مرة واحد فكّر، طق مات ( حوار تليفزيوني مع كاتب)

فاطمة ناعوت

الحوار المتمدن-العدد: 4924 - 2015 / 9 / 13 - 12:03
المحور: العلمانية، الدين السياسي ونقد الفكر الديني
    

(حوار تليفزيوني عميق مع كاتب مشاغب)

المذيعة: أنت ليه بتكتب في الحاجات دي؟
الضيف: حاجات إيه حضرتك؟
المذيعة: يعني إنك عاوزنا نقرأ ونفكر ونختار حياتنا بنفسنا والحاجات العجيبة دي؟
الضيف: مش عاوزة تقرأي وتفكري ليه يا مدام؟ هو التفكير مُضرّ والقراءة عيب؟ وليه مش عاوزة تختاري موقفك من الحياة يا مدام؟ هي حرية الدماغ مزعجة؟
المذيعة: ليه يعني مش فاهمة! ما حنا كده تمام وزي الفل. إيه الفايدة يعني من ده؟!
الضيف: عشان هو ده التنوير حضرتك.
المذيعة: وده وقته برضو؟ الحاجات دي بتعمل بلبلة وكده.
الضيف: أولا التنوير مالوش وقت حضرتك. التنوير قضية كل وقت وكل مكان. وثانيًا البلبلة بتحصل لما ناس زي حضرتك تعرقل حراك الثقافة وتشجع جمود العقل وعبودية الأفكار المتهالكة، وتقفل شبابيك التنوير فنرجع لكهف الظلامية تاني. لكن لو خلينا التنوير قضية مجتمعية شاملة ومشروع قومي حقيقي، في ظرف سنوات قليلة يختفي الجهل وتنتحر الطائفية ويتقدم المجتمع.
المذيعة: إيه ده كله... إيه ده كله؟ علينا من ده بإيه يا أفندي انت؟
الضيف: يا ست الكل الناس لازم تكسر الصندوق عشان المجتمع يتطور.
المذيعة: صندوق أيه يا راجل أنت اللي عاوز تكسره؟! عيب عليك اختشي!
الضيف: لولا إديسون فكر خارج الصندوق مثلا، كان زمانا لسه بنستخدم الشموع ومكانش فيه حاجة اسمها تليفزيون وكانت أستاذة عظيمة زي حضرتك هاتقعد في البيت.
المذيعة: هو أنت بتبيع شمع؟
الضيف: لأ. أنا بابيع بلالين حضرتك. تاخدي بالونة؟
المذيعة: لأ مش عاوزة. أنا بالنسبة لي كويس أوي اللي أنا فيه من غير تفكير ووجع قلب. والمجتمع كمان كويس عليه أوي اللي هو فيه كده جوا الصندوق.
الضيف: لا تتكلمي نيابة عن المجتمع من فضلك. لا تفترضي فيه الغفلة والاستسلام والكسل. واللي تشوفيه كويس بالنسبة لحضرتك مش بالضرورة يكون مناسب لغيرك.
المذيعة: ليه نفكر ونتعب نفسينا بس؟!!! يا عم قول يا باسط.
الضيف: يا باسط. بس حضرتك أستاذة مثقفة ميصحش الكلام ده!
المذيعة: أنا مش مثقفة.
الضيف: متقوليش على نفسك كده. أنت كويسة.
المذيعة: لا، لا، لااااااا! أرجوك أنا مش مثقفة!
الضيف: يا هانم ميصحش ده حضرتك مذيعة مشهورة وأمورة وسنيورة.
المذيعة: لااااا. أنا مش مثقفة. أنا حرة يا عم إنت فيه إيه؟!
الضيف: طيب يا ستي أنا آسف. أنتِ مش مثقفة. بس ممكن أعرف السبب؟
المذيعة: أصلي مرة شفت واحد جارنا فكر طقّ مات. وأنا مش عاوزة أموت. زي ما حضرتك ملاحظ كده إني حلوة وصغيرة وباعمل شعري بانكي ودولابي مليان هدوم حلوة عاوزة ألبسها كلها وكده. وبعدين المثقفين دول دمهم تقيل خالص. تمام زي حضرتك كده.
الضيف: وحضرتك دمك شربات. بس مفيش أي مانع إنك تلبسي وتتشيكي وتعمل شعرك مزامبليه وأنت بتفكري.
المذيعة: يا عمي أنت مش عارف حاجة خالص. التفكير بيجيب المرض وبيعمل هالات سوداء تحت العين. والقراءة بتجيب شحوب وبتقصر العمر. أنت مش متابع فقرة طبيبك الخاص؟
الضيف: لأ. الحقيقة مش متابع.
المذيعة: مانت عشان كده شكلك يصعب ع الكافر، وأكيد هاتموت صغير على فكرة.
الضيف: قريتي حاجة من كتبي يا قمر؟
المذيعة: لأ طبعا!
الضيف: ومقالاتي؟
المذيعة: لا يا عم مقالات ايه وهري إيه. أنا قبل الحلقة بتاعتك بيومين كده الإعداد جابلي كام لقاء تليفزيوني من بتوعك على يوتيوب. قلبتك في ربع ساعة وجبت أرارك وعرفت القواضي اللي شاغل نفسك بيها ودمتم.
الضيف: أراري؟! قواضي؟ طيب لما حضرتك مقرتيش لي لا كتب ولا مقالات ولا هري وكداهون، ليه فكرتي تستضيفيني حضرتك؟!
المذيعة: سمعنا الناس بتقول إنك عامل دوشة وقلق وشبورة وأنك لاسع طحن، فقلنا نجيبك نتفرج عليك شوية ونضحك. أهو منها الناس تتسلى وتنبسط، ومنها نجيب بيك شوية إعلانات تبشبش علينا حبّة. أوفر تايم وبوناس وحركات. مانت عارف بقا.
الضيف: أيوا عارف طبعا يا هانم. ممكن أسألك سؤال؟
المذيعة: ها.
الضيف: حضرتك ليه بتشتغلي مذيعة؟
المذيعة: عشان أنا شاطرة وباعرف أقول ايه وماقولش ايه. مش زيك بتكتب في حاجات مالهاش تلاتين لازمة!! قال نفكر قال ونخرج برا الصندوق!! ده حتى الصندوق عسل.
الضيف: ممكن سؤال تاني؟
المذيعة: بس في الإنجاز بقا، عشان ورانا فقرة طبيخ.
الضيف: حاضر يا ستي. أنا ملاحظ إن طول الحلقة باقول لحضرتك: أستاذة، هانم، حضرتك الخ، ليه حضرتك بتندهيلي باسمي مجردًا من الألقاب؟
المذيعة: هاهاهاها. أصل أنا فاااااانكي وروشااااا. تشاووو.

#فاطمة_ناعوت (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات