حوار مسرحى بمناسبة عودة مرتضى منصور لرئاسة نادى الزمالك

حسن مدبولى

الحوار المتمدن-العدد: 7087 - 2021 / 11 / 25 - 00:38
المحور: كتابات ساخرة
    

هذا الحوار المسرحى تقوم ببطولته شخصيتان إفتراضيتان ، الشخصية الأولى تلعب دور إعلامى أو شخص ما يقوم بتوجيه بعض الأسئلة أو الإستفسارات إلى الشخصية الثانية محاولا التعرف منه عن سبب كراهيته المفترضة لمرتضى منصور ، واضعا خلال هذا الحوار المفترض كل التساؤلات التى قد لاتكون حقيقية ، او التى يمكن اعتبارها فانتازيا او مجرد حوار ساخر :-

الأول :- أنا ملاحظ إن حضرتك دايما بتهاجم مرتضى منصور بشدة ، وبترفض عودته نهائيا ، وبتطلب محاكمته وإعدامه إن كان ذلك ممكنا ؟

الثانى:- طبعا أنا لا أطيق إسمه ده لازم يتعاقب جنائيا، وكمان لازم يختفى نهائيا من الساحة الرياضية الطاهرة حتى لا يفسدها !!

الأول :- بالتأكيد إنت من أنصار ثورة 25 يناير والربيع العربى ، وبتكره مرتضى لإنه من ألد أعداء الثورات العربية ؟

الثانى:- لأ طبعا ،، يناير إيه وزفت مين ؟ ميتين أم الربيع العبرى الصهيونى الإمبريالى، على ميتين أم اللى شاركوا فيه، مافيش غير ثورة 30 يونيه،
وثورة 23 يوليو بس !!

الأول:- خلاص يبقى حضرتك مع الآراء اللى بتشوف إن هو كان السبب الرئيسى فى قتل وسجن العديد من أعضاء روابط الأولتراس بتوع الكورة فى ستاد الدفاع الجوى (30 يونيه) ؟

الثانى:- لا لا مش دى كمان، الأولتراس دول جماعات ارهابية ، كانوا بيشتغلوا لحساب تميم وموزة وبيتدربوا فى صربيا عشان التخريب ، وهما اللى موتوا نفسهم !!!

الأول:- خلاص يبقى حضرتك إخوان وبتكرهه لإنه بيهاجمهم عمال على بطال؟

الثانى:- إخوان إيه يا عم ؟ دول خونة وارهابيين وبتوع قطر وتركيا وإسرائيل وإيران وأمريكا وروسيا ،،،

الأول :- طيب يمكن عشان حضرتك ضد تسليم تيران وصنافير للسعودية وهو كان عضو فى البرلمان اللى وافق على تسليمهم للسعودية ؟

الثانى :- أبدا أبدا ده قرار سياسى محترم لإن الجزر دى من الأساس مش بتاعتنا ،وحرام ناخد حاجة من حد ،كمان السعودية بلد الرسول ما نقدرش على زعلها أبدا ولو عاوزة الهرم كمان نبعته !!

الأول:- يجوز إنت عاوز تخلص منه عشان هو ماسك عليك سيديه، ولا ملف فى الآداب ، أو يمكن شتمك بأمك وخالتك زى ما بيشتم السياسيين المعارضين ؟

الثانى:- يا عم ما تاخدنيش فى دوكه سياسيين مين ومعارضين إيه؟ دول ناس خونة وعملاء وولاد كلب ويستاهلوا كل اللى بيقوله عليهم بالحرف ،دول باعوا شرفهم بالدولارات لحماس، بقولك تحيا مصر !!

الأول:- طيب معلهش يمكن علشان إنت رأيك إنه ديكتاتور وكان مشغل نادى الزمالك لحسابه وحساب أولاده وكل اللى بيطبلوا له ؟

الثانى:- يا عم ما يتحرق الزمالك ويروح فى ستين داهية هو وجمهوره البوابين فى يوم واحد ، أنا أساسا بشجع الأهلى !!

الأول :- أومال ليه حضرتك بتكرهه الكراهية دى كلها ليه ومش طايق سيرته ؟؟

الثانى :- يا أستاذ انت مش متابع حاجة خالص ولا إيه ؟ ده قليل الأدب ولسانه زفر شتم الإسطورة و قاله رجع الساعات ، وكمان غلط فى رئيس الإتحاد وقاله يا أهلاوى ؟

#حسن_مدبولى (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل