قصيدة : نشيد البلطجية !؟

طاهر كمال عبده

الحوار المتمدن-العدد: 2998 - 2010 / 5 / 7 - 01:35
المحور: الادب والفن
    

بإسم اللى هربد هدوم الولايـا
وفعـّص وهبّش فى لحم الصبايـا
وبعتر كرامة شبيبة "كفاية"؟
نبارك نبايع لمد الولايــة

*****
وبإسم السنج والسيوف والمطاوى
فى حزب اللبط والظبط والبلاوى
بصوت كل مجرم : أجير ولاّ غاوى
"مسجل خطر" أو "سوابق" قرارى
وقاطع طريق فى الكفور والبرارى
مقفّل شوارع , مضلـّم حوارى
جميعهم رجالك يا حزب الحكومة
لأن المعارضة دى ظالمة وملومة
هتفضل كبيرنا .. وسرك فى بيرنا
وعقدك ما بيننا ده نافذ وسارى

*****
أمانة نكون تحت أمر السيادة
ونقبض عرقنا ما نطلب زيادة
نعرّى .. نشفّى .. نعوّر .. نفوّر
نبهدل .. نفركش .. نقفّل .. نزوّر
ولو أى عيّل تمادى وتهوّر
نفصص عظامه , يروّح مكوّر
ولو عينه بجحة ومفيش حد عاجبه
بقرن الغزال راح نطيّر حواجبه
ولو مات فى إيدنا , ما نحملشى ذنبه
مادام "مجدى بيه" مالى إيدنا بشهامته
ومعانا الحكومة , وحزب بسلامته
نعاهدك ما نضعف أمام الحريم
ولا نسيب معارض يروّح سليم
ده لو أى صايع يفكر بقلبه
تضيع الحكومة , ويوكسنا جنبه

*****
وتأمر , تأشر يا حزب الحكومة
ملاكمة .. مصارعة بخناجر وشومة
نزغّد .. نخرّب .. ونُلطش وننطح
نشوّه .. نخوّن .. نجرّس ونفضح
ولو بنت خارجة .. صحافية شاردة
نكسّر ضلوعها , وأعصابنا باردة

*****
مفيش أى قوة هتقدر تحوشنا
ده حبك علامة و"بشلة" ف وشوشنا
نشاور بصوبع !! نشاور بجزمة !؟
لا هنخاف جرايد , ولا الزوق له لازمة
تقول دول "ميليشيا" , تقول بلطجية
تقول "هتك عرض" وحقوق إنسانية
تصوّر ب"فيديــو" و ترفع قضية
ما دام الكبار و "الرتب" مرتضية
هنفضل وراكم .. نلسوع قفاكم
وتنزل عليكم إيدين طارشة قاضية
فعودوا لحدودكم يا عالم يا فاضية

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل