متوسط المتوسط

محمد علي ثابت

الحوار المتمدن-العدد: 2500 - 2008 / 12 / 19 - 04:39
المحور: الادب والفن
    

السيد متوسط بيصحى كل يوم مفرفش
يفطر ويشرب شايّه، وأوام ينزل يدردش
ع القهوة وف التاكسي، وف شغله وع الناصية
وجمهوره من كلامه بيتكيّف ويحشش

السيد متوسط بيقول أحلى كلام
في نظرية المؤامرة وتفسير الأحلام
وعن سر الأسرار اللي وقع في الحملة
من جيب بونابرتة جنب الحمّام

ويفسّر في الدين وبيفتي المستفتي
ويودّي المتودّي ويأتّي المتأتّي
ونظرياته الكروية لو كنا سمعناها
كان زماننا بنغلب البرازيل دلوقتي

وله نظرة سياسية عميقة المدلول
ومع انه ميعرفش خطوط عرض من طول
وميعرفش عن الخريطة غير خرط الملوخية
إلا إنه في الجغرافيا بيحكّي وبيقول

وبيكتب في الصحافة ويطلع في التليفزيون
وصورته في الشارع بتنوّر بنيون
وف الانتخابات بينزل ويفوز باكتساح
ويقضّي الدورة بيصقف وبيهتف: موافقون

ويقابل كمان أفواج سياحية
ويشرح للعامة الثقافات الأجنبية
ويرطن كتير عن ظاهرة العولمة
وعن علاقتها بالراقصة زيزي اللولبية

وله في الجنس اللطيف نظرته الثاقبة
ودايماً يحكّي عن مغامراته الملهلبة
ويقول إزاي بيوقّع المرأة في شباكه
مهما كانت شايفة نفسها ومُتعبة

ومن آرائه العظيمة إن القراية مش مهمة
وإن الثقافة تتاخد م الاحتكاك باللمّة
وطبعا إن العلم في الراس مش ف الكرّاس
ودليله في المرور تخليص دكتور من أزمة

ويروّح على بيته آخر النهار منتشي
مش مهم إذا كان بيكَرْوِت شغله ويرتشي
المهم عنده إنه أكبر أبو العريف
ودراويشه بتشهدله بإنه مش بعضشي

متوسط أفندي بقى ساكن كل شارع
بيحكم بالمظاهر وبيخطب في الجوامع
أحكيلكم تاني عنه واللا انتوا بتعرفوه؟
واللا خلاص زهقتم من تقليب المواجع؟

#محمد_علي_ثابت (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل