جهاد علاونه
الحوار المتمدن-العدد: 3547 - 2011 / 11 / 15 - 12:54
المحور:
كتابات ساخرة
(يدخل سعيد وأنيس وبرفقتهم صديق آخر على الشيخ المرابي في منزله,يفتح لهم ابن الشيخ غرفة الضيوف وينتظرون دقائق معدودة بإنتظار الشيخ..وهذا الشيخ قد دخل بلحيته الطويلة بعد أقل من خمس دقائق على انتظاره)
-الشيخ المرابي: أهلا وسهلا فيكوا.. وعليكم السلام ورحمة الله وبركاته.
-المجموعة:وعليكم السلام يا سيدنا الشيخ.
- الشيخ:ماشاء ألله اليوم الدنيا أمطرت..الله لا ينسى أحداً من فضله.
-أنيس:طبعاً..هذا بعد أن قلنا في هذه السنه خلص مستحيل الله يشتي علينا.
-المجموعة: طبعا كلامك أكيد.
-سعيد:خلينا مباشره ندخل مع الشيخ بالموضوع على طول وبدون مقدمات....شو رايكوا يا شباب؟.
-الشيخ: وهو كذلك...أأمروني يا شباب إبشو بقدر أساعدكوا,وأهلا وسهلا بيكوا,بيتكوا ومطرحكوا.
-أنيس:والله اسمعنا عنك يا شيخ إنك ابتعطي قروض اسلامية بدون فوائد,وهذا زلمتنا مزنوق ,ألله لا يزنق حدى..ومتضرر,يا ألله لا يضر حدى.
-الشيخ:صح, الاسلام لو يفهموه العالم صح فيه حل لكل مشاكل العالم وعلى رأسها الفقر...والله صحيح,أنا بعطي قروض وأأخذ مرابح معقوله,وأنا لستُ كالبنك,فالتعامل مع البنوك بالفوائد فيها ربا فاحش والله ورسوله نهانا عنه..وكلها حرام.
-المجموعه: طبعا أكيد يا شيخ.
-الشيخ:شو كم تريدون المبلغ.
-أنيس:1000دينار أردني عدا ونقدا.
الشيخ:أنا أأخذ ربحا على الألف دينار 300دينار أردني من خلال البيع والشراء وليس من خلال تسليم مبلغ مالي باليد,أن أعطيك باليد لا يمكن لأنه حرام ويصبح ربا...
-المجموعه:مش فاهمين عليك أعد علينا.
-الشيخ المرابي: سلامة فهمكوا..أنا لا أعطي المال باليد مباشرة..لالالالا...أنا أشتري لكم وأبيعكم ما تريدونه,وصاحب القرض يقوم بتقديم أو بتوقيع شكات بنكية لضمان السداد(التسديد).
-أنيس:في خلط وملط وكلام مش مفهوم.
-الشيخ: لا خلط ولا ملط...مثلاً إذا في حدى بده يبيع لأي حدى بقره أو ثلاجه وما معهوش المشتري ثمن الشيء اللي هو بده يشتريه أنا أتكفل بشراءه مع نسبة أرباح اسلاميه على النظام الاسلامي...وهذي كل القصه.
-المجموعة:ولكنك قلت أنك لا تأخذ ولا تأكل الربا.
-الشيخ: عفوا..يا إخوان(أحل الله البيع وحرم الربا) وأنا أبيعكم أو أشتري لكم أي شيء سواء تلفزيون أو غرفة نوم أو ثلاجة,وأكثر شيء أتعامل فيه هو تجارة البقر,يعني أشتري (بقرة) ومن ثم أبيعها لكم.
-المجموعه: كيف يعني احنا مش فاهمين عليك!!..بعدين ومن وين بدنا نلقى حدى يبيعنا البقره؟...ثم احنا لا نريد بقرة نحن نريد لصديقنا 1000 دينار.
-الشيخ المرابي:سلامة فهمكوا, أنا أشتري لكم مثلا أجهزة كهربائية بقيمة 1000دينار وأبيعها لكم على أقساط لمدة سنة ب1300دينار أردني,أو مثلا أشتري بقره..أو سياره..يعني أي شيء..وانتوا أحرار بينات بعضكم البعض.. وإذا كان التسديد لمدة عامين فأنا أرباحي ستصل إلى 600دينار على كل 1000 دينار...هو مين فيكوا اللي بده ياخذ مني قرض اسلامي, طبعا أنا بمشي على النظام الإسلامي(أحل الله البيع وحرم الربا).ً
-المجموعه:هذه النقطه افهمناها,بس اللي مش فاهمينه إنك هيك بتكون تاخذ وتقبض أكثر من البنوك الربوية بفائدة مركبة,يعتي بنك الاسكان أرحم منك.
-الشيخ: لا البنك اللي ابتحكوا عنه ربوي يقرض المال مباشرة ويأخذ فائدة مُركبه,أما أنا فنظامي والحمد لله نظام اسلامي,أنا لا أعطي مالا للمدين أنا أشتري له بضائع..
سعيد:أنا..أنا يا سيدنا الشيخ.
-الشيح المرابي: طيب انت شو مالك؟
-سعيد:أنا بدي قرض مالي.
-الشيخ المرابي:مالي؟ لا هيك بصير في حرام,ولكن إذا بدك بشتريلك لقره أو سياره..أو تلفزيزن أو بشكل عام أجهزه كهربائيه.
-سعيد:طيب ماشي.
-الشيخ المرابي:طيب شو بدك أشتريلك؟
-سعيد: بصراحه أنا بدي 1000دينار أردني كاش.
-الشيخ المرابي:لا دخيلك منشان ألله,لا اتوقعنيش معك بالحرام..أنا مثل ما قلتلكوا كلكوا بعطيش للمدين مصاري نقد.
-المجموعه:بس في ناس ابتعطي مصاري نقدي..ليش غير أنت؟.
-الشيخ المرابي:أنا على شان نظامي نظام اسلامي مثل البنك الاسلامي.
-أنيس:لأنا مش فاهم ولا أي شيء..ليش ما ابتعطيش المصاري للمدين مباشره.
-الشيخ المرابي:لا هذا كله حرام في حرام وأنا لا يمكن لي أن أأكل الحرام...أعوذ بالله.
(0يدخل ابن الشيخ وبيده صينيه عليها كاسات من الشاي الساخن ويقدمها كحفلة استقبال للضيوف,والشيخ يقول لهم:أشربوا أهلا وسهلا).
-المجموعة:شكرا.
-:أنيس:شو كنا انقول قبل الشاي؟.
-الشيخ المرابي:لو العالم يفهم الإسلام صح كان انحلت كل مشاكلنا.
-سعيد:يعني المهم والأهم شو,أيهما الآن أهم أن نفهم النظام الاسلامي صح أم أن نأخذ القرض لصاحبنا..أنا الآن بدي زبدة الكلام.
-الشيخ المرابي: أنا والله ما عندي إلك والكلام موجه للجميع أي كلام آخر إلا إللي اتفضلت ليكوا فيه..أنا لا يمكن أن أقبل بأن أأكل قرشا واحدا بالحرام..أنا لا يمكن أن أُطعم أولادي مالا حراما فيه ربا..إنت روح شوف حدى تشتري منه أي شيء وأنا أقوم بتسليم المبلغ له,وإذا هو بده يعطيك المبلغ بكون هو حر وهو الذي يدخل النار وليس أنا..أنا لايمكن أن أعطيك المبلغ بيدك..أنا بشتري وببيع.
-سعيد:طيب مين الآن عنده بقره يبيعني إياها وياخذ المبلغ منك ويرد يرجعه لي؟.
-الشيخ: روح شوف أي حدى..
-سعيد:والله هذه صعبه.
-الشيخ المرابي:لا صعبه ولا ما يحزنون...ولا فيها أي تعقيد..صاحبك هذا خليه يبيعك البقره اللي عنده.
-سعيد:مين صاحبي.
-الشيخ:صاحبك اللي معك(أنيس).
-أنيس:أنا ما عنديش بقره.
-الشيخ المرابي: على فرض..إلخ.
-أنيس:على فرض شو؟.!!.
-الشيخ المرابي:خلينا نفترض إنه عندك بقره, اموافق؟.
-أنيس:بس هذا كذب أنا في هيك حاله بصير كذاب.
-الشيخ المرابي:يا رجل بدي أساعد صاحبك..انت بس وافق وخلص.
- أنيس:على شو بدي أوافق؟.
- الشيخ المرابي:يا رجل على شان ما حداش يطوله إثم..خلينا نفترض إنه عندك بقره وثمنها ألف دينار,ماشي؟ فاهم؟.
-سعيد: أنا افهمت عليك.
-أنيس: والله أنا مش فاهم..أنا ما عنديش بقره..والشيخ بقول إنه بوكلش حرام فكيف بوكلش حرام وبنفس الوقت بده مني ومنه أن نكذب!.
-المجموعه:خلينا نفترض إنه إنت يا أنيس عندك بقره وبده سعيد يشتريها منك, إنت ابتقبض ثمنها وبترد ترجعه لسعيد, وسعيد بكتب على حاله شكات للشيخ, وبهيك حاله إنت ما ابتقعش عليك المسئوليه.
-أنيس: آه..صح..افهمت عليك يا سيدنا الشيخ.
-الشيخ المرابي:عال العال..هل تقبل أن تبيع البقره اللي عندك لصاحبك سعيد؟.
أنيس:بس وين البقره أنا ما عنديش بقره.
-الشيخ المرابي:يا رجل على فرض.
-أنيس: طبعا موافق.
-الشيخ المرابي: وانت يا أنيس قديش بدك فيها مصاري؟
-أنيس: بدي فيها 1000دينار.
-الشيخ المرابي:أنا بدفع ثمنها يا سعيد لصاحبك أنيس..يعني بشتريها منه ب1000دينار أردني عدا ونقداً وببيعها لك ب 1300دينار أردني بموجب شكات بنكية تكتبها لي..هل أنت موافق؟.
-سعيد: موافق.
-الشيخ المرابي:خلينا نقرأ سورة الفاتحه أولا على نية القبول.
-المجموعة: آمين.
-الشيخ المرابي: ولا الضالين....
#جهاد_علاونه (هاشتاغ)
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
