شمعه .. بين العِشگ والوطن

محمد جلاب البديري

الحوار المتمدن-العدد: 4200 - 2013 / 8 / 30 - 10:08
المحور: الادب والفن
    

النص الأول
واطي اليجرحك ياعراق
....
المايحب ديرة هَله ماينفع بكل ديره
واليجرحك ياوطن ماعنده ذمّه وغِيره
روحي بذره ونابته بحب العراق
هذا دربي وماأبدله بغَيّره
....
أحلى شي شفته بحياتي آنه أبن دجله وفرات
وشمايمر بيّه الزمن بعده الگلب مامات
يادرب رِد الوكت وحْضن عُمرنه الفات
وخلّي العِشگ طاير ويل دنيه بجنح طيره
....
مشتاگ گلبي العشرتك ياحن محب مشتاگ
والعين تربي الشوفتك لوعة محب وشتاگ
ياهو اليشد هذا الجرح يجمعنه بعد فراگ
محتار عمري بغربته بين الحزن والحِيرَه
المايحب ديرة هَله ماينفع بكل ديره
واليجرحك ياوطن ماعنده ذمّه وغِيرَه

....
..
النص الثاني
عالناصريه سلّمولي
....
سلّمولي بحبهه مشدود بسحر
روحي بيهه شماعشت طول العُمر
موسنه وسنتين سنين أنتظر
سنين كل لحظه بسنه
شمابرد گلبي ألِسعنّه بجمر
....
سلّمولي أمن الگلب عالناصريه
سلّمولي عاشگ وجرحين بيّه
سلّمولي خضره روحي تصير إلي
من أشم هواي وي طيبة هلي
عندي ذكرى أبهل مدينه
أعز من روحي الحنينه
وياهه دگّات الگلب دگّن سويه
سلّمولي أمن الگلب عالناصريه
....
سلّمولي عُمري خلّصته أنتظار
روحي ذكرى ويل الزمن صارت أذكار
كل محطّه وياي غُربه
گلبي هام وضاع دربه
ودمع عيني أمن السفر كاتب أغنيه
سلّمولي أمن الگلب عالناصريه
....
سلّمولي الشوگ حزنان بسماي
روحي گطره بنص نهر وتريد ماي
عاشگ أيدَوِر أحبابه
والوطن مجروح بابه
صرت چلمه بلا حروف شلون بيّه
سلّمولي أمن الگلب عالناصريه

#محمد_جلاب_البديري (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات