جهاد علاونه
الحوار المتمدن-العدد: 2761 - 2009 / 9 / 6 - 23:58
المحور:
كتابات ساخرة
أنا غيور جداً على الصناعات الأردنيه وخصوصاً الغسالات , وبغار عليهن من أي كلمه جارحه , بعدين اللي بده يشتري غساله صناعه أو تجميع أردني بنصحه إنه يتعامل معاها بحساسيه , على شان الغساله الأردنيه إللي اشتريتها أنا يا حرام حساسه جداً وبتمرض بسرعه , وما بتتحملش أن توضع في أي مكان , حتى التواليت اللي عندي مش متحمله تقعد فيه بالرغم من انه مفروش موكيت وأنا ما بمزحش في هذا الموضوع أنا فعلاً لتواليت تاعي مفروش موكيت من أحسن وأجود أنواع الموكيتات وبرغم كل ذلك أصاب غسالتي الصدأ.
هيك افهمني إنه عندي غساله (جينيرال ديلوكس أردنيه) أو تجميع أردني جديده وكاله ...طازج مثل اللحمه البلديه و عمرها تقريبا سنه واحده , يعني لسا يا ويلي عليها "بيبي " بعدها ما لحقت اتغير الميه إللي فيها, ومبارح اعملنالها عيد ميلاد سعيد هو طبعاً كان عيد ميلادها الأول والأخير بس مش عشانها (جينرال) لالالا, إحنا جماعه وطنيين وعنصريين وإقليميين, صدقوني إعملنالها عيد ميلاد بس على شانها أردنيه , وعاش الأردن والشعب الأردني , والغساله الأردنيه وألقيت أمامها خطاب طويل دعوت به كافة أفراد الشعب وفطاعات المجتمع إلى احترام الصناعه الأردنيه أو التجميعات الأردنيه والمراوح الأردنيه والسيديهات الأردنيه والتلفزيونات الأردنيه وأقسمتُ أمامها اليمين بأنني لن أخونها مع أي غساله أخرى لا مع الغساله المصريه ولا مع الغساله السوريه ولا مع الغساله اللبنانيه , وحلفتُ لها بذلك على الإنجيل والتوراه والقرآن , وقلتُ لها في بداية خطابي أننا انشاء الرب على العهد باقون وانا بيدي الأردنيه الكريمه والجليله وقفت أمامها إجلالاً وإكباراً وأديت لها التحيه في عيد ميلاد ها الأول والأخير, وأشعلتُ لها من قلبي شمعه كبيره .
و(ماما) عندها غسالة يابانيه اسمها (توشيبا) عمرها اكثر بكثير اكثير من الأردنيه وبحياتنا ما إعملنالها أي عيد ميلاد , يعني مش زي الغساله الأردنيه , الغساله الأردنيه ...يعني من أول يوم اشتريناها جبنالها (مغنطيس) عشان صاحب المحل اللي باعنا إياها حلف يمين بدينه وصلاته وصيامه إنه إطارها الخارجي ابلاستك , وعشان نكتشف كذبه جبنالها مغنطيس وهي من جهتها حضنته والتصقت فيه من حرارة الروح وكأنه ابنها وكان ضايع وبعدين لقته, وثاني يوم بس شغلتها زوجتي -ولا إتشغلها اليوم- عشان تغسل فيها كان صوتها قوي جداً (طقطقه) عاليه وكأنها جرافه في البيت أو كمبريسر حفريات, والغريب انها صارت تمشي من محلها وكانها مروحه بدها إتهوّي علينا وصرت وانا واقف أمامها أقول : شو هاظا أنا مشتري غساله ولاّ مروحه , وصارت ماما تحكيلي يقطعك يا أ[و علي ما أخف دمك روح اتصل بالشركه فاتصلنا بالمكتب اللي اشتريناها منه فتنصل وخلق الأعذار من هاي المشكله وأعطانا رقم تلفون وكالتها في عمان , وطبعاً ما قصروش أصحاب الوكاله أجونا بعد شهرين أو ثلاثة أشهروركبولها (بوكسات) , وبعد كمان شهرين صار الصدأ يظهر على جوانبها اتصلنا بالمكتب اللي اشتريناها منّه وكعادته طبعاً انسحب انسحاب نهائي وطعن بالصناعه المحليه وقال الأردنيه مش إكويسه ,مندوب الشركه ضحك علينا, المندوبين بضحكوا علينا , المندوبين بنصبوا علينا , بس أنا طبعاً أخذتني الحميه الوطنيه وقلت :لا وألف لاء, إنها بلدي وصناعتي سأثبت أنها جيدة وأحضرت لها علبة دهانات ومن هظاك اليوم حتى اليوم وأنا كل شهر تقريباً بدهنها ومره من ذات المرات حكيت مع المكتب اللي اشتريناها منه :
-ألو...ألو.
-ألوووو, ألو نعم.
-نعم ألوه.
-أيوه مين معي؟
- شو نعم؟... ألله عليك.. انا المواطن اللي اشترى من عندكم قبل أربع شهور غساله (جينيرال ديلوكس ) أردنيه مع نشافه .
آه..ماشي..أيوه ...إمليح..إشلونها ؟ اشلون الغساله؟
- والله هي الحمدُ لله مليحه إكثير مش بس إكثير , لالالا إكثير إكثير وبتسلم عليكوا , والله ما هو ناقصها غير شوفتكوا.
- شو مالها ؟
-لا ولا إشي بس بدها إدهان .
-ليش إنت وين حاطها ؟
-حاطها عندي بالدار , ومحافظ عليها والله إكثير إكثير يعني بعتبرها والله زيها زي خواتي وبناتي وعرضي وشرفي ..وما بسمحلهاش تطلع من باب الدار عشان عيب البنت تطلع من باب دار أبوها , ولا بسمحلها تفتح الشباك على شان الهوى ما يلفحهاش , ولا بسمحلها تقعد بالشمس على شان إصابات الشمس وانت مش غشيم ..الله وكيلك ما أنا امقصر معاها , كلشي بدها إياه بجيبه وكلشي بدها إياه بعمله إلها , وأحسن الكهربجيته اللي بالبلد جبتهم الها وشافوها واتعرفوا عليها وعرفوها إنها تجميع اردني .
-
-لا يا أخي إدهانها ما بحت عنها ولا بصيبها الصدأ إلا إذا كانت بالشمس وبالهوى برى , أو حمامك في رطوبه زايده .
-شو برى ؟ يا زلمه بقلك ما بسمحلهاش تطلع برى نهائياً ,شو هي بتفكرها وحده هامله هاي أردنيه أصيله يا حبيبي شو هو في أردنيه هامله؟ أما هذيك غسالة أمي اليابانيه هامله فعلاً هذيك هامله إبتطلع وبتروح عند الجيران بس ابترجع عال العال , طيب لو افترضنا طلعت برى ؟! طيب ما هاي هي غسالة أمي اليابانيه , مثل ما حكيتلك هامله طول النهار عند الجيران ومع ذلك محافظه على شرفها وكانت بالصيف وبالشتا برى وما زالت وتعال شوفها , بعدها محافظه على شرفها , يعني على شانها يابانيه دايماً داشره برى؟ زيها زي البنات اليابانيات؟ والغساله تاعتكوا على شانها أردنيه لازم اتكون زي البنات الأردنيات ؟ ما تطلعش من باب الدار , يا رجل بقلك عمرها ما طلعت وبعدين لويش بدي أطلعها برى الدار ؟ روح طل على غسالة أمي اليابانيه , إذا بتشوفها وبتشوف غسالتي الأردنيه اللي عمرها سنه بتصير اتقول إنها غسالتي الأردنيه عمرها 25 سنه واليابانيه عمرها سنه يعني بالعكس, بعدها اليابانيه على العهد ومحافظه عليه وعلى الشرف .
والصحيح الدلال اكثير اكثير مش مليح للصناعات الأردنيه, وغسالة ماما مش إمدللّه طبعاً على شانها يابانيه , يعني لو كانت اردنيه أو سعوديه أو مصريه غير اندللها , بعدين شو بدنا فيها اندللها ؟ شو بدنا فيها....خلي اليابانيين يعملولها عيد ميلاد , انا وزوجتي يا دوب انلحق دلال على الصناعات الأردنيه ,كمان في عندنا مكوى ومروحه أردنيات هذول كمان اشويه بصير بدهن عيد ميلاد, يعني بالعربي الفصيح (جحا أولى ابلحم ثوره) و (كلمن إيحاحي لجاجاته).
طبعاً غسالة ماما عمرها تقريبا 25 سنه على حسب أقوال أمي فمنذ أكثر من 10 سنوات وانا اسمع ماما ابتحكي واتقول غسالتي عمرها 25 سنه , بس بالضبط قديش عمرها ما بدري وبذكر إنها رأيت لأول مره منزلنا سنة1985م, وبصراحه حاولت أن أنشأ بيني وبينها علاقة حب مميزه وأن أصبح مجذوباً لها بس هي طبعاً رفضت رفض قاطع على شان علاقة الحب إللي بينها وبين (ماما) مميزه .
وغسالة ماما كانت تطلع من باب الدار , يعني أقللكوا إنها ما كانتش تطلع؟ لا والله ما بقول , وليش أقول ما هو الكذب أصلاً حرام , كانت غسالة ماما تطلع من باب الدار وكانت اتروح عند الجيران تغسللهم ملابسهم وحراماتهم وتغيب يوم ويومين وثلاثه وترجع على الدار زي الحصان , وعمرها ما إدللت , ولا كمان عمرنا جبنالها أي كهربجي أو مُصلح ورميناها وهي مازالت بصحه جيده وعال العال ,يعني احنا اللي خناها وخنّا العهد معاها عشان نقطع عهد مع الأردنيه, حتى عشان أكون صادق بس مره وحده غيرنالها إقشاط النشّافه بس , ومره ثانيه فراشة المروحه كربجت وما قبلتش تمشي ففكيناها ووجدنا تحته عمله نقديه اردنيه وليست يابانيه يعني لوكانت يابانيه بجوز انها مات إتكربجش..
أما غسالتي الهامله , كل الكهربجيه ركبوها عشانها وحده هامله مع مين مات أجا من الكهربجيه إبتمشي وبتروح معه , حتى مع الصبيان الصنايعيه بس اتشوف واحد منهم واقف برى معاه (مفك) ابتركض عليه وبتلاقيه إبزغروده , سبعها ما أهملها !.
غسالتي الأردنيه جمّعوها عمّال وفنيون مسلمون يخافون الله ولا يحبون الغش والكذب والنفاق والنميمه والزنا الحرام , وباعني إياها صاحب محل بيده مسبحه أطول مني , وغسالة ماما صنعوها الكفار والمشركين واليُعاذّ بالله , الذين يشربون الخمرة ولا يسبحون باسم الله.
#جهاد_علاونه (هاشتاغ)
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
