بح .. الفتنة الطائفية !!

حسن إسماعيل

الحوار المتمدن-العدد: 3243 - 2011 / 1 / 11 - 19:19
المحور: كتابات ساخرة
    

الإهداء .. إلي صاحب الفكرة
حسين نوح


أخيراً ستنتهي الفتنة الطائفية ..

قررنا نحن مجلس حكماء الأمة نتيجة الأحداث الطائفية الأليمة التي حلت بمصر الموكوسة
ونحن عنصري الأمة وجناحي كشف الغمة وقدمين لرجلين الحوما وعينين لدكهوما إنها تاهت ولقيناها ..
توصيات لترسيخ الوحدة الوطنية

قررنا الآتي :
- بناء مسجد في فناء الكاتدرائية
- كتابة أغاني عن الوحدة الوطنية والوحدة العربية يكون فيها أدان وجرس وحاجات من دي
- نعمل عملة ممكن تكون نص جنيه أو جنيه ونص عليه صليب وهلال
- زيادة عدد أمن الكنائس من تلاتة لأربعة ويكونوا اتنين مسيحين وواحد مسلم وواحد بهائي
- بث مباشر لقداس يوم الأحد زي خطبة يوم الجمعة على الهواء مباشرة جداً على طول
- تغيير المنتخب بحيث يضم خمسة مسلمين وخمسة مسيحيين والجون بهائي والحكم علماني
- وبالنسبة للأمن المركزي اللي هيواجه المظاهرات المسيحية يكونوا مسيحيين والمظاهرات بتاعت الإخوان الأمن المركزي يكونوا مسلمين .. وللحراك الوطني يكونوا من كفاية مطعمين بشباب من ستة ابريل ، ليه ؟ علشان الامن المسيحي لما يضرب المسيحيين يبقى منهم فيهم ، والإخوان والأمن المسلم يبقى منه فيه بلا شبهة فتنة ، والحراك الوطني الأمن يضرب براحته . إحنا همنا الوحدة الوطنية الوقتي
- عمل فيلم جامد قوي فيه بطل مسيحي وبطل مسلم وبطلتين واحدة بهائية وواحدة نوبية ، ومسلسلتين واحدة على تاريخ فتح مصر لعمرو ابن العاص ، والتمثلية التانية عن كيف دخلت المسيحية ومرقص الرسول مصر.
- انتخابات الرياسة الجاية يكون الرئيس مسلم ورئيس الوزراء مسيحي وبقية الوزراء يكونوا مشكل بس ياريت يقللوا الكفتة .
- وبالنسبة للجرايد القومية تكون صفحة وصفحة ، صفحة هلال وصفحة صليب والتالتة تتقسم تلت بهائي وتلت نوبي وتلت للعيال بتوع الميتال
- وبالنسبة للسلام على المسيحيين نعمل يوم ونسميه " السلام عليكم " ونجيب الفنان حكيم يغنيها وهو بيغني نحضن بعض مسلمين ومسيحيين في الشوارع على سهوا .
- ونعمل في رمضان دورات رمضانية ببن فرق مسلمة وفرق مسيحية ونتفق معاهم إنهم يتعادلوا علشان نطلع حبايب زي ما دخلنا . وندي كل فريق كاس عليه صليب وهلال ونجمة داوود نحطها بين قوسين وعلامة تعجب وجملة عاش " الهلال مع الصليب " أو " الدين لله والكاس للجميع " .
- وفي الصيام الكبير برضه نعمل كده
- وبالنسبة لترميم الحمامات في الكنايس ، صرف سراميك ومونة بسباكينهم ويكونوا مسيحيين وتدخل بعد الساعة اتنين الفجر يكونوا المسلمين ناموا
- حذف خانة الديانة من البطاقة وحط مكانها جملة : ( انت بتسأل ليه على ديني .. اللي يهمك انك تلاقيني ) .
- إلغاء كل الأسماء التي من شأنها أن تظهر معتقد صاحبها ودينه ودين أهله ، ووضع بدلاً منها أسماء محايدة متقدرش تقفش صاحبها متلبس في دينه مثلاً : تامر – هاني – ممدوح – لمياء – هناء .
- وهندي المسيحيين أجازة لوحدهم في عيد القيامة - معلش علشان احنا مش مؤمنين بيه لكن كلنا نأجز 7 يناير علشان كلنا مؤمنين بميلاد المسيح .
- بالنسبة للتعليم ، إلغاء كل المناهج الطائفية . وكل طفل يتعلم دينه في بيته متوجعوش دماغنا
- وبالنسبة للوظائف الحساسة اللى الأقباط مش داخلين فيها هندخلهم
- بالنسبه لأمن الدولة هنعمل مبنى في القاهرة الجديدة أو في مدينتي يكونوا الضباط فيه مسيحيين ويكونوا مسؤلين عن تجنيد مخبرين مسيحيين ومرشدين جدد في الكنايس والإجتماعات والسماح ليهم إنهم يعملوا مصلية مسيحية صغيرة في المبنى بمذبح صغير كده.
- ونقسم المحافظين المسيحيين على المحافظات على حسب العدد المسيحي والبهائي في المدن
ومش هننسى البهائيين ندلهم الميريلاند يجتمعوا كل شهر اللي هو تسعتاشر يوم بتاعهم ده يعملوا ضيافة فيه .
- وبالنسبة للفضائيات التحريضية تغلق لو حد هيشتم حد ، مش هيكون غير مسموح إلا بكل ما هو مشترك ، نقاط الإتفاق وليس الاختلاف . على سبيل المثال وليس النصر
على طريقة متقلش ايه اديتنا مصر قول هندي ايه لمصر
أخيرا أي حد عنده توصيات يبعتها على طول .

وخرجت الجماهير بعد سماع التوصيات ولقيت الحل النميس بعفوية إلى الشوارع مبتهجة .. نفس الفرح الذي ينتابنا بعد فوز المنتخب
وكانت تردد شعارات تقشعر لها الأبدان في لحظة الذروة ..

يا مصراوي يا شيبساوي .. متكلش لوحدك تزور تاني
ادي لأخوك المسلم حتة .. اقطم قطمة وخد له جاكتة
انت فاوضه وهو فأوضه .. لابسين جينس ونفس الموضه
نفس الجل ونفس الروج .. ركبين ترسو او في اللوج
بالأحضان يا مسيحي يا حلو .. برج العقرب برج الدلو
كل صليب يحضن فهلال .. لازم نوقف الزلزال
ادن واضرب جرس البرج .. خط العتبة وروح المرج
القسيس ويا الشيخ .. فشم نسيم بياكلوا فسيخ
قالوا مفتح قالوا كفيف .. كل واحد نص رغيف
مهما يحولوا يطفوا الشمس .. احنا بكرة واحنا الأمس
بيجمعنا الحزب الوطني .. هتروح منه فين يا مصري


وأخيراً وليس آخراً
كل كنيسة قصادها جامع .. اعرف إن المانح مانع

#حسن_إسماعيل (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل