جتّالي موش أبعيد من هاي الشكولات

محسن لفته الجنابي
كاتب عراقي مستقل
(Mohsen Aljanaby)

الحوار المتمدن-العدد: 4169 - 2013 / 7 / 30 - 04:13
المحور: كتابات ساخرة
    

حرامي البيت يعرف حرامي الوزارات و الفجّار موش أبعيد من هاي الشكولات
يومية نفس الربابة , أستنكار و أدانة و تبديل قيادات , صارت ماصخة الشغلة وتلعب سبع أرواح , اليوم مثل كل يوم من عشر سنين , تاه حساب المفخخات والعبوات والمؤتمرات المابيها ثمرة بس تبريرات
عصرية اليوم طلعت وأتورطت , مرّيت بسيطرة ورغم أنو عشرة من منتسبيها يعرفوني فتّشوني وطلبوا كل المستمكات , وكانوا يبحوشون ويتعذرون ومستحين , وكل سيارة تمر ينبشوها نبش و اللي يشكّون بيها يفصخوها و يشلعون حتى الكشنات .. يعني الجيش والشرطة قايمين بالواجب و ما مقصرين
وأتحدى أي واحد يكَدر يشيل مسدس ويفتر بنص بغداد , أذا مالزموه بأول سيطرة يلزموه بالثانية ويروح جلده للدباغ
ذاك اليوم أبو علي صاحبي خابرني على شغلة و من بين الكلام كَال : اليوم واحد من ربعكم (كان يقصد أحد سكان المنطقة التي أسكنها ) كان شايل مسدس وجابوه الجنود , ولزموا عنده صندوق قواطي مشروبات , رغم أنه شخصية معروفة لكنهم لم يستثنوه , وطبقوا عليه القانون و حبسوه , لما سألته عن المسدس وليش يحمله , كَال المسدس أثري أبو البكرة وما وياه طلقات , طبعا" أترجيته أن يطلق سراحه لأن الأمر بيده كونه عميد بالشرطه , أجابني وأنا زميله في الجامعة و صديقه المقرب بأنه سيذهب بنفسه لأكمال المحضر والتحقيق و أخذ بصماته و البحث في قاعده المعلومات , هاي كلها طبقوها بحذافيرها على واحد معروف ومزكى و حباب والحمد لله طلعوه بتالي الليل وألتمت عشيرته و عاشوا عيشة سعيدة وكان ضميري وضمير صويحبي مرتاح لأن تم التطبيق للقانون ..
شاهدنا على الجيش والشرطة أبتلوا بلوه و الشغلة أكبر من مجرم يلزموه
هذا اللي يحمل متفجرات و لاعب جولة وماخذ راحته أكيد واحد من أحتمالين
لو ملبّس سيارته جادر الأخفاء
لو شايل باج و يمر بطريق الطواريء ومحد يكَدر يحجي وياه
النوب القهر على هذا المكَرود صاحبي سعد حلبوص , خطيّه عنده بكالوريوس فيزياء ومن سنين يركض ورا التعيين , تاليها راح صار شرطي مرور وفوكَ الضيم طلع عليه مجلس تحقيقي وراح ينحبس ويروح بولة بشط لأن أنفجرت سيارة و حملوه المسؤولية لأن كان لازم واجب قريب عنها بحوالي سبع كيلومترات ... اليوم الجو يكهرب والهوى عذيبي و الطب العدلي للصبح مفتح يكتب شهادات .. صدك أهل العراق صحيح مساكين ,مدري صوجهم مدري صوج الوكت من عكّب النار صاروا رماد

#محسن_لفته_الجنابي (هاشتاغ)       Mohsen_Aljanaby#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل