عمر عبد العزيز
الحوار المتمدن-العدد: 2877 - 2010 / 1 / 3 - 15:15
المحور:
الادب والفن
ليلة راس السنة طراطير هيصة و غُنا
باصِّين لدنيا تانية يمكن فيها الهَنا
و احنا في عز الشتا و الناس متكلفتة
خلق و ماليه الشوارع ماشية و متشعبطة
دول ناسنا الطيبين في الشارع مبدورين
مصر في البُؤ غنوة جوه الضلوع أنين
دي جمالها جمال و حِتة
و ده شايف نفسه جِتة
و ده ناسي غُلب ساكنه
و فرحان بالجاكتة
قلق في عيون صبية اتأخرت شوية
حُب و فاضحاه الملامح بتداريه بالكوفية
و نرجع للبيوت و نقفِّل البيبان
و ياخُدنا حضن كنبة
راحة من بعد زحمة و سكون بعد الجِنان
و بنلمح النتيجة خلص كل الورق
أيام عشناها فعلاً و لاَّ العُمر اتسرق
أتاري العمر ضايع حصاد هَم و مواجع
احلامنا بسرعة تاهت ما بين شاري و بايع
نتكوم في هدومنا و نتغطَّى بهمومنا
و نبص للسما
و نقول يا سميع يا عالم مش كفايانا خساير!!!
ضاقت و ان شالله تفرج تتعدل من يناير
#عمر_عبد_العزيز (هاشتاغ)
كيف تدعم-ين الحوار المتمدن واليسار والعلمانية
على الانترنت؟