هدايا أهل العمائم ....... فى زمن الاحتلال والهزائم

ناصر الياسرى

الحوار المتمدن-العدد: 2218 - 2008 / 3 / 12 - 02:06
المحور: كتابات ساخرة
    

ألو .....؟
منو ....؟
منو ..ألو ؟؟!!
السيد السند موجود ؟
منو خلف الدواح ؟
بلى نعم .. خادمكم الزغيرون خلف الدواح ... مولانه مبروك وألف على الخير على المكرمه الجديده من لدن محافظ النجف الحاج أسعد ابو كلل وأنى بالنيابه عنك وعن كافة الصحفيين اقدم له الشكر الجزيل على هذا الكرم الحاتمى الذى قل نظيره فى عراق ما بعد التحرير !!
الحمد لله ... كيعان ورواتب ومخصصات خطوره .. بعد شتريدون يل الصحفيين.. هم بعد تحجون على الحكومه المنتخبه شرعيا وبستحقاق انتخابى وتحجون على المجلس الاعلى وتكولون عليه فرهد النجف .. لو السيد عمار راح يشترى كربله بفلس ونص عمى خلو الله بعيونكم ........... أتباوعون على أحلوك الناس ..وشلابسين من محابس بديهم ..... ولله حرام عليكم ... يله افتحو صفحه جديده مع اولياء نعمتكم الجدد ... لا تضلون تتحسرون على ايام كفخات القائد الضروره !!
والله يا خلف .. كلشى ما أفتهمت من هذا الرطين مالتك متكلى شنو... تره تاهت عليه السالفه ؟؟
ها سيدنه .. هم تريد تاكل عليه حلاوة قطعتك الجديده بحى كنده بالنجف ؟؟
ولك يا كنده منهن ؟!!
ها .. بس لا انطوكم بالحنانه ... يمعود أهناك بيت السيد ويوميه امسيرين عليه القوات الامريكيه ... يله نبنى القطعه سوبر ماركت لو اسواق تجاريه .. شتكول لو نبنيه فندق شراكه آنى وياك على حبة الله والرسول .. عمى الشغل خير من الله وخاصه على خوالنه الأيرانيين .. عمى تارسين الولايه جنهم ملايكة الرحمه .. سلام الله عليهم !!
عيونى خلف الدواح .. حبيبى أبو حسين .. تره انته فاهم غلط ( خلف الدواح مقاطعا )
سيدنه هالنكران على مودمن ... تره الموضوع افتهمت بيه كل الناس والعربان حتى صاحبك مله فرهود بالجلعه راد رقمك منى حتى يباركلك بوصلة الكاع
والك من انعل والديك ويابو مله فرهود يابو الساعه المصخمه الشفتك بيه .. ولك أنطينى فندك .. حتى أفهمك بالموضوع مال القطعه ( خلف الدواح مقاطعا )
عمى قابلين منك هذى الشتايم من حيت ولد الرسول شيطلع منعدهم نعمه من رب العالمين .... لاجن اريد أعرف ... القطعه أم الاربعميه لو أم الستميه بروح السيد ؟
اتريد الصدك ... الصدك ؟؟
نعم مولاى بن الرسول حتى تكمل فرحتى !!
خمسين متر بوادى السلام ... وبالضبط بالمقبره الجديده !
سيدنه خير من الله .... خمسميت متر وبمحلة الجديده ... بعد شتريد قابل يطوك بكراج الامانه لو بساحة ثورة العشرين ... عمى احمد ربك ما اطوك فوك من بحر النجف !!!
خلف تره اسد التلفون اذا متنطينى مجال احجى !!
افه عليك سيدنه ... بنعالك سد حلكى !!
العفو ابو حسين ... تره الموضوع برمته ( خلف الدواح ..مقاطعا )
والله يا سيدنه هذى منطقة ( برمته ) ما أندلهه ...يمكن حى جديد ... مقاطعه جديده ... كلشى يصير من حيث النجف كلش كبرت وتوسعت .. عمى البنيان دك لخان النص !!
الله اكبر ... يا خلف .. لا تخلى دمى يفور !!
ها سيدنه صار وكت الصلاة ... صليهه قضا .. ولو انتم الساده معفوين من رب العالمين .... وحتى لو أصلون صلاتكم جذب بجذب الله وكيلكم !!
خلف .... هذى آخر أحجايه وياك .... تره القطعه يم المشعول والدك !!
شتكول سيدنه ... بالمكبره ...يمعود كول غيره ...اخاف اليوم أمثكل بالمشروب !!
مثل ما كتلك ... وروح السيد التعرفه ؟؟
سيدنه تره اشك زيكى .... واطلع عريان للجامع .. احجى الصدك ؟؟
مثل ما اكول .. بتلفات المكبره !!
سيدنه مع احترامى الك ... لو انته جذاب ... لو ابو كلل أمحشش
وهذى الشغله ذكرتنى بسالفة الزايره أم عليوى( أم عليوى أجتنى بمصباح عرسى .. وآنى فرحان بالمره وكالت .. يمه خلف عرسك أمبارك وان شاءالله تترسون البيت فروخ ... تدرى يمه آنى امورى داجه وما عندى افليسات اشترى بيهن شيله هديه للعروس لجن عندى جفن أمزورته العباس والحسين و ضامته لليوم الاسود اخذه هديه ليوم عرسك !!
وتدرى يمه تره الموت حك والقاسم عمت عينى عليه جتلوه بنى أميه بيوم عرسه وخالك محماس اجته جيله وطشرت راسه يوم زفته وخبرك مطشر بن سوادى غرك بنهر الغراف بيوم خطبته
( فقاطعتها قائلا ... يمه بروح زاير فشك ما تكليلى شنى هالاخبارالسوده بمصباح عرسى ... عمى دخذى هديتج وانكلعى )
ورباط احجايتنه بمكرمة بن أبو كلل ...من انعل ابو هيجى دوله .. تكرم الصحفيين قبل ما يموتون بقطعه كاع بالمكبره .. ولكم محد ما سواها ... من نعله على ابو امريكه على هذى القسمه الرديه .. لو باقين على ابو المقابر الجماعيه جان ارحم علينه من الجماعه .. من بلابوش عمايم
الو .... الو .. وين صرت خلف الدواح .. ابو حسين ابو العرك .. ابو الفرو ..... وينك ... تره حجيك كله سجلته وراح اوديه للمكتب
انتهى ...
ملاحظه :
على كافة الصحفيين المشمولين بمكرمة السيد محافظ النجف مراجعة مغتسل بير عليوى مستصحبين معهم الوثائف الرسميه المصدقه اصوليا مع صوره كبيرة الحجم و ملونه للصحفى مع شهاده وفاة مؤجله صادره من مجلس محافظه النجف لغرض استلام الأكفان وقطع الاراضى المخصصه لهم فى وادى السلام وسوف تسقط حقوق الذين يتخلفون عن الحضور لغاية الدوام الرسمى ليوم 15 ربيع الثانى لهذا العام .
ثانيا : لا يشمل قرارنا اعلاه الصحفيين الذين تم اغتيالهم قبل صدور قرارنا هذا الا بعد معرفة الجانى او الجهه التى قامت بالأغتيال ويستثنى من ذالك ضحايا نشاطات المليشيات الصديقه والقتل الغير متعمد بنيران غير معاديه
ثالثا : لا يشمل قرارنا اعلاه كافه الصحفيين الذين غادروا القطر بعد يوم التحرير فى 9 / 4 / 2003 كونهم من أذناب النظام السابق
رابعا : سوف تخصص قطع معزوله للصحفيات عملا بمبدأ فصل الاختلاط وبما لايتعارض مع الشريعه الاسلاميه الحنيفه وحقوق الانسان .
خامسا : تكون اجور الفاتحه على ذوى الصحفيين وفى حالة الفواتح الخسرانه فيتحمل مجلس محافظة النجف 50% من نسبه الخسائر
نسخه منه :
كافة المغتسلات فى النجف / اجراء عمليه الاغتسال مجانا للصحفيين المشمولين بقرارنا علاه حصريا ان لايشمل قرارنا هذا ذوى الصحفيين المتوفين فى نفس الحادث
نقابة النقل العام فى النجف / تكون اجور نقل النعوش والمعزين مجانا على ان لا تتجاوزالعدد عن ثلاث سيارات فقط ويتحمل ذوى الصحفيين ما زاد عن هذا العدد كذالك يمنع منعا باتا اطلاق العيارات الناريه اثناء التشيع وسوف تتحمل نقابه الصحفيين العراقيين المسؤليه القانونيه عما يحدث
لجنة الدفن / تتولى عملية الدفن وبناء القبر على ان لا يتجاوز ارتفاع القبر عن شبر واحد عن مستوى الارض المجاوره ويمنع استخدام السراديب وتكون اجور الساده الملقنين على ذوى الصحفيين حصريا وبدون احراج .

#ناصر_الياسرى (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات