مذكرات حمقى السلطة في العراق

صوت الانتفاضة

الحوار المتمدن-العدد: 6962 - 2021 / 7 / 18 - 20:42
المحور: مواضيع وابحاث سياسية
    

قصة قصيرة فجة
تدري فد يوم قريت مختصر قصة اسمها "ثياب الامبراطور" تحكي عن محتال يدعي انه يحوك ثيابا للإمبراطور لا يستطيع ان يراها سوى الصادقين، وعندما يخرج الامبراطور عاريا يخشى الجميع ان يقولوا انهم لا يرون ثياب الامبراطور؛ ولكن طفلا صغيرا يجرؤ على ذلك لأنه لا يخشى قول الصدق. قال ذلك لصديقه وهو يتمشى معه في معرض بغداد للكتاب، صديقه تعجب من هذا الكلام وسأله: أدرى شنو مناسبة هذا الحچي، دسولفنا على هاي الكتب، شوف شنشتري، شنقرا.
شسولفلك هي الشغله كايسه مثل ما يگولون، دتشوف صور "القادة الشهداء"، وصور المعممين من داخل العراق وخارجه تارسه المعرض، أدرى هذا معرض كتاب لو صور من المعركة؛ تدري بس أسماء القاعات زينه، والا المعرض كله لعبان نفس.
هسه لا تباوع على الصور، غلس، شنو احنا جايين نعاين على الصور لو نشوفنا چم كتاب زين؛ دشوف هذا الكتاب شلونه "الهروب الى الحرية" مال أريك فروم.
مو گتلك صاير انت اثول، ولك هذا الكتاب مال فطحل الإسلاميين "حسين الشهرستاني" ذاك مال فروم اسمه "الهروب من الحرية"، فروم خايف من الحرية، والشهرستاني رايح الها، بس الفرق الحرية عند الشهرستاني أوروبا، يعني الونسه، يعني الواين، يعني المايوهات واليخوت؛ اييييه، عاشت ايدك "عالم الذرة" خوش لعبتها، رهن نفط العراق 25 سنه واخذ حصته من الشركات وارتاح، وبعدين ألف كتاب.
أي ولك صدگ هذا حسين الشهرستاني، بس هن حرفين جر شمدريني بيهن؛ مو مشكله اهم شي ما نلگى بعد مذكرات لهذول السفله.
تعرف أنى ليش ضايج ومختنگ، لأن شفت كل عناوين كتبهم، هاك اقراء:
الهروب الى الحرية........حسين الشهرستاني
رحلة وطن................عمار الحكيم
بين النيران...............اياد علاوي
حوار الفكر.............عادل عبد المهدي
تجربة حكم............ابراهيم الجعفري
السنوات الأربع في قصر السلام...............فؤاد معصوم
تدري دمروا البلد وخربوه وما خلو بيه شي وما كفاهم هذا الخراب اجو هسه كلهم يأرخون لهذا الخراب، شايف هيج قباحه وقذارة ونتانه؛ لو بيدي أخلى ماده بالدستور تبيح الكفر بكل المقدسات، حتى المختنگ يرتاح. شوف عبد المهدي كتل 800 شاب وجرح الالاف ويكتب "حوار الفكر"، والجعفري "فيلسوف المذهب" يحچي عن "تجربة حكم" مالته، اللي تأسست رسميا بعهده الميليشيات، واياد علاوي اللي گضاها "والله يابه ما اعرف" "والله يابه ما أدرى"، وفؤاد معصوم يكتب عن فترة حكمه اللي كل الشعب ما عرف عنده ريس لو ماكو، وعمار ما اسولفلك عليه، بقى بس واحد ما كاتب، ليش ما ادري.
يابه لا تضوج ولا تزعل نفسك، دمشي خلي نطلع من هذا المعرض، وتعال اشربك "هنيگن" تبرد بيها گلبك؛ بس گلي شنو سالفة الامبراطور، شجابها على بالك.
شوف سلطة الإسلاميين والقوميين هاي بمعمميها وعگلها ومراجعها وقادة ميليشياتها چانت كلها عرايه گدامنا واحنا نشوفهم بس ما گدرنا نگول الحقيقة، لأن خايفين، بس اجا تشرين "الطفل الصغير" اللي هو حسسنا انه احنا الصغار وهو الچبير، وفضح هاي السلطة القذرة وأسقط الغشاوة والخوف وشوف الناس صورت هاي السلطة الحقيقية.
عمي بعد ما نروح للمعرض حتى ما نشوف صورهم وكتبهم.
ليش ونخلص؟

#صوت_الانتفاضة (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل