يوميات أبو جبار - عساهة أبختة 2

سمير الرسام

الحوار المتمدن-العدد: 6047 - 2018 / 11 / 7 - 20:30
المحور: كتابات ساخرة
    

المقولة المشهورة لشيخ محمد عبده عندما ذهب لمؤتمر باريس عام 1881 ثم إنتهى المؤتمر و عاد عند العرب ، فقال قولته المشهورة :
(( ذهبت للغرب فوجدت إسلاماً و لم أجد مسلمين . . و لما عدت للشرق وجدت مسلمين و لكن لم أجد إسلاماً )) !! لذلك نجد التطور والتقدم والحداثة في تلك البلدان المتمدنة .. بينما نجد الفوضى وعدم الشعور بالمسؤولية والتراجع والتخلف في بلدان أخرى .. فلا تلوموا الإسلام لأنه بريء من بعض البشر بل لوموا المسلمين الذين لا يطبقون مفاهيمه وقيمه السليمة. إن من أسباب التخلف والتراجع (في أي بلد) هي عدم الشعور بالمسؤولية الأخلاقية والوطنية، ووجود خلل في الأنظمة والقوانين وخلل في السياسة والمناهج التعليمية.
ما أعرف ليش رجعتني مقولة ( محمد عبدة ) الى سنة 1982!! وتحديداً الساعة الخامسة فجراً.
- اكو صراخ أبيت ام خضير.
- يا ستار يا رب، بس لا أبو خضير انطاج عمرة لان رجال كبير بالسن!
من طلعنة شفنة أبو خضير وام خضير لازميمهم الامن ويريدون يخلوهم بسيارة لانكروز بيضة، من اللي يركبوهة الامن! ووراهة اخذوا زوجة خضير بدون حجاب!
- هذولة منين؟!
- هذولة الامن اعتقلوا ابو خضير وام خضير لان خضير هارب من الجيش.
- ادري هوة هرب من الجيش اهلة شنو دخلهم؟!
- هسة كم ساعة ويسمع الخبر ويسلم نفسة ويطلعوهم.

الساعة الرابعة والربع عصراً سمعنة صوت ام خضير تبجي على ابنهة، طلقوا سراحهة هية وابو خضير بس زوجة خضير ما طلعوهة!! ابو خضير كللهم اخذوني بدالهة ما قبلوا . .
- الرجال كبير بالعمر بس لا يروح بيهة.
- وهاي زوجة خضير ليش ما طلعوهة؟!

الساعة التاسعة ونصف اجت سيارة لانكروز بيضة نزلت زوجة خضير . . كالت خضير سلم نفسة ويحققون وياه:
- منو وياك بالخلية؟
- يا خلية؟!
- يا خلية مو؟! اعترف احسنلك.
- شعترف يمعودين، اني صح هربت من الجيش بس ما اعرف يا خلية.
- شوف احنة اعتقلنة جاسم وهوة اعترف على كم واحد من بينهم انتة.
- جاسم منو؟!
- جاسم أمهاوي . . اعترف بكل شي.
- والله ما اعرفة . . بيش تردون احلفلكم.
- شوف ولك زوجتك موجودة يمنة . . لا تخلينة . .
- والله سيدي ما اعرف اي خلية . . زوجتي شنو دخلهة بالموضوع؟!!

من نزلت السيارة اللاندكروز زوجتة خضير جانت بدون حجاب . . وعيونهة حمرة من البجي . . سولفت وياهة عمتهة ام خضير . . خضير اعترف بكل شي، كللهم اكتبولي ورقة فارغة واني اوقع عليهة بس عوفوا مرتي!!!
- وتالي؟!
- الله الوالي
- يعني شنو؟!
- زوجة خضير حركت نفسهة ورة ساعة من رجعتهة من التحقيق.
- ليش؟!!
- اغتصبوهة كدام خضير حتى يعترف.
- وخضير؟!
- خضير محد يدري وين صار!!!

بقينة طول الليل سهرانين . . جان يوم الاربعاء لحد الان اتذكر . . الصبح أمي لبستني ملابسي حتى اروح للمدرسة . . الخميس رفعة علم . . وأبو حياوي ( حارس المدرسة ) كالعادة يضرب طلقات برفعة العلم . . والطلاب ينشد النشيد الوطني :
وطن مد على الأفق جناحا وارتدى مجد الحضارات وشاحا
بوركت أرض الفراتين وطن عبقري المجد عزماً وسماحا

بوكتهة بجيت بنص رفعة العلم . . سألتني ست ابتسام:
- ليش تبجي ماما؟!
-- خضير عدموه ست!

ورة ايام بساحة ( عروس مندلي ) ويسموهة ساحة 55 لان الباص منها ويرجع لباب المعظم. الناس كلهة ملتمة . .
- يابة شكو الناس ملتمة؟
- هاي قبل يومين شاب هارب من الجيش وتواجه وية البعثية بالسلاح . . كتل منهم اربعة ووراهة قبل لا يخلص طلقات كتل نفسة!!
- والناس ليش ملتمة؟
- خلو جثتة بوسط ساحة 55 وكتبوا بكارتونة على صدرة ( خائن ).

---

لمعرفة اخر تطورات فيروس كرونا في بلدك وفي العالم كله انقر على هذا الرابط
http://ahewar.org/Corona.asp

كيف تدعم-ين الحوار المتمدن واليسار والعلمانية على الانترنت؟

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات