العجوز و المطر

عمر عبد العزيز

الحوار المتمدن-العدد: 2850 - 2009 / 12 / 6 - 19:20
المحور: الادب والفن
    

إهداء إلى من هو باق ببقائي



في أوقات لما بتغيم بحس في قلبي أنا بعصرة
يدق حنين على بابه يصحِّي الماضي و الذكرى
ابص القاه حنين باكي لأيه بالضبط ماعرفش
و اهرب من دموعي و اخاف لفأي لحظة تمسكني


و الاقي نفسي باتسََّحب و اخبي نفسي في الوحدة
تقوم الوحدة تخدعني و تزحم راسي بالخيالات
تسرب لي قصاد عيني صور متاخدة من مسافات
وشوش حابّة وشوش كارهه صورأحياء صور أموات
و استسلم و قلبي يدق و احس بقرب ناس جاية
بتفرض نفسها عالكادر بقوة ولا باستحياء
تخلي الفرحة كسرة نفس تخلي حزننا استعلاء

خيال ماسك ريموت دايس يجرٍّي في عمرنا يرجََّع
و فجأة يثبٍّت الصورة على قزم بخيال مارد
بجسم هزيل و قلب كبير و فكرُه في الخَلا فارِد
مهاجر يشتغل بره و كل ما فيه بيتوجَّع
ده أب عجوز بيتعكِّز على ضعفه على صموده
و حرصه و حبه لعياله فرد ضهره صلب عوده
و حتى الوهن و الشيبة خلق منها مضاد القهر
ماهي دنيا ماهوش فيها تساوي طفل من غير ضهر

محارب في غروب عمره قلب شمس حياته شروق
محى ما بين صحته في شبابه و الشيخوخة أي فروق
عياله جددت دمه بنى لهم واحة من همه
مسك في الدنيا و اتشبث و خد من صغرهم قوة
و خلى السن و التجاعيد في شكله بره مش جوه


و تجري الصورة تتثبت على طفل معشش خوف
طفولته فيها ممحية و غير حبه لأبوه ما يشوف
و كون حلمه بيتسند على أيام رايحة مش جايه
ملاه الخوف و عاش قلقان لَحلمه ينتهي في ثانية
طفولته و عيشته و آماله بتتلخص في أب عجوز
و حلمه يبقى أمنية يحققها له لما يعوز
و كان باين من الصورة كلام نازِف بدون ما يحس
ده حارم نفسه مالبهجة و بيلبسنا أحسن لبس


و فجأة بتثبت الصورة على طفل الدموع ملياه
مغرقة وشه و كيانه كأنه بيبكي بمسامه
عيونه فيها صورة أب راسمها النني بدموعه
مسافر ليه و سايبه وحيد ليه واخد حلمه برجوعه

و تبتدي تبهت الصورة كأن دموعها بتقطَّر
تتوه الصورة تتشوش و الاقي راسي بتفقَّر
و امسح عيني لجل ما اشوف اتاري عيوني بتمطَّر

#عمر_عبد_العزيز (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل