وين تروح منّه

حذام الحداد

الحوار المتمدن-العدد: 4900 - 2015 / 8 / 18 - 04:47
المحور: الادب والفن
    

وين تروح منّه ومن غضبنَه
بعد هاليوم مايسكت شعبنه

تخدعني وتذلني صارلكْ أسنين
تأملت گلبك بساعة على حالي يلين
عرفْتك ثعلب أمْخفّه بعباية دين
مانَك من هلي ولا من نَسبنه
وين تروح منّه ومن غضبنه

يالجيتكْ وأشكي من لَهب تمّوز
تگلّي من وره الگيزر إجاك يجوز*
فوگ الحرمنه أنّوب أطلعت دنغوز
تغرف ابماعونّه وتالي تسبْنه
وين تروح منّه ومن غضبنه

وين تروح منّه يلي بگت الدار
من لفطك صحت ياربي ياستّار
نسيت آنه عراقي أبن أبوي البار
وأعرف منو اليكرهنه ويحبنه
وين تروح منّه ومن غضبنه

عراق الخير عدنه حاوي كومه أديان
مثل طيف الشمس ومذاهب ألوان
من وين أطْلعوله جوگ هالغمان
زرعو الفتن وفرقو شعبنه
وين تروح منّه ومن غضبنه

نسيت انه العراقي الأبد ماينباع
وكل أهلي نشامه والجدود سباع
براية الله الْبيضه نصون الگاع
ومحد يگدر ايضيّع تعبنه
وين تروح منّه ومن غضبْنه


*عندما أعلن وزير الكهرباء بأن ازمة الكهرباء حصلت بسبب عدم اطفاء الگيزر اي السخّان مع إن درجة الحراة فوق الـ 50 ْ وعلى أثر هذا التصريح تفجرت الانتفاضة

#حذام_الحداد (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات