تبرعاتكم وتبرعاتكن المالية تحفظ استقلال الحوار المتمدن، فشاركونا في دعم استمرارية هذا الفضاء اليساري الحر

قصيدة : راشيل كورى

طاهر كمال عبده

الحوار المتمدن-العدد: 2967 - 2010 / 4 / 6 - 00:14
المحور: الادب والفن

إيه اللى خلا طفلة شابة ف حسنها
تسيب بلدها وحضن بيتها وأهلها
لما التراب فى وطن غريب يندهلها ؟
ليه سايبة فرشتها الجميلة
وجاية تحلم تحت أشجار الزتون ؟
ليه جاية تلمح فى العيون
شوق للحياة والحب والوطن الحنون ؟
ليه قاصدة أحلامنا الغريقة
وهيه حاضنة ف صدرها لب الحقيقة ؟
كام شابة غيرها عايشة بيننا فراشة هايمة فى الجناين
الورد بيداعب خدودها والغرام فى عيونها باين ؟
كان إختيارك يا "راشيل"
هوه اللى فكرنا بجراحنا وعجزنا جيل بعد جيل
وأتاريكى فى سكة نهارنا بتقطعى كام ألف ميل
ما كانتشى رحلة للسياحة أو مغامرة مدهشة,
ولا كان هروب من عشق فاشل أو معيشة يائسة
كان إختيارها ف يدهـــا
جاية وشايلة ف قلبهـــا
أحمل حواديت الطفولة وذكريات المدرسة
تحلم برايات العدالة والضمير اللى إتنســا
*****

إخترتى تبقى ف وســــطنا
ومشــيتى أبعد مننـا
شايلة همومك يا "رفــح" بين الجفون
وبتفدى أشجار الزتون
شايلة جــروح الكبرياء
شايلة الطمــوح المستحيل
وأهى واقفة بجسدها النحيــل
بتصـد زحف الجرافات
والجرافات ضد الشــجر
ضد البيوت , ضد البشــر
ضد البريق , ضد الخطــر
فى عيون "راشـيل"
مرعوبة من روحها الجريئة
من صدق تقاطيعها البريئة
مرعوبة من رمز الحقيقة ف وقفتك وسط الجموع
وأنا لما شوفتك يومها غلبتنى الدمـوع
شوفت الجنازيـر اللى غارزة بالمخالب فى الضلوع
وشاهدت طيـفك يا "يســوع"
والدم من نفس الجراح
الحــلم حلق فى البراح
والجســم فى الأرض إتهبـد
وقبل ما تغمض عيونها للأبـد
وقبل روح الحلم ما تودع شرايين الجسـد
لمحت بعينها قبل ما تحلّـق بعيــد
منقوش على كتل الحديـد
ويا أرقــام الحمولة
ع الجنازير المهولة والدروع الفولازية
تحت لوحات المرور المعدنيـة
" الصناعة أمريكيـة " !!

ترجم الموضوع إلى لغات أخرى - Translate the topic into other languages

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على: الفيسبوك التويتر اليوتيوب RSS الانستغرام لينكدإن تيلكرام بنترست تمبلر بلوكر فليبورد الموبايل