كاتم صوت (شعر شعبي عراقي)

فاهم إيدام

الحوار المتمدن-العدد: 3488 - 2011 / 9 / 16 - 09:28
المحور: الادب والفن
    

إلى قتلى كواتم الصوت في العراق



كاتم صوت

أريدَن ساحرات الكوت
يفتَنْ بيهه كَبل الفوت
موت الله انكِتب عالناس
لو مكتوب...( كاتمْ صوت )!!

*

تهنه ومالكَينه الحلْ
وارواح النه تتعَلعَلْ
جاوبنه : ليَمتهه اتسيل؟
بالدم إحنه نتوسّلْ
والدم خاير وتعبان
ضايع صاحبه مجندَلْ...

سحر هاروت لو ماروت
هـذه الإسمه....( كاتم صوت )؟؟

*

عَله دمْ سايل اربينه
وباجر بينه ماذينه
من هذه نردّد دوم
للماضي احنه حنّينه
ومن ننبش أساس الفات
ما يختِلِف ماضينه...

بسْ فَكّر تفض مَسكوت
مالك غير....( كاتم صوت)

*

وإذا بينه وَفي الناسه
ويكَوم ايكَول يا ساسه :
جذبكم نشّف النهران
موته وشمّت اخياسه،
طلقه تنام اله بصوته
وتنام الثانيه براسه...

وعِد راسه الهَمس بسكوت :
زاره بليل....( كاتم صوت)

*

شَعَبنه الشافه من طغيان
ما اظنّه طَره عله انسان
لا ألمان... أو طليان
لا يابان... وافريقان
كلْ ما راح دكتاتور
إجانه الأخَسْ من الجان...

يكتلْ ندري بالطاغوت
جنّه، وهسّه....( كاتم صوت )

*

واشجم دوب عله هالحال
زِلِم تتردّه عله يا مال؟
ميل الّي بضمايركم
مثل ذيل الجلب من مال
وكر اضباع مودوله
وعَلَيْ يشهَد الدمّ السال..

خلّو شعاركم تابوت
واعمامه..او.... (كاتم صوت ).!!

*****
13ـ 09 ـ 2011

#فاهم_إيدام (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل