شكراً يا سمرا

محمد علي ثابت

الحوار المتمدن-العدد: 2470 - 2008 / 11 / 19 - 07:19
المحور: الادب والفن
    

بحبك وأحب إني منسوب إليكي
وبعشق رتوشك وكُحلة عينيكي
وناسك وعيلتك وأهلك حبايبي
وعلى الشدايد إيديا ف إيديكي

مش يوم ما اتولدنا انكتبنا لبعض؟
وقالوا مفيش بيننا بين أو بُعد؟
وربطوني بيكي وربطوكي بيا
ومع كل شمس خلقنا إحنا عهد؟

ولما خطبتك أنا بشكل رسمي
وزيِّن صباعك خاتم باسمي
حلفت إن عمري ما أخونك ف يوم
وحلفتي إن عمرك ما حتكوني ألمي

حبيبتي الجميلة، مالك؟ فيه إيه؟
بقيتي بتقسي وظالماني ليه؟
ويوم ما تلاقيني في أزمة وببكي
بشوفني في حريق بتصبي زيت عليه

ولما أتعثر أو أفشل في يوم
تصدمني سخريتك وقسوتك في اللوم
ولو يوم نجحت، بلاقي إن برضه
سعادتك مصطنعة وراسمة هموم

حبيبتي، بقيت حاسس إني غريب معاكي
وبقى حقي أفكر إني أعيش مع سواكي
وبقى سهل جداً إني أفكر أغيب
ولا أشرب من إيدك ولا أتنفس هواكي

عمري ما فكرت إن ده ممكن يكون
لا خاتمي في إيدك ولا اشتياقك في العيون
وإزاي قافلة في وشي كل باب
وباب معاشرتك مفتوح على كل لون؟

حبيبتي وسبب كل همي وأسايا
مش جايلك أعاتب ولا أقوللك هوايا
إزاي تبيعيه، وبقية كلام الأغاني
أنا جاي بس أقوللك: منتيش فارقة معايا

تكوني ليا أو تكوني لغيري
تزيدي شجوني وأوجاع ضميري
أو تحني عليا في يوم بابتسامة
اعملي ما بدالك في يومي ومصيري

تهينيني وأنا جنبك في شارعك بعيش
وبرَّاكي تقسي عليا اللي ميساويش
وتشوفي إني عالة عليكي ورقم
في معادلة ليها وزن بس وحدي مليش

مبقتش أستغرب منك أي حاجة
صحيح إنتي ليا وملكي وكل حاجة
وصحيح إني بعشق هواكي العليل
بس عشقي لكيانك عاوجني عواجة

وفي النهاية أشكرك على كل شيء
ومضمنش إيه قراري اللي في الطريق
ممكن أسيبك وأعيش مع واحدة تانية
وممكن أعشش ليوم ما ينزاح الضيق

#محمد_علي_ثابت (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل