عمر عبد العزيز
الحوار المتمدن-العدد: 2858 - 2009 / 12 / 14 - 15:51
المحور:
الادب والفن
أخرك تفضل تغني
إني بحبك يا مصر
حتى لو كنت منسي
ف خرابة ف ضهر قصر
تفضل تمدح ف نيلها
و الميه مش لاقيها
شمس و نسيم و خضرة
و الغربة هي ضلك
و مستخبي فيها
بتعاني طول تاريخك
فيض نيلك م الدموع
عايش طريد في بيتك
بتداري في غلبك
تمردك سجود
و ثورتك ركوع
عشان مسجون و قهرك
زنزانة بألف باب
فاكر نفسك هتهرب
لما اخترت انت سجنك
في دقن أو نقاب!!
بتقول راضي و قانع
دي قناعة ولا ذلة!!
بتوائم في أمورك
مع كل دين و ملة
سايبها على اللي خالقك
تقول حتى إن جهنم
أكيد فيه حتة ضلة!!
عشان كده هتفضل
عمرك كله مطاطي
ما انت مالكشي حق
غير واحد بس حصري
حقك انك تغني
تاريخي كله نصر
و إني بحبك يا مصر
و فخور بإني مصري
#عمر_عبد_العزيز (هاشتاغ)
كيف تدعم-ين الحوار المتمدن واليسار والعلمانية
على الانترنت؟