه مرايتك..
بص لجوه..
دقق حبة..
مش محتاج غير فرك عنيك


مختار سعد شحاته
Bo Mima
روائي
مصر/ الإسكندرية

#مختار_سعد_شحاته (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل