درد الشوكة

حبيب العربنجي

الحوار المتمدن-العدد: 6435 - 2019 / 12 / 12 - 21:44
المحور: كتابات ساخرة
    

أكو واحد كان يشتكي كل جسمه يوجعه، وين يخلي أصبعه على جسمه يون ويصيح من الوجع. شال روحه وراح للطبيب بلكن يشوف له حل. دخل عالطبيب يمعود أبو الغيرة إلحگني، جسمي كله ملتهب، وين ما أدوس بأصبعي وأضغط تطلع روحي. وگام گدام الطبيب يخلي أصبعه على راسه يصيح من الوجع، على بطنه، على إيده وظهره وبكل مكان. الطبيب تعجب، گال له تمدد، وفحصه كلشي ماكو، صاغ سليم. هذا الواحد ما صدگ وگال للطبيب سماعتك خربانة، وهمين گام يخلي أصبعه ويصيح من الوجع. الطبيب گال له أشو شوفني أصبعك، وچان يشوف براس أصبعه داخل بيه شوكة، والأخ وين ما يخلي أصبعه ده يضغط الشوكة وتنغرز أكثر بلحمه ويتوجع. جاب ملگط وطلع الشوكة، كل الوجع راح، ورجع الأخ كلشي ما بيه، طلع من العيادة حتى ما دفع فلس من الفرحة والطبيب خربان ضحك على هالثولان.
هسة حالتنا ولا حال هذا الأثول، وين ما نباوع نتألم ونتوجع، وين ما ندير وجهنا أكو وجع، بأي جهة لو وزارة لو دائرة لو مدينة وشارع ، كلها وجع وألم، ونگعد ونگول العراق كله موجوع وماكو چارة، بس باقي نرتب له إستمارة صحة صدور شهادة الوفاة وندگ له طابع. بس لو نجي عالحقيقة راح نشوف عدنا شوكة داخلة بعيوننا ، من هاي وين ما نحرك العين نضغط على هالشوكة ونتألم، وبس نطلع هالشوكة ونغسل العين ما يظل وجع وين ما نباوع بالعراق. وهاي الشوكة اللي داخلة بعين كل عراقي هي الدستور، هذا الدستور إللي هو السبب في برلمان فاسد يفصّل القوانين على مقاسات رؤساء الكتل، والسبب في المحاصصة إللي جاب مؤذن جامع يصير وزير العلوم، وجاب واحد ما يعرف بين الفولتية والتيار يصير وزير الكهرباء، وواحد ما يعرف الفرق بين الكرفس والمعدنوس يصير وزير الزراعة، وواحد ما يعرف التحاميل تنبلع لو تنشرب لو واحد يستخدمه مثل الخازوق يصير وزير الصحة، وواحد ما يفرق بين ريال مدريد وبرشلونة يصير وزير الرياضة، ووحدة ما تعرف الفرق بين ألوايز وبامبرز تصير وزيرة شؤون المرأة، وواحد ما يعرف الفرق بين النكتة والكلاو يصير وزير النقل.
فلا تترجون أي حل بزوال الوجع ماطول هالدستور باقي والشوكة موجودة بعيوننا، لازم بالأول إلغاء هذا الدستور، والمشكلة أن هذا الدستور محصن نفسه أوتوماتيكياً وغير قابل لا للتعديل ولا الإلغاء بسبب ثلاث محافظات المعطّلة لأي تغيير أو إلغاء، وهي الفقرة إللي خلاها جماعة جلعود الطرزاني ( الأسم المشترك لجلال ومسعود الطالباني والبرزاني) لحماية المصالح الشخصية لقيادات حزب اليكيتي وحزب الپارتي وليست لمصالح الكورد ولا نضالهم.
فيا أخوة الضياع.... شوكتنا هي الدستور، ويرادلنا مثل ذاك الطبيب اللي عرف مشكلة الموجوع بكل جسمه، بس خرة بالبخت ياهو گال آني دكتور وطبيب لزمنا وشگ طي.... إي شگ طيبتنا بالنص، فتعقدنا من الدكاترة والأطباء ، واحد بيهم مطفي وما يدري المحرك بعده يشتغل لو طابگ عالصفحة، وواحد يهددنا بالمارد ويخلط بين الوعي الميتافيزيقي والميثولوجيا الطوباوية لإنغلاق الذات في الوجدان والصيرورة الأنوية لمستوى التراجع البنيوي، والثالث يمسح الليمون بكلينكس مشبع ببقايا الجماع وبعدين يعصر الليمون ويطلع الحامض المنوي ... قادر. كل هذا وشوكتنا ظالة بالعين وتسبب إلتهابات، ويمكن راح تسبب العمى، وهي أحسن حالة، لأن راح نشعر بالصفاء الروحي ولو البوگ للضالين بس لأن عميان راح نحس كلشي تمام، والوطن باسم سعيد.

#حبيب_العربنجي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات