كالو مات

محمد علي محيي الدين
كاتب وباحث

الحوار المتمدن-العدد: 3435 - 2011 / 7 / 23 - 13:49
المحور: الادب والفن
    

كالو مات...ما مات الذي بكل الوطن شاعت دواوينه
كالو مات...لسه جسور طينه تلوك مثل الحرز بيدينه
كالو مات ...هذه أسمه يضل مكتوب ما طول أحنه ظلينه
ويظل نبعة الشطره الما تجف للدوم لا شح مايها علينه
يمدنه بأروع الأفكار وبشعره نطرز أحله أغانينه
رحيم...وأذكر الأيام من خضر عشكنه بأول سنينه
وبنينه من الأمل آمال ياخذنه الهوه بيها ويودينه
وعله ريحة عشكنه الأولي ومركة كبل لمن تلاكينه
وكتبنه أشكد شعر شعبي وقره شعبي وعرف شنهي محاجينه
عرف منهو اليصاوغ بيه وياهو الوشر الذبحه سجاجينه
وعرف ياهو اليحبه ويسعه بس للناس وبلب الكلب سجل عناوينه
وعرف لن الشيوعي ما يداخي يوم وكل أهل الوطن حطهم نصب عينه
***
وذكرتك من ذكرت آذار... يوم الحزب غنينه
وسواليف العشك للي يحب تذكار...
وآنه أذكر سواليف النضال الطوحت بينه
يشاووش السلف يلبيك كل لزود لو جلت مرادينه
وينوماس العزيمه لو يصير ازماط وانته العزم تنطينه
ويظل اسمك شعار نشيله فوك الراس بيه كلنه تباهينه
ونظل نحلف وحكك والنضال وبيك... وما بينه الجذب فد يوم بيمينه
ونعزي الوحشتك كلمن مشه وما مال ..ولا خفت موازينه
ومضيف الديره ذاكه الما جفه دلاله عله ذله الذله تاذينه
وصريفتنه وهذاك الهور ...هور ايامنه الكلفه ومواضينه
وأيام الزرعنه بليلها أنسام الهوه كلوبات بالظلمة تدلينه
وادروب الغدت من كثر ما مريت سجه للصديج الجاي عانينه
أو وحشة نكرة السلمان البيها تخضر الواحات لو جينه
ولون نشدت علينه الكاع... لن كاع النجف تتنشد علينه
دكلها على الدرب كلها على ممشاي وانته زين تدرينه
الوطنه ما نبيعه ولو تبيع الغير بالدم أحنه شارينه
وأبونه الصاح فوك المشنقه ولاخاف..من الموت أكوه وفنه يلوينه
بالدم خط أسمنه وفوك كيعان الوطن مكتوبه أسامينه
وجزه عمر الحزب سبعين وبعده شبيب يناضل بسبعينه

محمد علي محيي الدين - بابل

#محمد_علي_محيي_الدين (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل