رسائل وتعليقات على مقالات لزياد الرحباني في جريدة الأخبار اللبنانية

سامي العباس

الحوار المتمدن-العدد: 2376 - 2008 / 8 / 17 - 06:26
المحور: مواضيع وابحاث سياسية
    

1- لزياد الرحباني
أنكل لقلك أنكل ..ضّحكنا ..فشر البلية ما يضحك ( متل ما بيقول سيبويه وتلاميزو )
خلينا نشبع ضحك قبل ما طوفان الحمر ني يجرفنا معو
الله وكيلك ما في شي بينقزنا الا سفينة نوح ..بس وينا يا شحاري؟!!
يخربيتك ما أطيب مجدرة الفكر السياسي اللي بتطبخا مرتين بالأسبوع ..اطبخا يوميي دخيلك..كتّر جنبا المخلل
بلكي هالجماهير من المحيط للخليج بيعتدل مزاجا وبتشلح اللي برقبتا..ويلي ما تعملها ويلي ..بحضي تيطوف المتوسط.وتغرق اوربا بحمرنتنا ..الي ي ي ي ي ما حلاها ..ماركس وانجلز وهيغل وفرويد وضراب السخن لينين.. عم يخبطوا .. دايرين عا كداني فايشي يتمسكوا فيا .هيدي ( المنقذ من الضلال) .خليهن يظبطوا تشوف..
ولك نحنا غّرقنا قبل منن ابن رشد ..بحضي بديني ولا مية "منقذ من الضلال" بينقزن ..إي لجهنم !!
سامي العباس –كاتب سوري
2- الى زياد
شوهيدا ياأبو عاصي ! وجعتني إيدي وأنا دق عالخشب كلما قريتلك ! يا خيي روق علينا شوي وخللي نتفه لغيرك من اولاد الكار ..كار الكلاموجيا قصدي ..ما عاد فينا نقرالن الله وكيلك ..لازم يكتبولك شي كتيبة تتحل عن ضهرن وترجع للموسيقا ..صحيح . عزكر الموسيقا ..بتعرف ؟ طريقتك بالكتابي وبالتأليف الموسيقي فرد شكل ؟! قللي ليش؟ لأنو التنتين صادرتين عن موقف عقائدي واحد. ملخصو ( لأيري... ). مو الوضع بالمنطقة لالا للوضع البشري ..صححلي اذا كنت غلطان ..
سامي العباس
3- أستاذ زياد إطلاع من ها لبواب استر لك
اقتراحك للخروج من هالمزنق اللي حطيت حالك فيه ( تحويل الموضوع للدكتور جورج قرم ).. فيه كل الحكمة ..صديقنا ماركس رغم أنه ذرب اللسان و لسانه بفرشوختين ومتبرى منوكما يقول المصاروي , وإذا بدو يسخر من شي بيضرب عالكرسوح , بس لما كتب رأس المال صار قلمه ما بيضحك لرغيف السخن..
الأنكله بتصلح لانتاج موقف نقدي من نص ..بس إنّا تنتج نص , هيدا بعيد عن شواربها..
لذلك يا صديقي مثل مابيقول المثل : قعود أعوج وحكي عدل.. قوص عالدريئة ولا تكون دريئة..حشر الرفيق ماركس لكل أنواع الشرور في قمقم الملكية الخاصة ,مو أكتر من تنويع عالأديان السماوية اللي علقتا برقبة أبليس اللعين ..لذلك لا فرق (نوعي ) بين لحية ماركس ولحى البابوات والمشايخ والحاخات "معتمدي الأديان السماوية التلاتي عالأرض "..كلها مستنبتة من دقن وحدي.. والله أعلم..

سامي العباس -معجب


4- الرفيق زيادالرحباني
اسمح لي أولا أن
أخاطبك بهذا اللقب رغم الرضوض التي تعرض لها هذا الأخير في الحقبة السوفييتية..
وثانيا أن أثني على دعوتك إلى تلاقي..ولكن لدي بعض المخاوف من طراز مثلا :

- ما ذا لو جن وفعلها الرفيق ( الياس عطا لله ) وقرر فك شراكته مع سمير جعجع والتحق بوحدة الشيوعيين تحت قيادتكم ؟!!
إن فعلها وهو سيفعلها والله أعلم أرجو أن تخضعوه لدورة تأهيل عند الرفيق قدري جميل قطب الرحى في وحدة الشيوعيين السوريين ..أرجوكم لا تتساهلوا معه ..

- ما ذا لو قررالإشتراكي( المقاطعجي)- والتعبير لمسعود ضاهر - وليد بيك جان بولا رد التراجع عن عمله المؤقت كزبال في نيويورك خوفا من أن يظل مؤقتا , والعودة الىمرابع طفولته اليسارية : جنديا في الجيش الأحمر ؟!!
لاريب أنها ستكون لحظة ميلو درامية تختلط فيها على نحو استثنائي الابتسامات بالدموع ويصعب فيها على (حسن السبع ) تمريقها بلا ابتسامة ولو مغتصبة

- ما ذا لو قرر الفريق الآخر أن يسرب الى صفوفكم بعضا من ألغامه, كما فعل السوريون بالمأسوف على وسامته الجرمانية المحقق الدولي دي تلف ميليس ؟؟ كيف ستقلع عربتكم اليسارية ببنزين من طراز -14 – اوكتان مبخوخ ببارفان ليبرالي؟؟لالا يارفيق ..وضعكم سيكون أصعب بكثير من طلعتكم بالبوسطة عا تنورين .. سيتسرب الى صفوفكم أبشع بكثير من ( اللي بشعا مرتو ) وما رح يكون بالكم فاضي متل ركاب تنورين ..

حتى يكون بالكم فاضي يا .. صديقي شكلو شي حزب أو رابطة او اتحاد للأوادم من كل الطوائف الدينية والعقائد السياسية..لأن المشكلة لم تعد تتسع لكل هذا الترف النظري .. البلد والمنطقة زاحطة الى المجهول ..
أخوات الشليته ( المو أوادم ) موزعين بعضهم على كل الأحزاب في السلطة والمعارضة عندكم وفي غير مكان لا تقلي ليش ..أنا مبسوط وآخد قرفة وعما يتجلالي ولا تقاطعني ..
أنا مسلم وما بشرب إلا بمصيبة ..بدك أكبر من هيك ؟ مات جوزيف سماحة, ونحنا عم نزحط ..


28-2-2007
5- آمين
ولكن شو بدك تعمل ياأستاذ زياد إذا ها الأخو الشليته التاريخ ما عميعرض علينا إلا الخوازيق ..وما عما ينوع الله وكيلك ..كلا من عيار (8-آذار أو 14_شباط ) و يامدهوني بالمقدس يا معجوقه بالوطنية .كلو حتى ما نقول آخ ..لا والأنكا من هيك مطلوب من البينقي خازوق ليقعد عليه يقول فيه شعر ..لهيك يااستاذ زياد خلي هجائياتك متل دبابة (الشيلكا ) : غزارة نيران وتنوع اتجاهات ..و عملك شي رشقه لفوق لأنو- ما بدي زكرك - هنيك مربض فرس قعودنا التاريخي ..
سامي العباس
6- عزيزي زياد
رسالتك للجماعة بتهز البدن .ولكنها لن تكون أكثر نجاحا من رسول الله عندما رفع ذراعيه حتى لمع بياض إبطيه وهو يصرخ :ألا هل بلغت ..
رسالتك ستعجز عن تحريك شعرة في ضمير أي منهم ..الجماعة ياصديقي كل يوم على بكره الصبح" بياخدوه " مع الذقن ومع "Nescafe "..وناطرين منك نعيما ياباه."مو" رسائل "توجيه سياسي "..على أي حال يسلم تمك .ما بينشبع منك والله العظيم ..
سامي العباس

#سامي_العباس (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل