- اجيتك يا عراق -

سندس سالم النجار

الحوار المتمدن-العدد: 3758 - 2012 / 6 / 14 - 23:40
المحور: الادب والفن
    

"اجيتك يا عراق"

اجيتك يا عراق اجيتك
اجيتك حتى
اكضي بدرابينك
باكي عمري ،
واسكي الروح اليابسة
من ميك الحلو،
بلكت تعوضلي
ما فات من تعلولات
هلي وانصاري ..

واجيتك اليوم
شايلة على جتفي ،
شكد هموم
لكيتك عليل ومجلوم
وعيونك مليانة تعب ودموم
نهر يا بس شفتك
ولكيتك حسرة بعيون طفل
يا عيني من كلشي محروم ،
صحت ليش انت من دون الناس
رجالك صبح و مسا وليل
ينكتلون !!

او ليش اطفال العالم كلها
بالورد والريحان
ينامون ويكعدون
بس اطفالك
بالوحل يغسلون
اوبالدم يسبحون !!!

ـجنت نوبات ،
اقنع نفسي واكول
الفرح راح باجر ييجيني
وليل الدمع خلص راح ينزاح
وراح تضحكلي باكي سنيني
لكن لكيتني انام واصحى
عصافير ذجرك
تاكل وتاكل وتنكربعيوني ،
وأونْ وابجي
واكولن هلي وينكم !
احبابي وينكم!
شكد احتاجكم
الريحتْكم ضمّوني !
ولْكُم خلصوني
ترى آني بسجن
سبع نجوم آني
وعراقي هو اللي يعذبني
وهو الي سجاني ...

يا ليل حيلك علي !
وحيلك على كلبي الزغير
والله تعبت او
تهت او ضعت
طفلة آنا وين اليدليني !

بجيت هواي ترى !
هوااااااية بجيت
يايابا شكد بجيت
ومحد سمع بجيتي
وشكد شكيت
ومحد درى بشكيتي
ورحت اصرخ بعلو صوتي
ومحد درى بعلتي
حتى اعز اصحابي ...

جنت انام الليل واتخيل
هلي واحبابي
بلكت بيهم احلم
هاي الليلة يا ربي !
ما احس الا بذيجة الراشْدي
يصفعني جف الوهم
وجمرات ذيج الكعدات
من احلى نومة
تكعدْني وتدُّك بابي ...

آآآآخ يا غربتي آخ !
لو تدرين شكد جرحي غميج
وشكد مهمومة آني ،
وعيوني تصب بهالدمع
شوك وحنين ،،
الذيج الارض الطيبة و
جمرات زرُك تجويني
او كلبي يفيضن قهر
واكولن
وين اللي يداويني ! ...

او نوبات جنت مثل المجانين
اطلع للشوارع والدرابين
بلكت اهرب من شوكي شوية
ومن الحنين!

اتمشى بحدائق فيينا الحلوة
وذيج البساتين
ما اشوف الا بالذجرى طحتْ
او انغرْست برْكابي سجاجين
رديت ردود ردود
للبيت ، لكيتني منبجبحة
على ذاك السرير الحزين ....

اجيتكْ يا عراق ..
اجيتك يا عراق ..
اجيتك اطلب العفو منك
يا بعد عمري ،
اجيتك وكلبي مليااااااان
عفة وحنان ...

خليني اسولفلك قصتي واخباري
واسولفلك شلون كضت
ايامي واسفاري .. !
مثل عصفورة جنت آني
رغم جرحي
تعلمت اعلّيييي واطير
مرة اصيحن آخ
ومرة اتصبر بالصراخ ،
ويدفيني الشعر نوبة
ونوبة يخليني احن واشتاك
واصيح يا غربتي بيج
كضى العمر وراح
جمرات ودمع وفراك ...

حيلك علي يا شوك حيلك !
ويّا اسم العراق
شكد يحلو السهر
وشكد اتطيب السوالف
وجلسات السمر ،
ويظل القلم صاحْبي
بذاك الليل الطويييييل
حتى الفجر
بس كاعدة اغني واغني ،
بوذيات واكتب شعر
عن غيدة و حمد
وعن داخل ونعمة
وعفيفة خضر ...

سندس سالم النجار

#سندس_سالم_النجار (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل