جهاد علاونه
الحوار المتمدن-العدد: 2880 - 2010 / 1 / 6 - 22:41
المحور:
كتابات ساخرة
أنا لو كان عندي خلفيه ثقافيه كان زمان صرت رئيس تحرير أكبر مجله أو صحيفه , بس خلفيتي الثقافيه مهترئة وغير مقنعه خصوصاً للمسئولين عن تحرير الصحف والبرامج في المحطات الفضائيه , يعني لو كانت خلفيتي مميزه وكبيره وبتطلع وبتنزل وتميل على اليمين وعلى الشمال كان من زمان صرت انسان ذا شئن كبير في البلد الذي تحكم فيه الأفخاذ والخلفيات البارزة.
وأنا انسان غبي جداً وطوال عمري وأنا أعتقد أن الخلفيه غير مهمه وتبين بعد ذلك خطئي الكبير حين شاهدتُ الخلفيات تعلو وتعلو والخلفيات الثقافية تهبط مع خلفيات هابطه فلسفجيه على الفاضي .
الخلفيه الثقافية لطلاب الجامعات في الأردن بتكون بارزه ونافره وخصوصا خلفيات البنات بتكون دائماً بارزه من غير سليكون , وفي طالبات بستعملن سليكون وفي طالبات ما بحبن السليكون نهائياً ومكتفيات بخلفيتهن الجمالية .
على كل حال الخلفيه شيء مهم جداً لكل الطلاب وهي رأس مال الطالبه الكسوله , ولكن الطالب الكسول ما بتنفعه خلفيته على الاطلاق ولكن تنفعه خلفية صاحبته أو قريبته أو أخته إن لزم الأمر فإن كان لأخته خلفيه ثقافية مميزة فهذا طبعاً سيكون داعما له في كل الميادين ,وأتحدى كل صاحبات الخلفيات الجميلة أن يعرفن أي شيء في أي شيء وأتحدى أصحاب الخلفيات المهنية الأكاديمية إذا بعرفوا أي شيء عن بعض المسميات المهنية في مهنهم , والخلفيه شيء مهم جداً للجميع بس الذكور طبعاً ما بتنفعهمش خلفيتهم .
وفي أساتذه بستسلموا للخلفية الثقافية للطالبه دون أن تتكلم بكلمة واحده ومن منظر خلفيتها يعرفون عنها كل شيء وماذا تريد .
واالصيادله وأصحاب (الإجزخانات) إذا كانوا يعرفون شيئاً عن معنى كلمة (فارمصي) الانكليزية وطوال حياتي وأنا أسئل كل صيدلاني وصيدلانية هذا السوآل وجميعهم يجيبون بـأن معناها في العربية (صيدلي ) غير أن الصحيح معناها (برمكي) لأن البرامكة هم أولُ من مارس هذه المهنة أو هم من مارسها بكثرة لذلك اقترنت تلك المهنة بجنسهم الاجتماعي .
والموضوع ليس هذا وإنما غياب الثقافة العامة واستبدالها بالخلفيه فغالبية الناس اليوم لا يحملون ثقافة عامة , وإنما يحملون خلفيات مميزه, وهذا ليس خاصا بالعرب أو بشعب دون شعب فغالبية العالم اليوم شعوبهم غير مثقفة ثقافة عامة ولكننا نحن العرب نزداد على كل تلك الشعوب زيادات ملحوظة .
يعني اليوم ثقافة التخصص الدقيق الأكاديمة طغت على كل شيء , وكل متعلم يادوب يعرف التخصص المتخصص فيه, طبعاً هذا الحكي عند غيرنا ولكن نحن الخلفية الثقافية هي أهم شيء .
وشو رأيكم ؟..لو دخلتم أي جامعة في الأردن أو سوريا أو لبنان أو مصر أو الخليج , شو رأيكم ,لو فعلاً دخلتم تلك الصروح الأكاديمية وشاهدتم المشاهد الثقافية المدهشة والخلفيات الرائعه وسألتم طلابها بعض الأسئلة الثقافية الخفيفة ,كما حدث مع بعض الأصدقاء ولنفترض أو بصراحه بدون افتراض وإنما حصلت فعلاً مع صديقي طالب الصحافة والإعلام في إحدى المرات حيث أعد تقريراً عن مستويات التعليم والثقافة العامة عند الطلاب وقال لي : كنتُ أنا وبعض المثقفين في جامعة اليرموك سنة 2005م وسألنا بعض الطلاب عدة أسئلة وكان منها طالبه خلفيتها الثقافيه كبيره :
-شو بتعرفي عن الجندرية ؟
فقامت إحدى الطالبات وقالت , ما بعرف , ولكن كان هنالك طالبة تعرف وأعتقد أن خلفيتها الثقافية أكبر من خلفية زميلتها وقالت :
-أعتقد إنها معجون أسنان ؟أو نوع شغله غريبه ,صح؟.
فقلت لها : يمكن نوع شوكولاته , على شان خلفيتك عن الشوكولاته مميزه,صح؟.
فقالت : مش بالضبط بس أعتقد إنها هيك .
فشردتُ في ذهني وقلتُ لها :
-لا انت بتسئلي أم بتجاوبي ؟طيب شو كان يشتغل(أمنوائيل كانط)؟
فقالوا : احنا هيك أسماء ما بنعرفش.
-ماشي يعني ما عندك خلفيه ؟
فقالت عفوا شو بتقصد ؟
فقلت : أقصد ما عندك خلفيه ثقافيه عن فلاسفة الألمان ..طيب ماشي كمان مره شو بتعرفي عن الجندريه الجندريه؟
-بصراحه ما بعرفش .
-يعني مش معناها (جنس)؟
طيب خلينا نسأل زميلتك :
-شو خلفيتك الثقافية عن جان بول سارتر ؟.
-أعتقد إنه لا عب كرة قدم .
فقلت :لا .
عندها تدخل صديقي وقال :
-أعتقد أنه ممثل فلم كابوي وهو الذي قام ببطولة فلم (الطيب والبشع والشرير) وكان دوره شريراً.
فقال أحد الطلاب:
-صح أعتقد إنه شغله زي هيك .
-ما هي خلفيتك الثقافية عن توفيق الحكيم؟
فقالوا جميعهم , أديب مصري , وفي طالبه حكت : ما عندي خلفيه , فقلنالها كيف ما عندك خلفيه, إنت خلفيتك ما شاء الله عليها كبيره على حسب ما وصفوكي زملائك لدرجة إنها علاماتك مميزه!!وتبادلنا بعض الأحاديث عن أنواع الخلفيات المنتشرة في الجامعات , يعني في طالبات خلفياتهن ساحله وفي طالبات خلفياتهن الثقافية عريضه وفي طلاب خلفياتهم الثقافية أجمل من خلفيات الطالبات وفي طالبات يا كبدي عليهن ماشيات في حرم الجامعة بدون خلفيات وهذول إذا ما كانن مجتهدات مستحيل أن يحصلن على نتائج مميزة , وكمان بعد التخرج في طالبات بسبب خلفياتهن بحصلن على وظائف مميزه والطالبات اللي مخلفياتهن مش كبيره هذول ما بحصلنش إلا على وظائف عادية بعد عشر سنين من تخرجهن , يعني أهم شيء الخلفيه .
وسألنا بعد هيك عن أهم مؤلفات توفيق الحكيم وركزنا على الطلاب اللي خلفيتهم الثقافية كبيره :
فقالوا: رواية شجرة اللبلاب ..وبين قصرين ..وهو مؤلف رواية زينب والناس .
فقلنا يا عيني شو هالخلفيه الثقافية!.
فسأل صاحبي هذا السوآل :
-أين تقع المدينة المحرمة.؟.
فقال أحد الشباب :
-أكيد في مكه.
فقلت له :
ليش في مكة يعني ؟ ليش خطر في بالك هذا الجواب ؟فقال :
-يمكن عشانها محرمه؟ والله قد حمى مكة والبيت لأنه قد تكفل بحمايتهما ..يعني أنا ما قرأت عنها بس صار عندي شك من الاسم إن يكون موقعها في مكة .
-بس في بعض ناس خلفيتهم الثقافية بتحكي ا إنها في الصين , شو رأيك.
فقال: الناس حرين بس أكيد أنها في مكة عشانها مكة محمية من الله ضد الزلازل والبراكين .
فقلتُ له:
كان لازم ربنا يسميها (المحميه ) مش المحرمه .
فنهض من مقعده وقال :
أممممم ما بعرفش.
وقال الغالبية :
-بصراحه ما بنعرف...وما عندناش أي خلفية .
فقلت لهم : ليش وين راحت خلفيتكم ؟
وبعد سنه من هذا قمنا بزيارة وديه لإحدى الجامعات وسألنا مجموعات طلابية تنتشر في أروقة الجامعة:
-مرحبا يا شباب .
-أهلين .
-شو تخصصكم ؟
-صحافه.
-حلو , يعني خلفيتكم عن الصحافه والاعلام جيده؟.
-يحلي أيامك.
-شو كان يشتغل سلامه موسى؟
--عفوا مين انتوا ؟
-إحنا ناس عاديين وبدنا نكتب عن هذه الشخصيه فقلنا يمكن في حدى منكم بعرف شيء ..شو رأيكم ؟
-أنا ما بعرف.
-وانت.
-أعتقد كان حاكم إداري أيام حكومة (طلعت رشيد).
-وأنت , كلام زميلك صحيح.
-أنا ؟
-آه إنت .
-أنا ما بحبش التدخل في السياسة.
فسألتهم جميعاً : انتوا أي سنه , فكان غالبيتهم سنه ثالثة صحافه وإعلام .
وقال آخر :
-بصراحه هيك أمور بتهمنيش .
-ليش ..شو اللي بهمك؟
-أنا بحفظ دروسي والدوسيات , فقط لا غير أما مين سلامه موسى أعتقد إنه موضوع بهمنيش.
-طيب بس انتوا كلكوا تخصصكوا صحافه؟
-لا ..هذي زميلتنا تخصصها قانون .
-قانون؟!.
-آه.
-مرحبا .
فردت وهي تضحك:
-أهلين بس تسألنيش عن أي شيء .
-ليش .
-ما بعرف .
-من هم أول جماعه أسسوا المحاماة ؟ يعني من أول المحامين القانونيين في العالم؟
-ما بعرف .بس يمكن الألمان أو اليابان , بعدين شو خصني ؟
-طيب بدي أسألك أسئله خفيفه ...مين هي ساندريلا الشاشة العربية ؟
-سعاد حسني .
-آه سعاد حسني .
-لحظه أنا سألتها هي ..واحد واحد ..
-طيب ..هل شاهدتم فلم (الرساله)
-آه حضرناه .
-من هو (أسد الله).
-عبد الله غيث.
فقلت : عبد الله غيث ؟!.
فقام طالب وقال :
-لالا أحمد ماهر .
-طيب ماشي .
-من هي أول ممرضه في الاسلام.
-يمكن ..والله أعلم ..والله أعلم , إنها :ميرفت أمين.
-طيب ليش توقعاتكم هيك ؟
-لا مش توقعات أكيد كان عبد الله غيث يلعب هذا الدور , كان (أحمد ماهر) على قد ما هو حقير وكلب ونذل يضايق الرسول فأجا عبد الله غيث وضربه كف وقع على الأرض وسال دمه .
-هههههههههههههه.
-أين يقع تمثال الحريه ؟
فقال أحد الجالسين على الأرض:
-في ألمانيا ..في ألمانيا .
طيب ماشي ..أوكي خلينا نشوف الطلاب اللي قاعدين هناك يمكن تكون خلفياتهم قويه ..مرحبا شباب .
-أهلين .
-إنتو شو تخصصكم ؟
-هندسة.
-هندسة شو ؟
-حاسبات وإلكترونيات واتصالات وقوى كهربائية .
-يعني عدكوا خلفيه عن اللي بدنا نسأله ؟
-ما بنعرف .
-بتعرفوا نزار قباني ؟
-آه طبعاً بنعرفه .
-شو كان يشتغل؟
-أعتقد كان يلحن لعبد الحليم حافظ ولكاظم الساهر .
-وأنت شو رايك بتوافق زميلك؟
-لا أعتقد أنه كان شاعراً.
-شاعراً؟
-آه أكيد .
-في أي عصر عاش؟
-ما بعرف .
-وان تشو خلفيتك بتقول هل نزار قباني كان شاعراً هل تعرف في أي عصر عاش؟
-يمكن في العباسي الأول .
-وانت..هل تعرف؟
-اللي في العباسي الأول كان (إمرأ القيس) بس نزار أعتقد إنه كان في مصر أيام الاستعمار الأنكليزي.
-طيب شو رأيكم في الخصر الساحل ؟
-حلو إكتير وبجنن ..بس في بعض ناس ما هو حلو إكتير عليهم , وخصوصاً بس يستعملوا معه الجل على شعر الرأس بس إجمالاً حلو ومن المفترض إنه الواحد هيك يتابع الموضات.
-آه يعني قصدكوا ما بكون مناسب للخلفية الثقافيه؟ طيب مين أحلى نجم عربي .
-حماده هلال .
-لالا عمر ذياب .
-أنا في نظري (مهند) و (نور)..بس يحيا ولميس زاكيين.
--شكراً شباب ..الظاهر إنكوا طلاب خلفيات جيدون , في الخلفيات فقط رائعون.
ومره من ذات المرات قال لي صديق آخر , سألنا في الجامعة هذه الأسئلة:
-مرحبا شباب .
-هاي ..هاي .
-كيف الحال ؟
-نايس إكتير .
-شو تخصصكم ؟
-تخصصنا لغات .
-يعني زي طلاب الهندسه ابتحكوا لبناني إمنيح؟وخلفياتكم في اللبناني جيده .
-لالا لغات انكلش فرش ..رشا ..تلياني (طلياني) وهيك إشيا .
-طيب بدنا ناخذ من وقتكم خمس دقائق وأسألكم بعض الأسئلة ونفحص خلفياتكم الثقافيه .
-تفضل .
-أين ولد هيغل ؟
-مين هيغل ؟
فقلنا لهم , إنتوا طلاب لغات وما بتعرفوش مين هيغل ؟فقالوا
لغات ..أي نعم , بس هذا لا يعني أن نفهم وأن نحفظ أسماء الأطباء .
-طيب سقراط؟
-مين سقراط؟
-طيب ماشي : أحمد شوقي .أين ولد أحمد شوقي .
-ما بنعرف.
-طيب ماشي أين ولد النابغة الذبياني .
-الضبياني؟ أكيد في أبو ظبي.
-كم يبلغ طول نهر النيل .
-ما بنعرف , ما عندنا خلفيه .
-طيب ليش؟ ما بتعرفوش؟ليش ما عندكوش خلفيه في بنات طالبات خلفياتهن جيده ورأيناهن.
- بصراحه البنات بس هنه فقط اللي بهتمن بالخلفيه , قاعدات بالدور وبتخركنش على شان هيك بزاكرن وبدرسن مليح وبتتحسن خلفياتهن أثناء العمل في البيت , وبس يجن على الجامعه بتكون الخلفيه عندهن واضحه وبارزه , ويعني أسئله غير مهمة مثل هيك ما بنهتمش فيها ..عفوا ..بنقصد مواضيع مثل هيك ما بتهمنا بتاتاً , ومش بس إحنا , حتى طلاب التخصص ما بتهمهم هيك مواضيع .
-طيب شكراً يا شباب .
-مرحبا إحنا على باب المكتبه بدنا نسألكم سوآل واحد فقط لا غير .
-إتفضل أستاذ.
-أكمن مره دخلتم هذه المكتبة واستعرتم كتب.
-بصراحه ؟..أنا هذه السنه الثالثه وخلال الثلاث سنوات كلهم أعتقد إني دخلت المكتبه مره واحده .
-وأنا سنه ثالثة أدب إنكليزي ودخلت المنكتبه يمكن عشر مرات فقط.
-وأنا سنه ثانيه لسا ما دخلتهاش نهائياً.
-طيب بتعرفوا (نور الدين زيدان) ؟
-آه هذا أمه فرنسيه وأصله عربي ..لاعب كرة قدم بجنن وحلو إكتير .
-أكيد حلو على شان أمه فرنسيه.
ثم حدثني وهو يضحك ويقول , مره من ذات المرات ذهبنا للمدينة الصناعية لنكشف عن مستوى الثقافة العامة , فتوجهنا للمحلات التجارية والفنية وكأننا نسأل عن شخص غريب أو عن اسم قطعة سياره:
-مرحبا عموه.
-هلا خالي , أأمرني .
-بدنا نسألك , في عندك واحد اسمه (أحمد فؤاد نجم)؟
فقال : مين؟
فقلنا :
أحمد فؤاد نجم.
فسألنا هو :
شو صنعته؟ يعني شو بشتغل ؟
فقلنا له : مكنيكي ديزل .
فنظر إلينا معتذراً وكأنه يقول لا أعرف فغادرنا من على باب محله ودخلنا على محل آخر متخصص في إصلاح وتصليح سيارة المرسيدس وقلنا له :
مرحبا عمي .
-هلا اتفضلوا من الباب الثاني.
فقلنا له : إحنا بدنا نسأل سؤال ونروح , فقال :إسألوا.
فقلتُ له :
بتعرف وحده اسمها مرسيدس؟
- مرسيدس يا عمي هذا نوع سياره .
- فقلنا عارفين , بس بدنا نسألك بتعرف شو يعني مرسيدس شو يعني كلمة مرسيدس.؟
فالتفت برأسه إلى الخلف وكأنه يطلب المساعدة من أحد الحضور فتقدم منا شاب يافع وقال : مرسيدس هذا نوع سياره ألمانيه, فقلنا عارفين , بس في ناس حكولنا إنها اسم نهر كبير في المانيا , هذا صحيح؟فقال : أنا ما بعرف أنا وظيفتي أصلّح السيارات فقط لا غير,
فقلنا له شكراً:
وبقينا يوماً كامل نسأل كل المتخصصين في المرسيدس ولم نجد أحدا يعرف عن اسمها أي شيء , فمنهم من قال أنها اسم للشركة لا يحتوي على معنى ومنهم من قال : أنا بعرفها هذي ممثله إيطالية , ومنهم من قال : مرسيدس اسم لاعب قوى أمريكي .
يمكن الأسئله التي طرحناها كانت صعبة وكان دون المستوى التعليمي لطلاب السنه الأولى والثانيه والثالثه , ولكن نفس الأسئله سألناها لمتخصصين وفنيين ما عرفوهاش وفي ظاهره أخرى أكثر غرابه سنتحدثُ عنها غداً.
#جهاد_علاونه (هاشتاغ)
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
