الى/علي فهد و مثنى حميد

عبد الرضا حمد جاسم

الحوار المتمدن-العدد: 3823 - 2012 / 8 / 18 - 19:27
المحور: الارهاب, الحرب والسلام
    

بمناسبة الحرب مع ايران عام1980 والتمهيد لها ارضاً للسعوديه وامريكا بضرب الحزب الشيوعي العراقي عامي1978 ـ1979 وتهجير الاخوه الكورد الفيليه
مراجعـــــــــــــــــــــــــــــــــــــــــــــــــــــــــــــــة

بعد ما مرن سنين...الحلاوة والشقاوة
والقساوة والغباوة والعبث والشغب
لآبـــــــــــد...يوم تكَعد ولوراقك تْكَلَّبْ
أوراق...من العمر ما تنسي و مو كلها حلوه وتنحب
يذَّكرنك بالمضن...
شلون أنكَظن...
وشكَد شفت بيهن
مصايب وآلام أو محن
وحده منهن....أوصَلِتْ بيها للصَلُبْ
هوايه منهن ينمحن....
تتمنه
وتتمنه ما تنحسب
ومْنْ العمر تنشطب
إنكَضن...مكَالب أعله الجمر
جمـــــر...
فقدان صدكَان واخوان ومحب
جمر الهَجُرْ بالغصب
جمر السهر...
بخوف وهموم
وسمه عافتها نجوم
بالصحو ...بالسكر تتأمل أو تنتظر مضطر هرب
ماي ما تدري تِبَخَّرْ لو تْسَّرَبْ
تتعجب..!!!
هلكَد ظلم هب
وبتعجب وعجب...كَدامك بقوه سؤال أنتصب
شتعرف؟....
شتعرف عن الأحباب؟...وشصار بالحب؟
داهمهم خطر...لو هَمْ صابهم سهم الظلم
لو مثلك...مشاكل عله روسهم هذا الزمن صب
انفتحت أبواب
باب وره باب
عتاب وعذاب أو تعب
أنه السبب؟
لو أنه واحد... من هواية أسباب؟...
هن السبب
العتب بس عليه لوعلزمان أعتاب ...وعتب
الذنب بيه... لو بالزمان الجان مليان ذياب
الزمان...
ذب قساوة بحقد... لَوَّعَتْ كل كَلب
وعلراس ...داس
وعلظهر والجنب
مرت أسنين بعذاب
بين ...غْيابْ وسَرابْ
ونْسَدَتْ مثل منفتحت أبواب
جم رمضان مر وجم رجب
جم تموز مر وجم آب
بين موجود...حاضر لو غاب
لو عادوا الغياب*1
وعم الظلم... والمصايب صارت بلايه حساب
وغاب النغم ...ونكَطعت أوتار الرباب
وناي يصدح... والضجر لأنغامه صاب
ونشزت أصوات... انْجُبْرَتْ تغني...(أحنه مشينه للحرب)*2
وتمجد بقايد للقواطع علجثث جاب
وتهتف للبنادق والحراب
ورواح آلاف الشباب...
صعدت للسمه أسراب
أوراق...
وحده منهن هزت...
هيجت أول حب
وذَّكْرَتْ بحباب
وأخرى كَالت
مْحَّضرْ جواب... لو حَلَّتْ ساعة إعتاب
لو شْفتْ المحب بالدرب...وعاتبك
شمحظر جواب
أعركَت... ورتبكت... ورادت دموعك تصب
وكَلت:
لو يرجع الي مضه .. أخيط الكَلب علمحب
وسِدَّنْ عليه الباب
وأحبسه غصب
آأأأأأأخ... آخْ شكَد صعب
وكَبل ما تطفر الدمعة... شلت عينك علكتب
شلون غطاهه تراب
والبرد لوراقها صاب
.....................................................
صدى من بعيد نَبْ...
وجواك طَبْ....وبين عظاك دَبْ
(أنت شخص جذاب)...وسلوبك عذب
ومبين هواية قاري... وهواية تهتم بالكتب
وكالعادة...فلسفت وتمنطقت...
واشْرَحِتْ معنى القراية والكتابة والكتب
تْبَسَّمِتْ... تداري روحك حاولت
...وشلت راسك للسمه
لا غيوم ولا سحب... للنظر تحجب
وبصوت هادئ جاوبت
كل شي مر لو يمر...
بالكتب يتسجل وينكتب
وكَالوا الكتبوا قصايد...أقره وتعلم وحب
ألكتب تنشر محبه أو ود
تنشر افكار الفضيلة والعمل والجد
وتشرح كل نتيجة... وتحدد لكلشي سبب
وتفضح إلي كِذَبْ
بالكذب يدعي للعلم ...للحق وللشرف ينتسب
الكتب بيها صور
تفسر شلون اليحب
للمحب يتودد أو يتحبب أو ينجذب
الكتب بيها انكتب
صوت الحقيقة ...
مرات تعله عليه أصوات
بس أبد ما يوم أنعطب
وكل باطل شما طال عمره ينغلب
ينهدم...شما طال الزمان
ألي انبنه بالغش والتحايل والنصب
الكتب...تْدَّلي با الطريق شكَد حفر
أو وين موضع كل مطب
وكتبوا الكتاب النُجُبْ
الحب أقوى شي بالكون
ليش ...لنه يسري باللحم والدم والعظم والعصب
الكتب.... تعلم الأدب
...............................
تتذكر من جنت تحجي ..
حبيبك مهتم متعجب أو منجذب
وكًبل ما تبدي تنتحب
تاهت الساعات... والجلمات... والنبضات
بين موضع أو ساتر... وبين خندق أو مشجب
بين راجي وبين ناجي وبين حاجي* 3
وبين عالي وبين ناصي وبين غالي
نزلوا من الموجود
وانمسحوا من سجلات المكتب
شكثر دم غالي اعْلهَ خالي سال أو جره
وشكَد دمع حار صب
تغضب...
مره الغضب يصعد... براسك ويبن عله وجهك
ومره بالسكتة تغضب
عله روحك مره تلعب
ومره ساحه تصير بيها الناس تلعب
وعله غفله..
صوت القصف والعصف يقترب
لو مجروح...لو متمرغل بدمه...لو مجفي عله وجهه و امْكَّطَعْ إرب
زادت جروحك...
وظاكَت بصدرك روحك
مره تشرد للعقل للنصح تطلب
ومره ترجع للكَلب...تنتحب...تغضب ...تسب
وصارت الدنية بلا أصول
والحياة تكَالب مكَالب
بين غالب ونغلب
بين سالب وأنسلب
بين صالب وأنصلب
بين طالب ونطلب
بين حالب ونحلب
وبوسط هذا العجب
تهدئ أصوات القصف والضرب
حالة رعب...تريد واحد صلب
لو راد يبجي... الدمع حده الهدب
ولو راد يحجي... يحجي ساكت
وبالسكتة يكظم ضيمه والغَضبْ
يكَــــــوم
تايه ...يغطي ذك...يشيل هذا
والجثث صوابها يثير العجب
أجساد غظه..ووجوه حلوه
لنار الغبي صارت حطب
وما بعد الغضب والصخب
تستنتج... للقضية راس أو ذَنَبْ
والذَنِبْ...تحتار بيمن اتْذِبْ... بالراس لو بالذَنَبْ
أو همدت النار
بعد ما سعف النخل ...من النخل أنسلب
والتمر منها أنَّهبْ
والي هستوه شَبْ
من ثكَل المصيبة... ظهره أنحنه وتْحَّدبْ
.................................................................
جَّمَعِتْ أوراقك من جديد...تريد تعيد وتْكَلُبْ
بديت... هل مره من أبو غريب
وتذكرت...زكي وعميده...و رجاء و بديع... ومحمد وحقي وشعيب*4
وشلون فاركَت الحبيب
ومن الكاس الأول... دب بيك الدبيب
وبصوت عاصي( بين عالي وبين ناصي)
كَلت ..صِدَكْ من كَال: يبقى الحب ...لأول حبيب
وصعب كلش صعب
أول محب ...وأول حب
ينمسح أسمه من الذاكرة والكَلب
آدم...تبع حبه وخالف الرب
وعاف جنة خالقه وتْعَّذَبْ
عيسى...لجل السلم والعدل أتْعَّذَبْ وأنصلب
وأنت وهواية مثلك... أتعذَبْ وأنصلب ونْسِلَبْ
جمرات من عينك تصب ..
وتعترف بالذنب
متأخر أنت عترفت..
لا أنت من عفته اكْسَبِتْ...
و لا هو من عافك كِسَبْ
آدري...كل الي جره ...غَصُبْ
و هَمْ متأخر أنت اعرفت ...
ماكو قواعد ثابته للحب
لا فتح ...لا رفع ...لا ظم ...لا كسر...لا جر...لا سكون أو لا نصب
ومتأخر أنت عرفت
العنده حق بالكَلب... من حقه... لحقه يطلب
والحب أن أبتعد مشكله وتزداد من يقترب
زاد البعد والوكت مر..
وابْيَّضْ الشعر
ويَّبَسْ الجمار واللب
شمسوي أنه من ذنب...هالكثر أتعذب
تنتفض مرعوب....ومن الضعف تتكَلب
وتخاف من طيفك... ومن طيفه تهرب
وبكل ضعف وبكل جُبِنْ تنسحب
وتذب ملامك علعركَ والسكر
والشمس ما طلعت
وأوراق ما طكَت
وما ظللت... أشجار العنب
إلي جواهه كَعدت ويه المحب
مره تفتعل اسباب... ومرات تعجز تقدم سبب
وتشرد لشط الفرات
ومن وره جام...
كَازينو السلام
تشوف شلون ينساب...
بكل هدوء بعد مشوار التعب
ترغب ...تنزل لمايه وتْطُبْ
وتتخيل المنظر
يلاكَي الحبيبة دجله... وسوه يسوون شط العرب
وأرد أكَلك ...
أنت ما عنه استفسرت وسألت
...أهو حي لو مِيَّتْ
وما أله مره تعنيت...
وسويت العله الوادم وِجَبْ
وأرد أكَلك...
الحب لاتحده حدود...وبلاجواز يجوب
للشمال وللجنوب....وللشرق والغرب
وألي يدّور عن مصير الحب
لا يفتش بالنبع... خل يِفَتِشْ بالمصب
بالمصب...يلكَه النتيجة ...ويكتشف حال الحب
........................................................................................
*1.عادوا الغياب: اغنية للفنان فاضل عواد اخذت مكانتها في السبعينات. تقول(عادوا الغياب...والكَلب ينثر هلاهل)
*2.احنه مشينه للحرب: اغنية استعملت واذيعت بكثره خلال الحرب مع ايران تقول( احنه مشينه للحرب...عاشكَ يدافع عن ارض محبوبته).
*3.رموز اخترناها ليمثلوا تنوع الاسماء لمن سقط مظلوماً في الحرب العبثية مع ايران.
*4.++ زكي عزيز: خريج كلية الزراعة جامعة بغداد عام 1974 من أهالي الشطرة الكرام/ناصريه أستشهد في الحرب مع إيران. تحية لعائلته الكريمة ورفاقه واهالي موسكو الصغيرة الشطرة الكرام.
++عميده الخميسي: خريجة كلية الزراعة عام 1975 استشهدت في بشتشان و مُثِلَ بجسدها الطاهر. وهي من الأخوة والاخوات الصابئة الكرام فتحية لهم وتاريخهم العظيم
++رجاء مجيد(كوثر): من اهالي بهرز/خريجة كلية الزراعة عام1974 القي القبض عليها كما سمعت في باب المعظم عام 1979مع احدى الرفيقات ولم يعثر لها على اثر لليوم. تحية لأهالي بهرز الكرام كانت متزوجه من احد المناضلين الفلسطينيين(تحيه له اليوم حيث هو...)
++بديع المنذري: من اهالي الكاظمية/خريج كلية الزراعة عام1975/اعتقل عام 1979 وعُذِب ببشاعة واستشهد تحت التعذيب .تحية لعائلة المنذري المناضلة ولزوجته الصابرة ....تحيه لأخيه ورفيق دربه المناضل تحسين المنذري/مالمو ـ السويد
++محمد جوده راهي: من اهالي قلعة سكر/خريج المعهد الزراعي الفني/ مع اخيه حسن(خريج ثانوية الزراعة) اختطفا في بغداد عام 1995 (التاريخ غير دقيق قبل اشهر او بعد اشهر)ولم يعثر لهما على اثر لليوم وكان اخيهم الاصغر منهما حسين العامل في المنشاة العامة لمنتوجات الالبان/ابو غريب قد استشهد في الحرب مع ايران...واخيهم الكبير تم تسفيره الى ايران في اول حملة تسفير للأخوة الكرد الفيلية بعد ان اختطف من الشارع ليزج في سيارة التسفيرات دون علم اهلة لا ذنب له الا لأنه معلم شيوعي و فُقِدَ اثر ذلك اخوهم الصغير لأنه كان معه(ذهب به الى نجم الحلاق في قلعة سكر/الناصرية ليقص له شعر راسه ولم يعود الاثنان الاهل بعدما عرفوا ما جرى للكبير تصوروا ان الصغير معه والكبير كان يتصور ان اخيه الصغير عاد للبيت وكانت الفاجعة في لقاء الاخوين محمد وحسن بأخيهم الكبير في كردستان بعد احداث عام1991 حيث سالوا عن الصغير وسألهم عنه فلكم ان تتصوروا الموقف) وهم ابنا اخ الحاج عوده الراهي احد مالكي مقهى البرلمان في شارع الرشيد والذي سُفِر ايضا بعد ذلك الى ايران ومعه ابنه حسي من ذوي الاحتياجات الخاصة واذي مات على الحدود مع ايران.(قصه سنحكي تفاصيل اخرى عنها)
++حقي اسماعيل: خريج كلية الزراعة عام1974 من أهالي الأعظمية/الكم/ أختطفه النظام من مقر عمله في أبو غريب عام 1982ولم يعثر له على أثر وكانت له بنت اسمها عُلا و زوجته احدى زميلاتنا كانت حامل وقتها لتلد بعده بنته الثانية علما هو ابن صاحب محلات حقي لبيع الملابس في شارع الرشيد وهو الوحيد لذويه الذين ماتوا الماً عليه ولم يكن مرتبط سياسيا وانما كان صديق للاتحاد العام لطلبة العراق في كلية الزراعة/ابو غريب. تحية لزوجته الصابرة الزميلة الهام من اهالي الحلة الكرام.
++شعيب مجيد: من باب الشيخ خريج كلية الزراعة عام1974 أختطفه النظام عام1978 وخرج من المعتقل و بعد عدت أيام فارق الحياة بشكل مفاجئ...قيل انه انتحر لكن ذلك غير مقنع.

#عبد_الرضا_حمد_جاسم (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات