شعر شعبي عراقي

فاهم إيدام

الحوار المتمدن-العدد: 3480 - 2011 / 9 / 8 - 08:45
المحور: الادب والفن
    

آنه وهالوكت

أنه سدّ الألـم من عندي مامـون * يتيـم الحال شيرافـك تظنّه
ومثل شتّ المعاني براس مجنون * هاي اطباع وكتي وهذه فنّه
***
آنه العله اجياده اتميل الايّام
وتلولـح بيه بـدروب الهِـبيّه
وآنه العله شـينَة غـيره ينلام
وزماني بكل ردَه مشبّه عليّه
إليّه الخالَف من احـظوظ ينسام
دنيه ومن تخالف هيّه هيّه
*
خَـفِتْ ثارات واذرَتهـن بلعـيون * وليه وغدت علمصيوب حنّه
غراب البين عشعش فوك المتون * يـطكّ الدهـر مـرّه وبيّه ثنّه
***
صحبتي من جذب، عَميه بوصط غاب
دارَت بيّه بـدوار المَـغـثّه
الوفه حجاية كَبل ومضيعه السباب
من سكَف الصدك شبعَت العثّه
ورَكض طلّاب صاروا بثر طلاّب
شبج إيده الوَكت بنفوس رثّه
*
قصور مغلّكَه وتمنع الماعون * وصرايف فاتحه ارواح اتّغنّه
وامواج اتّلاطـم من بشـر دون * الفرح بيهن غَرَك ويّست منّه
***
بجهل صايود اجيت آنه اكَنص الحوم
وكـشّـرلي السـبع ظنّيته باسـم
خراب اسنين تسمع نعكَة البوم
حسـرة عـين تمـييزالمواسـم
صفت روحي بظلام وتايهه تروم
وِنِس بَشباح ووضوح بطلاسم
*
بسواده العمر ظلّ وعشك هاللون * من دمّي الحزن جفّه يتحنّه
عليْ قسمة الباطل حدّت كَرون * الدمع لو صح يخايب سوّه مِنّه
***
أعـاند والنوايب قـيد سجّان
وشظلّي بعد غيرك يلعـناد
يعَلّي بسوره ويكثّر الكَضبان
وأعلّي الصبر من وشله عله رماد
كَطع خلكَي العَطَش والفَرج ما بان
لجن روحي خلك عاكَول بوهاد
*
أعف عفّة الحـرّ بوَكت مرهون * وأباري بحزني ونّه بأثر ونّه
وأحن حنّة محـبّ بكَلبه مطعون * سكـتّه جالمـعادن والهـه رنّه
***
حَلفت عله الألم تتروّض الروح
وعـرفت النَفس بالسكـته اتّداوه
وأريد الدمع يسبك صوت الينوح
وأريد الكَلب وي روحه ايتلاوه
شنهي البيـده علسجّـين مذبوح
مراح وتم ملك لولاد آوه....
*
أعاتب روحي مانه معاتب الكون * وأردّد دام سعدي ما تسنّه
خَـردله مازاد بالإسـلام حـنّون * ولا كَوم النصاره اسمعوا عنّه

#فاهم_إيدام (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل