استنتاجات المحلل الستراتيجى خلف الدواح حول الانتخابات القادمه !!

ناصر الياسرى

الحوار المتمدن-العدد: 2260 - 2008 / 4 / 23 - 01:24
المحور: كتابات ساخرة
    

- ألو .. الاستاذ خلف الدواح ؟!!

- نعم خادمكم خلف الدواح سيدنه .. شنو هذى الاحترامات الماسامعه منك سابقا .. أكو شى ؟؟

- لا العفو هذا شى طبيعى من حيث انت لك ثقلك الاجتماعى والسياسى استاذنا العزيز!!

- شوف سيد لكو .. هذى القشمريات والجنجلوتيات مالتك صارت قديمه .. احجى .. عندك شى كول بالعجل ؟؟

- لا والله و رأس المرجعيه الشريفه فقط ردت ان اسئل عنك .. عن صحتك .. اخبارك أشو متخابرنى ؟؟

- والله سيدنه ومولانه ولا يهونون جماعة المرجعيه .... الدبل مالتى هابط وماعندى رصيد حتى اخابرك والحمد لله المشروب شحيح بفضل الحاله الامنيه المترديه بسب المعارك بين الاخوه الاعداء اطال الله فى صراعهم لنخلص من جيش الغضب وباقى الجيوش الغاضبه

- يله بعد شتريد .. راح ادزلك ابو العشره وبطلين عصريه !!

- ها سيدنه .... سويه ابو العشرين وزقك على شهداء صولة الفرسان !

- استاذ خلف انته تأمر !!

- سيدنه كول غيره ... انته شارب شى !!

- ابو حسين ليش ما خذنى بعين الزغيره ؟

- آنى ... من انعمت عينى .. عمى انتم الساده اولاد الرسول أكبار جنكم أفات سماويه طاهره .. أنتم شختورة النجاة .. العفو سفن النجاة !!

- على اى حال .. استاذنا العزيز سمعت بموضوع انتخابات المجالس البلديه ؟؟

- اها .... جن صار الموضوع بيه انتخابات .. دحجى من أول .... أكول صارت بيه احترامات !

- استاذ خلف .. ما جا اسمعك تره الشبكه تعبانه

- أى .. أى .. الشبكه تعبانه .. من طلع منه حبيب أمه متقبل من احاجيه .. روحى معلكه بتونس وطر بيه

- اقصد شبكة الموبايل استاذ خلف

- نعم .. نعم .. مو الموبايل مال خالك تعبان ما مش عندك موبايل زايد حتى لو كان صرصور زعروز نانسى عجرم ولا يهونون جماعه الشبكه سابقا ؟

- عد عيناك باجر يجيك ابو دمعتين !!

- هم صار بيه ادموع ... موملينه من البجى واللطم...... سيدنه

- تفضل استاذ

- تدرى السياره مالت خالك تبجيله على باترى وزوج تايرات

- ولا يهمك يجيك باترى ابو العين السحريه وجوزين تايرات برجستون

- سيدنه ولو المثل يكول ( لا ادلى المعيدى على باب بيتك ) تره آنى محتاز ورقه .. ها سويهن ورقتين .. رحمه للوالد خلهن ثلاثه واعتبرهن دين لمن يعدل بن صولاغ رواتبنه !!

- خلف انته تأمر .. وفضلك جازى علينه احنا القوى الوطنيه والقوميه واليساريه والعلمانيه

تتذكر من رفعت على بيتك علم الثوره العربيه و الرايه الحمراء وصور عبد الناصر ولينين وصدام حسين على عناد العجم لمن غيروا العلم العراقى !!

- سيدنه .. استر علينه .. لحد يسمعك واحد من الرفاق فى فيلق بدر لو القدس ياعلم الثوره العربيه يا رايه الحمراء يا صدم يا لينين ... عمى لا اريد منك كارت ولا باترى و لا تاير ابو الريحه .. اودعناكم !!

- خلف يمعود لا تخاف .. تره الجماعه ما مجطلين علي الاتصالات فد أمجطلين على الكهرباء ..وعلى الحشيشه !!

- عمى شتريد منى .. فك عنى ياخه ؟؟

- عندك مشروب ؟

- بطلت من وراك .. وراح اصلى من عين باجر

- محتاج مصرف ؟

- الحمد لله راتب التقاعد مكفى وزايد ووفر منه بالشهرين ألفين دينار للفاتحه مالتى !!

- زين انته عرفت بقانون الانتخابات الجديد ؟

- ليش هو يختلف عن قانون انتخابات المرجعيه السابق وشعاره ( تصويتك لقائمة المرجعيه انتصار لثورة الحسين وشوكه فى عيون العلمانيين )

- لا حبيبى .. الانتخابات القادمه تجرى على اساس القائمه المفتوحه اى انك تختار الاسماء وليس القوائم برمتها

- كول غيره سيدنه وقائمه المرجعيه .... راح تفوز بالتزكيه طبعا !!؟؟

- لا حبي .. بعد لا اكو قائمه للمرجعيه ولا هم يفرحون

- سيدنه اذا على هذا حجيك لعد حجى قلى لوعلى كبابى منو راح ينتخبهم ... عمى هذوه عايشين بضل المرجعيه وبغيره يغركون بالطشت

- على اى حال .. استاذ خلف نريد دورك التعبوى فى تغيير اتجاها ت الرأى العام واتجاهات الناخب العراقى ليكون اختياره نحو القوائم الوطنيه والعلمانيه حتى يتخلص المواطن من الاستبداد الدينى و حتى نتمكن من بناء الدوله العصريه ودولة المؤسسات

- سيدنه رحمه للوالد تره ما افتهمت شى .. بلكت تحجى بالجلفى جلفكم الله من اوساخ العمائم ونظفكم من درناتهم بأنهار خمرالفردوس

- مثل ما قلت .. دورك توعية الجماهير التى تم مصادرت اصواتها و صوتت للقوائم الطائفيه بعد ان تم خداعها بأسم الدين والخوف على المذهب ومظلومية أتباع اهل البيت !!

- سيدنه ..هسه .. استونى كمت استوعب الفكره .. اريدك اشويه اثكل !!

- على اى حال فأنت مدعو للعب دورك الوطنى فى هذه المرحله الحرجه من تاريخ العراق .. فأما ان يكون العراق بدون عمائم واما الخراب بوجودها !!

- سيدنه .. لا تروح زايد ولا تعول على الجماهير .. فهذه الجماهير لم تتغير عن سابقاتها فكلهم جهله وغوغاء وكل واحد بجيبه خمس هويات مالت احزاب ومليشيات ورافع بالبيت صور كل المراجع والمكاميع وانتم العلمانيين مصدكين اتغيرون المعادله السياسيه بخطاباتكم السياسيه وخلافاتكم تعرتالى الليل .. عمى وينكم وين اجروخكم ... كل ميليشيه شيعيه لوحزب سياسى شيعى ميزانيته بكد ميزانية مالت دوله وانته جاى اتقشمرنى بكارت موبايل لو باترى لو تاير ابو الريحه .. عمى شوفلكم درب ثانى ... آنى العبد الفقير .. واستغفر الله من كلمه آنى عرضو عليه سياره بطه وراتب بمليون تومان وما قبلت وانته جاى تحجيلى بالجماهير وضرورة تغير اتجاهاتها ..... عمى اذا الاستيرن ما الجماهير قافل على الجامع والحسينيه والعمامه واللطم والتطبير والمشايه وضرب الجرايخ والقيمه شراح يسوى الفيتر لو الحداد مالتكم ؟؟
- استاذ خلف ... رجاء أخوى ... لا تزرع اليأس والقنوط فى روح الجماهير الكادحه .. ان عملية التغير تبدأ من القاعده والقاعده انت والجماهير من خلفك !
- لا سيدنه آنى ما اشتغل بالقاعده ... يمعود اسكت لاتخلى الجماعه يهلسون شعر نتف .... قبل صدك جنت بجيش المهدى لكن تبت من ضربنه باب العباس بالنعل أثناء الصوله الشعبانيه الثانيه ولك حتى صدام ما سواهه مثلنه
- على اى حال لا زلت أأمل فيك خيرا يا ستاذى العزيز !!
- شوف اغاتى خصم الحجى .. اذا الجماعه فازوا فى الانتخابات الماضيه على اساس الحفاظ على الدين والمذهب من خطر الوهابيين واالنواصب والخوف من عودة الصداميين وصيطره القوى العلمانيه .. فأن شعار الانتخابات القادمه هو( المايصوت عفلقى .. حتى المره طلكوهه ) وكذالك الحفاظ والاحتفاظ على النجاحات المتحققه سابقا ومواجهة الرده القوميه والعلمانيين الكفره وهم الخطر الجديد على التشيع وعلى اتباع اهل البيت ... لهذا ارفع شعار( موت يحمار الى ان يجيك الربيع )
وموتوا يعلمانين وقوميين ويساريين الى ان يطلع ماركس وعبد الناصر من الكبر ....

من بلابوش انتخابات

#ناصر_الياسرى (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل