عمر عبد العزيز
الحوار المتمدن-العدد: 3040 - 2010 / 6 / 21 - 15:45
المحور:
الادب والفن
معلِّش اصلي نسيت افرح
صاحبنا البهجة أنا و عمري ف بداياته
و فجأه أخدها و سبقني و أنا لسايا في المطرح
مع زحمِة مواجعنا
بننسى اننا حاسِّين
بندِّي الدنيا فرحتنا نبادلها بلُقمتنا
و نحمد ربنا و نشكر ما دام باتوا العيال واكلين
تقوم الدنيا تخدعنا و تاخدها كده ببلاش
و تطلب مِنّا صحتنا و قوتنا عشان ما نعيش
و نحمد ربنا تاني نقول ما هو اصله جه ف الريش
و لما يقِل مجهودنا
نبُص نشوف ايه اللي بنينا بجهودنا
نلاقي مكانَّا ع البسطة ما بين الادوار و ف البدروم
و حلم قديم فيه الدنيا بمزيكا و فراش بيحوم
أتاريني و انا بجري نسيت نفسي
بقيت ذكرى لواحد تاني
لا شكلي هو ده شكلي
ولا ده سني و زماني
نحاول ننسى و نكابر
فنحصد فاكهة معطوبة
فاتتني المانجة في يوليو وبستناها في طوبة
و أنكِر اني بتحسَّر
و افضل احن و اتأمل و استفسر
حتدينا الحياه فرصة
نشوف لون الفرّح تاني
ولا خلاص
و انا اللي فهمت متأخر
#عمر_عبد_العزيز (هاشتاغ)
كيف تدعم-ين الحوار المتمدن واليسار والعلمانية
على الانترنت؟