مقال مش مهم وساخر على الاخر

جان نصار

الحوار المتمدن-العدد: 4405 - 2014 / 3 / 26 - 14:09
المحور: كتابات ساخرة
    

بالفعل مقالي اليوم مثل معظم مقالاتي مش مهمي . واذا ما كان عند القارئ شي 5 دقائق من عمره ووقته الثمين بلاش يقرئه الا اذا حابب يبتسم على الاقل ابتسامي خفيفي من نوع دايت لاني بصراحه حاولت ان اكون جاد وكتبت اكم مقال فكرت انهم مهمين وممكن يعني اساهم ولو شوي بالحياه الثقافيه الفكريه بس ما نجحت وما طلع بأيدي وما في فايدي(فائده).
كنت فاكر ان شي 10 او عشرين مقال من قاع الدست بكتبهم جادين عن مشاكل الوطن العربي ومأسيه وتخلفه وفقره وجهله وعدم استقراروا راح يحلوا كل هالمشاكل . اتاري لو انو ال400 او 500 مليون عربي كل واحد كتب 100 مقال ما راح اشي ينحل ولهيك خليني على مقالاتي الساخره والمش مهمه.
الامور كلها داخلي ببعضها وما في شي بمجتمعاتنا بسر القلب كلها اخبار وحوادث محبطه ومتشأمي في كل المسائل والاتجاهات والمناحي الله وكيلكم .
دايما شاف الامور على مسطرة وقياس المثل اللي بقول: الجنازه حاميه والميت كلب.
عندكم مثلا داعيه وشيخ سعودي يطلق فتوى ان البوفيه المفتوح حرام .ال ليش (لماذا),لانه ما في تحديد سعر وكلام فاضي كتير ما فهمت منو اشي.طب يا سيدنا ما انت شايف الوضع في بلادنا قتل وارهاب وحروب وانفجارات وسحل على الهويه الطائفيه وعلى عدد الركعات .اعطينا او اصدرلنا فتوي توقف الاقتتال والسحل والتفحير وانو قتل المسلم لاخيه المسلم حرام او جارو المسيحي كمان حرام , وعبس غسلوا ايدكم لهيك مسائل فيها دمار وارهاب وقتل ما في فتاوي وعلى البوفي المفتوح وجهادالنكاح وضرب النساء وزواج صغيرات السن (يعني البدوفيل)في فتاوي. وعندكم فتوى جديدي طالعه من الفرن طازه(طازجه) يجوز الزواج عن طريق الانترنت ومواقع التواصل الاجتماعي بس مع وجود محرم , وفتوى تحريم ومنع مشاهدة فيلم الاطفال الكرتوني الابطال 99 لانه يجسد اطفال خارقين بيعملوا اعمال وبطولات الهيه وهذا حرام ىنه يمس الذات الالهيه.المسلسل يعرض على ام.بي.سي.3 في احلى من هيك فتاوي يا جماعه.
هاي مثل تاني بقولك:فجر الخبيرالمصري ع.حسام قنبله من العيار الثقيل ان برنامج الكومبيوتر الفيبر هو برنامج اسرائيلي.
طيب يا جماعه بلاش جملة فجر قنبله من العيار الثقيل في خبر صحافي ,الوحد منا اليوم نجمه خفيف وبخاف من خيالوا ضروري هاي فجر على خبر اعلامي. ما احنا مش ملحقين تفجيرات بهالوطن العربي فيها قتلى وشهداء كمان الاخبارالثقافيه والفنيه والاجتماعيه...هاي من جهه وبعدين ابن جيرانا اللي عمره 12 سنه وصارلو بلعب على الكومبيوتر سنتين بعرف انو برنامج الفيبر وحوالي 60 برنامج اخري منستعملها احنا العربان مصدرها اسرائيلي يعني حبكت على الفيبر.العم فيس بوك والاخ واتس اب وكتير من البرامج مصدرها اسرائيل شو العمل يعني نبطل نتواصل .
اليوم كلنا تحت المجهر وكلو على المكشوف من خلال .برامج التجسس على الناس صارو يعرفوا اذا كنا بالليل منقوم بواجبنا الوطني واذا كان بهديك(تلك) الليله في نجاح او ما(لا).
القياده الفلسطينيه والصحافي والاعلام صاروا زي الاله الحاسبه بس. كل يوم بعدو اكم وحده سكانيه بينبنوا هون وهناك في المستوطنات الاسرائيليه , بهددوا وبتوعدوا واسرائيل كل يوم بتقضم قطعه جديده من الاراضي وال شو في مفاوضات سريه ..جماعة حماس بهددوا وبتوعدوا بأسرائيل والله والله راح نعملكم طعم للسمك .مش عارف شو اقول رحم الله امرئ عرف قدر نفسه صدقوني ما بستهزء بس هالعنتريات لشو المواطن المسكين في غزه المحاصره بدفع الثمن.وهاي هم في حماس بطلبوا من المجتمعين في الكويت يا عمي صالحونا.بعدين معاكوا راحت البلاد والعباد وانتوا متخاصمين مع فتح أي استحو على دمكم انتو واياهم واصتلحوا عاد.
في اسرائيل قامي الدنيا وقاعدي على الوزير سلفان شالوم بدو يترشح لمنصب رئيس الدوله وكعادتهم السياسين الاسرائيلين في السنوات الاخيره موضوع التحرش الجنسي حاضر. في منو صح وفي منوغلط مجرد تناحرات سياسيه وهات حيكها واعرف شو الصح وشو الغلط.
بقولك انه وحدي تحرش فيها الوزير قبل 15 سنه وهالايام صحيت على الموضوع وبدهاش اياه يصير رئيس دوله. يعني جكر(نكايه).الموضوع لو كان صحيح او لا مش مهم لانو الوزير انحرق كرته وبعدين رئيس الدوله الاسبق كاتساف ضيف اليوم بالسجن على كمان موضوع تحرش.على الاقل في حد يحاسب .عندنا زعمائنا الراحلين مثل القذافي وغيروا ما كنوش يتحرشوا كانوا يغتصبوا ويقتلوا على طول وما في حد سائل والا يقدر يحاسب.
ختاما اعتذر من الكثير من القراء على مقالي الهبل والعبيط والساخر والفاضي وبلاش حد يعصر مخه او يستخلص العبر من مقالي هذا على انه يلمح على تفوق اسرائيل العلمي والتكنولوجي واحنا الشعوب العربيه مشغوله بالصرعات وغباء الفتاوي وتحكم تجار الدين بعقول الشعوب المسكينه ودفعهم الى الاقتتال والاقصاء والتغيب.
ويمكن لمحت لمسار القضيه الفلسطينيه وقضة التحرش الجنسي بشكل عام وبيناتنا كله مش مهم.
راح انهي مقالي هذا واشوف شو حرمنا المصون طابخه لانه زي ما انتو عارفين عند البطون تضيع العقول.وكمان راح استعد الليالي لمباراة فريق برشلونه مع فريق عالادالعونا.
انا واحد من الشعوب العربيه اللي همها بطنها والترفيه ويمكن السكس واترك للقارئ ترتيب الاولويات حسب ذوقه.
ملاحظه:يمكن البعض يتسائل لماذا لاتكتب بالفصحه؟ وهاي اجابتها جدا بسيطه :لانه تحصلي العلمي صف سادس ابتدائي مع دفش ودفع.
لماذا لا تكتب مواضيع جاده فيها جمل انشائيه على شعارات وبلاغه مع لطم وعويل وصراخ واستجداء؟ وهاي كمان بسيطه:لانه الكتاب الجادين والمحللين المبدعين اعدادهم كثيره وبحاول بس بحاول اصل لكل شرائح المجتمع وهدفي ان اوصل المعلومه بطريقه مرحه ساخره, وبعدين انا شخصيتي من النوعيه الساخره .
سأحاول مع كل نهاية مقال لاحقا كتابة ترجمه للمقال والتنويه على تلمحاتي شو رايكم يا حبايبي القراء الاعزاء.

#جان_نصار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل