المجانين الثلاثة (مسرحية نفسية قصيرة من الادب الشعبي العراقي)

علي عبد الرحيم صالح

الحوار المتمدن-العدد: 3647 - 2012 / 2 / 23 - 21:17
المحور: الفلسفة ,علم النفس , وعلم الاجتماع
    

الراوي : في أحد غرف مستشفى المجانين اجتمع ثلاثة مجانين لتقرير مصيرهم في الحياة ، وهنا دار بينهم حوار عن عالم الاصحاء المساكين :
- المجنون الاول : هذوله الصاحين شكد يحبونه كل ما نمشي بالشارع تلكيهم يعظمون من قدرنه ويحيونه ويحاولون يضحكونه ، فلهذا السبب نشوفهم بس يضحكون ويهوسون هيه هيه مخبل .
- المجنون الثاني : ديربالك من نظرية المؤامرة لا يدخل واحد من هذوله الصاحين ويغتالك بقوطيه لو بطابوكه (ويمسك رأسه ويكول أخ) .
- المجنون الثالث يقاطع الثاني : هذاك اليوم سمعت واحد من الصاحين شافني من بعيد واثناء ذلك سمعته يكول اني لو صاير مخبل مو احسلي ، فاني كلت بكلبي هيه شنو قابل الخبال لعبه ، شنو كل اليجي ويصير مخبل ، تره الخبال شيء عظيم ومقدس .
- المجنون الأول : بس مرات اني اتعب من الخبال وهذوله الصاحين متعبين شكد يتلوكون ويصيحون ورانه ، الخبال شيء متعب اضن راح اطلع روحي تقاعد من الخبال .
ويقاطع المجنون الثاني الأول
- المجنون الثاني : شبيك انته صاحي ارفع راسك انته مخبل .
اثناء ذلك يسأل المجنون الثالث تساؤل مهم : عود ليش البشر من الصاحين ما يصيرون كلهم مخابيل اشو الخبال يدعوا للسلام ، هم شفتلكم فد يوم مخبل حاول يسيطر على العالم لو سواله منظمة ارهابية وكام يفجر بالشارع ، أشو حتى المخبل لا يعرف يجذب ولا يبوك .
- ويرد عليه المجنون الأول : مو هذوله صاحين فانته اعذر الصاحي عقله براسه .
- بعد ذلك يثير المجنون الثالث تساؤل اخر : زين احنه ليش ما نحاول نسوي فد حزب وندعو فيه جميع المجانين ونحاول نسوي فد حزب ونحاول نحكم وبعدين نعالج الصاحين .
- ويرد عليه المجنونان (الأول والثاني) شنو انته تريدنه نصحة .
- وينصح المجنون الاول المجنون الثالث : دير بالك تصحه تره الخبال نعمه واليكره يصحه وماله رجعه .
- ويكمل المجنون الثاني الحديث : هو أكو أحله من الخبال لاتهم ولاتحب ولادوخ راسك والناس تحبك ودوم تضحكلك وتصيحلك بكل فخر هيه هيه مخبل . ومن حبهم تشوفهم يشمرون عليك كل شي (أخ راسي) .
- المجنون الاول : أي اني مرات هذوله الصاحين يضوجوني واتعصب عليهم فاكوم اصيحلهم هيه هيه صاحي يا دايخ يا ناسي يلكلك بلاوي . بس ارجع واستغفر الله واكول هذوله صاحين لازم ما نعذبهم لو نضوجهم لأن البيهم مكفيهم .
- وهنا يطرح المجنون الثاني تساؤل : زين احنه ليش ما نسوي مصحه للصاحين ونخبلهم بيه ونخلصهم من العذاب الي عايشين بي ويعيشون براحة .
- ويرد المجنون الثالث : بس وين نلكي مصحة تتسع لهذا العدد الكبير ، قابل همه واحد لو اثنين شو بالملايين.
- المجنون الاول : هذه المسألة اتركه للزمن عسى وان يتخبلون في المستقبل ، بس تره مرات احنه هم استغلاليين وبشعين .
- ويرد المجنونان : شلون وليش ؟؟!!
- ويجيب المجنون الأول : هسه اني مو عايشين بمملكتنه .
- ويجيب المجنونان : أي :
- المجنون الاول : مو مستغلين الصاحين شو يوكلونه ويشربونه ويغسلونه وينيمونه مقابل لا شيء .
- ويرد المجنون الثاني : دير بالك تره هذوله عدهم مؤامرة لان يردون يرجعونه صاحين ، صدك انتم هم تاخذون الدوه مالتهم الي ينطوكم اياه .
- ويرد المجنون الاول : شنو قابل أني هيج صاحي واخذ الدوه .
- المجنون الثالث : هذوله الصاحين والله مصيبه كلشي يردونه حته الخبال يردون ياخذونه من عدنه .
- ويقول المجنون الأول : اكلم شباب يالله صار الوكت متأخر خلي نكوم النام شنو ما تعبتوا يالله تصبحون على خبال واحلام مخربطة .
- ويرد المجنون وانته من أهله . وينامان في هدوء

#علي_عبد_الرحيم_صالح (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل