تناشدني عليك الناس وأتحيّر شجاوبها

محسن لفته الجنابي
كاتب عراقي مستقل
(Mohsen Aljanaby)

الحوار المتمدن-العدد: 4065 - 2013 / 4 / 17 - 22:41
المحور: كتابات ساخرة
    

كلما أباوع على وضعنا أشوف الوادم مثل النعّامات ولحّد يزعل أخوان
صايرين مثل الفرارية بذاك الوكت من يطبّولهم الأنضباطيه بالتسفيرات
أترك الأرض وألزم زاويه وتشتغل الچلاليق و يصير المطافر ماله والي ويضرب الراس بالمداس , ومن يسفّروهم للجيش ينطون كم فلس للآمر رغم جيوبهم ماطابها درهم من زمن دقناووص و ينزلوهم مجازين و يهربون مرّة ثانية ويلزموهم الرفاق قسم يعدموهم مثل عماد ناجي و صالح جرو و ياخذون من أهلهم فلوس الطلقات وقسم لاخ حياتهم كفر نسميها حياة , واحدهم يصير عمره خمسين سنة وكولشي مامفتهم من الدنيا و نفس القوانه مستمرة بغير صورة نشوفها لحد الآن
شجاكم وأشجرى ليكم , أخرب بيتي على تاليكم , أشو بعده العقل بالراس
الله ينعل أبو الفقر , صحيح المفلس أخو الحرامي على كَولة عبد الكريم شبّو لما كان هارب ومنسق أموره ويضرب ركن بالشواكه بالثمانينات , هذا ما عنده مصرف باچر و ذاك يريد رويتب والغالبية لا بيت ولا سبيت , المهم يحصّل سبوبة و يبقى عايش مثل الهنود الحمر و يحسب أيام , كلها من عمره , عساه عمر اللاطال , شلون تاليها , نخلّص عمرنا مثل الحرامية , وصايرين نصّين , بزازين و فار , هذا فازعيله وذاك مهوسيله والخوش أوادم والغشمه كاتلهم الجوع , ذابيهم وره السدّة و فوك ضيم بنادم حاصدتهم المفخخات , بحظكم أبختكم هاي عيشة , مد أيدك للغيم أشوالك و الدفله ما تنطي نبكَ لو نبقى مكابليها طول العمر , كل واحد كان عنده كومة أحلام بكَد التكسيات والكيّات, تاليها أنكبست مثل البالات , لاحلم لا حامض حلو لاشربت والتمت علينا المصايب مثل حمودي الكَولچي بقطاع واحد مايعرف منين تجيه الطوبات
, الحرية أجتنا غفل وعارض جانبي لعلاج المصالح جابتها أمريكا مو لسواد عيونّا ومحّد متفضل بيها ولاتصدكَون بجماعة فرهودكو , لأن شغلتهم مثل سامكو وعلائكو , درب النصب و الكلاوات , ليش نعوفها لمجموعة طلعت ريحتها و صار فسادها مثل الشمس الحرّة بعد عشر سنوات , خلي نستفيد من مكسب القراط يا ديمو العراق و نلتم و نطلع بنتيجه و نبني بيتنا متكاتفين وأكو أشياء حلوة يسموها راحة بال و حياة سعيدة و ضمان مستقبل للأجيال , وعيب علينا نبقى ضامّين روسنا بالتراب .. خلّي نحس على أرواحنا ياجماعة الخير وأعذروني أذا غثّيت كم واحد مصلحچي و خلي نقرا الفاتحة على أرواح الشهداء العشرين ألف اللي ماتوا بالفاو وعساكم سالمين أخوان

#محسن_لفته_الجنابي (هاشتاغ)       Mohsen_Aljanaby#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل